ណាហ្គា​វើ​ល ប៉ះ​បឹងកេត ហើយ​ភ្នំពេញ​ក្រោ​ន ទទួល​អង្គ​រថា​យ​ហ្គឺ​រ និង​វិសាខា ជួប​សូល​ទី​ឡូ​អង្គរ នៅ​ថ្ងៃ​សៅរ៍​នេះ

ក្រុមបាល់ទាត់​ណាហ្គា​វើ​ល ត្រូវ​ប៉ះ​ក្រុម​បឹងកេត ដើម្បី​ប្រជែង​កៅអី​កំពូល​តារាង​ ហើយ​ក្រុម​ភ្នំពេញ​ក្រោ​ន ទទួល​ក្រុម​អង្គ​រថា​យ​ហ្គឺរ និង​ក្រុម​វិសាខា ជួប​ក្រុម​សូល​ទី​ឡូ​អង្គរ នៅ​ល្ងាច​ថ្ងៃ​សៅរ៍ ទី​១៨ ខែសីហា ឆ្នាំ​២០១៨ នេះ​ក្នុង​សប្ដាហ៍​ទី​១៨ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018)​។



*​ណាហ្គា​វើ​ល ប៉ះ​បឹងកេត​
ក្រុម​ណាហ្គា​វើ​ល ត្រូវ​ប៉ះ​ក្រុម​បឹងកេត នៅវេលា​ម៉ោង​៣​រសៀល​លើ​ទីលាន​កីឡដ្ឋាន​ស្តា​ត​ចាស់ ព្រមទាំង​មាន​ផ្សាយ​ផ្ទាល់​តាម​ប៉ុស្តិ៍ BTV News ផងដែរ​។ ក្រុម​ណាហ្គា​វើ​ល វិញ​កំពុង​ឈរ​លេខ​២ ក្នុង​តារាង​រួម ក្រោយ​ប្រកួត​ឈ្នះ​បាន​១៣​លើក ស្មើគ្នា​២​លើក និង​ចាញ់​២​លើក មាន​៤១​ពិន្ទុ​ក្នុង​ដៃ​។ លោក មាស ចាន់ណា គ្រូបង្វឹក​កាន់​អាជ្ញា​ប័​ណ្ឌ AFC A License បាន​អះអាងថា​លោក នឹង​ព្យាយាម​ប្រមូលផ្ដុំ​អារម្មណ៍​កីឡាករ​ឲ្យ​បានល្អ​ឡើងវិញ និង កែប្រែ​ចំណុច​ខ្វះខាត​ដើម្បី​បន្ត​រក​កៅអី​កំពូល​តារាង​រហូតដល់​ចប់​រដូវ​កាល​។



ចំណែក​ក្រុម​បឹងកេត កំពុងតែ​ឈរ​កំពូល​តារាង ក្រោយ​ឆ្លងកាត់​១៧​ប្រកួត​មកនេះ​ឈ្នះ​រហូតដល់​១៣​ប្រកួត ស្មើគ្នា​៣​ប្រកួត​និង​ចាញ់​១​ប្រកួត​មាន​៤២​ពិន្ទុ​។ លោក ហៅ សុជាតិ ដែលជា​គ្រូបង្វឹក​កំពុងតែ​ឈឺក្បាល​រឿង​កីឡាករ​របួស ខណៈ​រូបលោក​ត្រូវ​ពិន័យ​មិន​ឲ្យ​ចូល​ទីលាន​រយៈពេល​១​ខែ​ទៀត​ផង​។ មិនតែប៉ុណ្ណោះ​លោក​បាន​សម្លឹង​ឃើញ​ក្រុម​ណាហ្គា​វើ​ល និង​វិសាខា ជា​គូប្រជែង​មិនអាច​មើលរំលង​បាន​ក្នុង​ការដណ្តើម​ជើងឯក​នៅ​ឆ្នាំនេះ​។



*​ភ្នំពេញ​ក្រោ​ន ប៉ះ​អង្គ​រថា​យ​ហ្គឺ​រ​
ក្រុម​ភ្នំពេញ​ក្រោ​ន ត្រូវ​ប៉ះ​ក្រុម​អង្គ​រថា​យ​ហ្គឺ​រ នៅវេលា​ម៉ោង​៦​ល្ងាច​លើ​ទីលាន​កីឡដ្ឋាន RSN Stadium ព្រមទាំង​មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC​ផងដែរ​។ ក្រុម​ភ្នំពេញ​ក្រោ​ន ក្រោម​ការដឹកនាំ​របស់​លោក Sean Sainsbury ជា​គ្រូបង្វឹក​ជនជាតិ​អង់គ្លេស សំបូរ​ទៅ​ដោយ​កីឡាករ​វ័យក្មេង​ច្រើន​អម​ដោយ​កីឡាករ​បរទេស​ដែលមាន​សមត្ថភាព​។ ក្រុម​នេះ​អស់​ឱកាស​ក្នុង​ការ​ប្រជែង​យកពាន​នៅ​រដូវ​កាល​នេះហើយ​។ ប្រកួត​បាន​១៧​លើក​មកនេះ​ភ្នំពេញ​ក្រោ​ន ឈរ​ចំណាត់ថ្នាក់​លេខ​៥ មាន​២៧​ពិន្ទុ​ក្រោយ​ឈ្នះ​បាន​៨​លើក ស្មើ​៣​លើក និង​ចាញ់​៦​លើក​។



