ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជានឹងជួបជាមួយប្រធាន និងថ្នាក់ដឹកនាំគណបក្សនយោបាយទាំង១៩ ដែលមិនទទួលបានអាសនៈក្នុងការបោះឆ្នោតអាណត្តិជ្រើសតាំងតំណាងរាស្ត្រនីតិកាលទី៦ នៅថ្ងៃទី២១ ខែសីហា ដើម្បីបង្កើតឡើងនូវវេទិកាពិគ្រោះយោបល់សម្រាប់រាជរដ្ឋាភិបាល និង គណបក្សនយោបាយដែលមិនឈ្នះឆ្នោត ក្នុងគោលបំណងប្រមូលផ្តុំនូវគំនិត និង ទស្សនៈដើម្បីចូលរួមចំណែកដោះស្រាយបញ្ហាប្រទេសជាតិ។
បើយោងតាមកម្មវិធីគ្រោងទុកប្រមុខរាជរដ្ឋាភិបាលកម្ពុជានិងយកថ្ងៃទី២១ ខែសីហា នេះដើម្បីជួបជាមួយប្រធានគណបក្ស និង ថ្នាក់ដឹកនាំគណបក្សទាំង ២០ ដែលបានចូលរួមក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី ២៩ ខែ កក្កដា តែពុំទទួលបានអាសនៈ។ ការជួបជុំនេះនឹង ធ្វើឡើងនៅវិមានសន្តិភាពទីស្តីការនាយករដ្ឋមន្ត្រីដែលមានរយៈពេលមួយព្រឹក និង មានការរៀបពិសារបាយសាមគ្គីផងដែរបន្ទាប់ពីជំនួប។ នេះបើតាមលិខិតអញ្ជើញមួយរបស់គណៈរដ្ឋមន្ត្រីផ្ញើទៅកាន់គណបក្សនយោបាយនានានៅថ្ងៃទី១៦ ខែសីហា ឆ្នាំ២០១៨។
លិខិតអញ្ជើញដែលចេញដោយ លោក ប៊ិន ឈិន ឧបនាយករដ្ឋមន្ត្រីរដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីបានឲ្យដឹងថា វេទិការវាងរាជរដ្ឋាភិបាលកម្ពុជា និងតំណាងគណបក្សនយោបាយទាំង២០នេះ នឹងមានរបៀបវារៈមួយចំនួនដូចជា ១.សុន្ទរកថាបើកវេទិកាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា។ទី២.ការចូលរួមយោបល់ពីគណបក្សនយោបាយនានា។ទី៣.បញ្ហាផ្សេងៗ និង របៀបវារៈចុងក្រោយគឺការពិសារបាយសាមគ្គី។
ការបង្កើតវេទិកាពិគ្រោះយោបល់នេះរាជរដ្ឋាភិបាលនឹងបើកចំហឲ្យគណបក្សនយោបាយដែលមិនជាប់ឆ្នោតទាំងនោះមានសិទ្ធិរិះគន់លើគោលនយោបាយរបស់រាជរដ្ឋាភិបាលដែលអនុវត្តការងារមិនល្អនិងជួយដោះស្រាយចំណុចខ្វះខាតនានាតាមរយៈការពិនិត្យលើយន្តការក្នុងសេចក្តីព្រាងច្បាប់ជាដើម។ ការរៀបចំបែបនេះវានឹងជួយរំឭកដល់ការងាររាជរដ្ឋាភិបាលឲ្យអនុវត្តការងារត្រឹមត្រូវតាមការសន្យាខ្លួន ពោលគឺកុំឲ្យរាជរដ្ឋាភិបាលជិះសេះលែងដៃហើយទុកពលរដ្ឋរងទុក្ខលំបាក។ ការរៀបចំវេទិកានេះវាជាឱកាសឲ្យគណបក្សនយោបាយដែលមិនជាប់ឆ្នោតនេះអាចចូលរួមក្នុងការជួយដល់ប្រទេសជាតិ និង ដើម្បីជាទុនសម្រាប់ការបោះឆ្នោតនៅអាណត្តិខាងមុខទៀតផងដែរ។
