ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៅព្រឹកថ្ងៃទី១៧ ខែសីហានេះ បានជំរុញឲ្យភាគីឡាវ ខិតខំបង្កើនទំហំពាណិជ្ជកម្មទ្វេភាគីរវាងប្រទេសទាំងពីរឲ្យកាន់តែមានទំហំធំ។ ខណៈដែលទំហំពាណិជ្ជកម្មរវាងប្រទេសទាំងពីរមានប្រមាណ ២៤ លានដុល្លារ នៅក្នុងឆ្នាំ ២០១៨ នេះ។ នេះបើយោងតាមការបញ្ជាក់របស់លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន។
នៅព្រឹកថ្ងៃទី ១៧ ខែសីហានេះប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានអនុញ្ញាតឲ្យលោក ប្រាសីត សាយ៉ាស៊ីត (BrasithSayasith)ឯកអគ្គរដ្ឋទូតប្រទេសឡាវ ចូលជួបសំដែងការគួរសម និងជម្រាបលាក្នុងឱកាសរូបលោកបានបញ្ចប់បេសកកម្មការទូតនៅកម្ពុជាដែលធ្វើឡើងនៅវិមានសន្តិភាព។
បើតាមប្រសាសន៍លោក អ៊ាង សុផល្លែត បានប្រាប់ឲ្យដឹងថា នៅក្នុងជំនួបនោះលោកឯកអគ្គរដ្ឋទូតបានគោរពសម្តែងនូវការសោកស្តាយចំពោះអ្វីដែលបានកើតឡើងលើប្រជាជនឡាវដែលជួបគ្រោះទឹកជំនន់ដោយសារបាក់ទំនប់វារីអគ្គីសនី។
លោកក៏បានថ្លែងអំណរគុណដល់រាជរដ្ឋាភិបាលកម្ពុជាដែលបានបរិច្ចាគថវិកាជួយដល់ប្រទេសឡាវនិងផ្តល់កិច្ចសហការយ៉ាងល្អក្នុងជួយដល់ប្រទេសឡាវនាពេលកន្លងមកនេះ។
ពីនោះទៅទៀតលោកក៏បានសម្តែងនូវការអបអរសាទរចំពោះលទ្ធផលបោះឆ្នោតនៅកម្ពុជា។ លោកទូតបានបញ្ជាក់ថា ក្នុងការបោះឆ្នោតនេះរូបលោកក៏បានធ្វើជាអ្នកសង្កេតការណ៍ហើយបានសង្កេតឃើញថា ការបោះឆ្នោតនោះមានតម្លាភាពនិងការរៀបចំបានល្អ។ ក្នុងន័យនេះលោក បានសម្តែងការអបអរសាទរជូនសម្តេចតេជោហ៊ុនសែនដោយក្តីគោរព។
លោកទូតបានជម្រាបជូនសម្តេចផងដែរថា បេសកកម្មរបស់លោកនៅកម្ពុជាមានរយៈពេល ៤ ឆ្នាំ២ខែ។ លោកបានឃើញនូវការអភិវឌ្ឍរបស់ប្រទេសកម្ពុជាយ៉ាងឆាប់រហ័សជាទីបំផុតប្រជាជនមានជីវភាពរស់នៅយ៉ាងល្អនិងមានការរីកចម្រើន ហើយការអភិវឌ្ឍទៀតសោតគឺមាន ការលេចធ្លោតែម្តង។
លោកក៏បានជម្រាបជូនសម្តេចផងដែរអំពីទំហំពាណិជ្ជកម្មទ្វេភាគីរវាងប្រទេសទាំងពីរកន្លងមកនេះមានការកើនឡើងជាង ២ ដងគឺ កើនពី ១០ លានដុល្លារ ទៅ ២៤លានដុល្លារនៅឆ្នាំ២០១៨នេះ។
ជាការឆ្លើយតបសម្តេចតេជោ ហ៊ុន សែន បានសម្តែងនូវការកោតសរសើរចំពោះលោកឯកអគ្គរដ្ឋទូតដែលបានចូលរួមពង្រឹងនិងពង្រីក ចំណងមិត្តភាពរវាងកម្ពុជា-ឡាវ និង ជំរុញទំហំពាណិជ្ជកម្មរវាងប្រទេសពីរផង។ សម្តេចក៏បានចូលរួមសោកស្តាយនិងមរណទុក្ខ ចំពោះក្រុម គ្រួសារជនរងគ្រោះប្រជាជនឡាវ ដែលបានជួបនូវគ្រោះធម្មជាតិនៃការបាក់ទំនប់វារីអគ្គិសនីកន្លងមកនេះ។
សម្តេចតេជោបានមានប្រសាសន៍ថា បានថ្លែងអំណរគុណចំពោះ ប្រាសីត ដែលបានអបអរសារទរចំពោះលទ្ធផលនៃការបោះឆ្នោតនិង បានចូលរួមសង្កេតការណ៍ក្នុងដំណើរការបោះឆ្នោតនៅកម្ពុជាកន្លងទៅនេះ។
សម្តេចបានបន្ថែមថា ទំហំពាណិជ្ជកម្មរវាងប្រទេសយើងទាំងពីរគឺមានការកើនឡើងទ្វេដង។ ប៉ុន្តែយ៉ាងណាក៏ដោយទំហំពាណិជ្ជកម្ម នេះមិនទាន់មានការសមស្របទៅនឹងសក្តានុពល ដែលប្រទេសទាំងពីរមាននោះឡើយដូច្នេះសម្តេចបានស្នើសុំឲ្យមានការប្រឹងប្រែងបន្ថែមទៀត ចំពោះកិច្ចការនេះ៕
Source: Kampuchea Thmey Daily
0 Comments