ចិន​គ្រោង​ចូលរួម​សមយុទ្ធ​កងទ័ពជើងទឹក​នៅ​ភាគ​ខាងជើង​ប្រទេស​អូស្ត្រាលី​ថ្វីបើ​ទំនាក់ទំនង​តានតឹង

កងទ័ពជើងទឹក​ចិន​នឹងចូលរួម​ជាមួយ​ប្រទេស​ចំនួន​២៦​ទៀត​ក្នុង​ការធ្វើ​សមយុទ្ធ​យោធា​នៅ​ឆ្នេរសមុទ្រ​ភាគ​ខាងជើង​របស់​អូស្ត្រាលី​ក្នុង​ខែ​នេះ ​ប៉ុន្តែ​មិនមែន​សមយុទ្ធ​បាញ់​គ្រាប់​ពិត​ទេ​។ នេះ​បើតាម​ការ​ឲ្យ​ដឹង​ពី​រដ្ឋមន្ត្រី​ក្រសួងការពារជាតិ​អូស្ត្រាលី​នៅ​ថ្ងៃ​ពុធ​ ចំពេល​ដែល​ទំនាក់ទំនង​រវាង​ប្រទេស​ទាំងពីរ​មាន​ភាព​តានតឹង​។​

សមយុទ្ធ​កងទ័ពជើងទឹក​នេះ​ត្រូវបាន​រៀបចំឡើង​ដោយ​អូស្ត្រាលី​ហើយនឹង​រួមបញ្ចូល​ទាំង​សម្ព័ន្ធមិត្ត​សំខាន់​របស់ខ្លួន​គឺ​សហរដ្ឋអាមេរិក​ផងដែរ​ដែល​បាន​បណ្តេញ​ចិន​កាលពី​ខែឧសភា​ចេញពី​ការហ្វឹកហ្វឺន​យោធា​របស់ខ្លួន​នៅ​ជុំវិញ​កោះ​ហា​វ៉ៃ​ដើម្បី​ជាការ​ឆ្លើយតប​ទៅនឹង​អ្វីដែល​ខ្លួន​មើលឃើញថា​ជាការ​ធ្វើ​ទំនើបកម្ម​កងទ័ព​រប​ស់​ក្រុង​ប៉េកាំង​នៅលើ​កោះ​ក្នុង​សមុទ្រ​ចិន​ខាងត្បូង​។​
​
ចំណងទាក់ទង​រវាង​អូស្ត្រាលី​និង​ចិន​បាន​ជួបប្រទះ​បញ្ហា​យ៉ាងខ្លាំង​បន្ទាប់ពី​រដ្ឋាភិបាល​ក្រុង​កង់​បេ​រ៉ា​បានអនុម័ត​ច្បាប់​ជាច្រើន​ក្នុង​គោលបំណង​ទប់ស្កាត់​ឥទ្ធិពល​របស់​ចិន​ក្នុង​កិច្ចការ​ផ្ទៃក្នុង​ហើយក៏​បាន​បដិសេធ​ការអះអាង​របស់​ចិន​នៅក្នុង​សមុទ្រ​ចិន​ខាងត្បូង​ផងដែរ​។​
​
រដ្ឋមន្ត្រី​ក្រសួងការពារជាតិ​អូស្ត្រាលី​លោកស្រី Marise Payne បាន​និយាយ​នៅក្នុង​សេចក្តីថ្លែងការណ៍​តាម​អ៊ី​ម៉ែ​ល​មួយ​ថា “​ប្រទេស​ចិន​ត្រូវបាន​គេ​រំពឹងថា​នឹងចូលរួម​នៅក្នុង​សកម្មភាព​ជាច្រើន​រួមទាំង​លំ​ហាត់​សមយុទ្ធ ការទំនាក់ទំនង​រវាង​នាវា​និង​នាវា សកម្មភាព​បំពេញបន្ថែម​និង​សមយុទ្ធ​ហ្វឹកហ្វឺន​នៅ​សមុទ្រ​ផងដែរ​” ។​
​
លោកស្រី​បាន​និយាយ​ដោយ​មិន​ផ្តល់​ហេតុផល​ថា “​គ្មាន​ផែនការ​សម្រាប់​ប្រទេស​ចិន​ដើម្បី​ចូលរួម​ក្នុង​សកម្មភាព​បាញ់​គ្រាប់​ពិត​នោះទេ​”​។ ប៉ុន្តែ​លោកស្រី​បាន​បន្ថែមថា ប្រជាជាតិ​នានា​បាន​បង្កើត​ទំនាក់ទំនង​ការពារ​ប្រកបដោយ​ផលិតភាព​មួយ​ដែល​សម្របសម្រួល​ឲ្យ​មាន​តម្លាភាព​និង​កសាង​ទំនុកចិត្ត​។​
​
គួរ​បញ្ជាក់ថា សមយុទ្ធ​នេះ​នឹងត្រូវ​បានធ្វើ​ឡើង​ក្នុង​ដែន​ទឹកជា​យុទ្ធសាស្ត្រ​នៅ​ភាគ​ខាងជើង​នៃ​ទីក្រុង Darwin ដែលជា​កន្លែង​ការសម្រេចចិត្ត​មួយ​ដើម្បី​ជួល​កំពង់ផែ​ទីក្រុង​នេះ​ទៅ​ឲ្យ​ក្រុមហ៊ុន​ចិន​បាន​បង្ក​ការស្តីបន្ទោស​យ៉ាងខ្លាំង​ពី​សហរដ្ឋអាមេរិក​។ សមយុទ្ធ​នេះ​នឹង​បន្ត​រហូតដល់​ពាក់កណ្តាល​ខែកញ្ញា​ហើយ​មានការ​ចូលរួម​ពី​ប្រទេស​ចំនួន​២៧​។​
​ប្រទេស​ចិន​បាន​ចូលរួម​សមយុទ្ធ​នេះ​ក្នុងនាម​ជា​អ្នកសង្កេតការណ៍​នៅ​ឆ្នាំ​២០១៦៕ REUTERS

​

[caption id="attachment_955984" align="alignnone" width="960"] The Arleigh Burke-class guided-missile destroyer USS Kidd (DDG 100) arrives in India for Malabar July 9, 2017. Mass Communication Specialist 2nd Class Jacob M. Milham/U.S. Navy Photo/Handout via REUTERS[/caption]

Source: Kampuchea Thmey Daily