ចំណែក​ក្រុម​អង្គ​រថា​យ​ហ្គឺ​រ ឆ្លងកាត់​ប្រកួត​១៧​លើក​ដូចគ្នា ឈ្នះ​បាន​៥ លើក​ស្មើគ្នា​បាន​៤​លើក និង​ចាញ់​៨​លើក​មាន​១៩​ពិន្ទុ​។ ក្រុម​នេះ​កំពុងតែ​ដឹកនាំ​ដោយ​លោក Oriol Mahedano ដែល​ជា​គ្រូបង្វឹក​សញ្ជាតិ​អេ​ស្ប៉ា​ញ កាន់​អាជ្ញាប័ណ្ណ​គ្រូបង្វឹក​កម្រិត UEFA A licence ដែលមាន​សមាជិក​២៥​នាក់​។ លោក Akihiro Kato ដែល​ជា​ប្រធាន​ក្លិប​បានដាក់​គោលដៅ​យក​កៅអី​នៅ​តំបន់​ក្រុម​ខ្លាំង​ទាំង​៤​ប្រចាំ​រដូវ​កាល (Top4) នៅ​ឆ្នាំនេះ ខណៈ​នៅ​ឆ្នាំ​២០២០ ក្លិប​ចង់​ប្រជែង​យក​ជើងឯក​។



*​វិសាខា ប៉ះ​សូល​ទី​ឡូ​អង្គរ
ក្រុម​ចំណូល​ថ្មី​ទាំង​២​គឺ​ក្រុម​វិសាខា ត្រូវ​ប៉ះ​ក្រុម​សូល​ទី​ឡូ​អង្គរ នៅ​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់ មាន​ផ្សាយ​ផ្ទាល់​តាម​ប៉ុស្តិ៍ BTV News​។ ក្រុម​វិសាខា កំពុងតែ​ត្រូវការ​ពិន្ទុ​ជា​ខ្លាំង​ដើម្បី​ប្រជែង​នៅ​តំបន់​កំពូល​តារាង​ក្រោយ​ប្រកួត​បាន​១៧​លើក​ឈ្នះ​បាន​១២​លើក ស្មើគ្នា​បាន​២​លើក​និង​ចាញ់​៣​លើក​មាន​៣៨​ពិន្ទុ និង​កំពុងតែ​ឈរ​ចំណាត់ថ្នាក់​លេខ​៣​បណ្តោះអាសន្ន​ក្នុងចំណោម​ក្លិប​ទាំង​១២​។ លោក ហុក សុ​ជី​វ័​ន្ត គ្រូបង្វឹក​របស់​វិសាខា បាន​រំពឹងថា​ កូនក្រុម​អាច​បន្ត​ជ័យជម្នះ​ថែមទៀត​ដើម្បី​ដណ្តើម​កៅអី​កំពូល​តារាង​។

ចំណែក​ក្រុម​សូល​ទី​ឡូ​អង្គរ ក្រោម​ការដឹកនាំ​របស់​គ្រូបង្វឹក​ជនជាតិ​ជប៉ុន Yuki Matsuda កំពុងតែ​ត្រូវការ​ពិន្ទុ​គេច​ឱ្យ​ផុតពី​តំបន់​គ្រោះថ្នាក់​។ គ្រូបង្វឹក​រូបនេះ​ទើបតែ​បញ្ចប់​វគ្គ​សិក្សា​គ្រូបង្វឹក​បាល់ទាត់​កម្រិត AFC A License នៅ​ប្រទេស​សិង្ហ​បុរី កាលពីដើមឆ្នាំ​។ ១៧​ប្រកួត​កន្លងមក​ក្រុម​សូល​ទី​ឡូ​អង្គរ ឈ្នះ​បាន​៤​លើក ស្មើគ្នា​៤​លើក​និង​ចាញ់​ដល់​ទៅ​៩​លើក​។

​ចំណែក​ប្រកួត​ផ្សេងទៀត​ប្រចាំ​សប្តាហ៍​ទី​១៨​នេះ​នឹង​បន្តធ្វើ​ឡើង​នៅ​ថ្ងៃអាទិត្យ ទី​១៩ ខែសីហា ឆ្នាំ​២០១៨ ទៀត​ដោយ​ក្រុម​អាស៊ី​អឺរ៉ុប ប៉ះ​អគ្គីសនី​កម្ពុជា នៅ​ម៉ោង​៣​រសៀល​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម​ប៉ុស្តិ៍ BTV News​ហើយ​ក្រុម​វេ​ស្ទើ​ន​ភ្នំពេញ ត្រូវ​ប៉ះ​ក្រុមព្រះ​ខ័ន​រាជ​ស្វាយរៀង នៅវេលា​ម៉ោង​៣​រសៀល​លើ​ទីលាន​កីឡដ្ឋាន​វេ​ស្ទើ​ន មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC និង​ក្រុម​ក្រសួងការពារជាតិ ប៉ះ​ក្រុម​អគ្គស្នងការដ្ឋាន​នគរ​បាល​ជាតិ នៅវេលា​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់ មាន​ផ្សាយ​ផ្ទាល់​តាម​ប៉ុស្តិ៍ BTV News៕

     

Source: Kampuchea Thmey Daily