ប្រមុខរាជរដ្ឋាភិបាលកម្ពុជាកាលពីថ្ងៃទី ១៥ ខែ សីហា បានបង្ហើបឲ្យដឹងពីបំណងរបស់សម្តេចក្នុង ការបង្កើតឲ្យមានវេទិកាពីគ្រោះយោបល់រវាងរាជរដ្ឋាភិបាលនិងគណបក្សទាំង១៩ ដែលបានចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលមិនទទួលបានអាសនៈ ។
សម្តេចតេជោ ហ៊ុន សែន មានប្រសាសន៍ថា “ទោះបីសភាមានប៉ុន្មានគណបក្សក៏ដោយ ខ្ញុំចង់បង្កើតវេទិកាពិគ្រោះយោបល់រវាងរាជរដ្ឋាភិបាលជាមួយបណ្ដាបក្សចូលរួមបោះឆ្នោត។ ជាវេទិកាថ្មីមួយនៅក្នុងអាណត្ដិទី ៦...។ ខ្ញុំចង់ឲ្យមានវេទិកានេះកើតឡើងជាវេទិកាពិគ្រោះយោបល់មួយក្រៅផ្លូវការ ដែលនឹងអាចជាធាតុចូលនៃបណ្ដាគណបក្សនយោបាយដែលផ្តល់ជូនមករាជរដ្ឋាភិបាល ក្នុងគោលបំណង ដែលគេមានចំណែកដើម្បីចូលរួមចំណែកដើម្បីកសាងប្រទេស។ គេក៏បញ្ជ្រាបនយោបាយរបស់បក្សគេទៅក្នុងជីវភាពរបស់ប្រជាពលរដ្ឋ។ គេអាចនឹងទទួលបានការគាំទ្រនៅអាណត្ដិក្រោយផងដែរ វាជាផលប្រយោជន៍ទាំងអស់។ ផលប្រយោជន៍នៃការសុខសាន្ដ សុខដុមរមនាក្នុងសង្គមជាតិបង្កើតឡើងនូវវប្បធម៌សន្ទនារវាងបក្សក្នុងរដ្ឋាភិបាល និងបក្សក្រៅរដ្ឋាភិបាល ឬ ក្រៅសភា”។
សម្តេចតេជោនាយករដ្ឋមន្ត្រីបានបញ្ជាក់ផងដែរថា ការជួបនេះមិនមែនជាការជួបរវាងប្រធានគណបក្សឈ្នះឆ្នោត ជាមួយគណបក្សចាញ់ឆ្នោតនោះទេ។ ក៏ប៉ុន្តែជាការជួបរវាងនាយករដ្ឋមន្ត្រី និង គណបក្សក្រៅរដ្ឋាភិបាល។
សម្តេចតេជោមានប្រសាសន៍ថា “ខ្ញុំជួបក្នុងឋានៈខ្ញុំជានាយករដ្ឋមន្ដ្រីដោយអញ្ជើញបណ្ដាបក្សនយោបាយមកកាន់វិមានសន្ដិភាពហើយយើងពិគ្រោះយោបល់ជាមួយគ្នា។ ខ្ញុំកំពុងឲ្យពិនិត្យនូវលទ្ធភាពដែលអាចជួបគ្នា។ ខ្ញុំនឹងធ្វើលិខិតអញ្ជើញ។ អាចមួយគណបក្ស ២ ឬ ៣ នាក់មកជួបជាមួយខ្ញុំនៅវិមានសន្ដិភាពមុនបង្កើតរដ្ឋាភិបាលដើម្បីអាចយើងនិយាយគ្នា។ អ្នកពេញចិត្តក៏មក អ្នកមិនពេញចិត្តក៏មិនមក។ តាមចិត្តចង់”។
ការផ្តួចផ្តើមរបស់ប្រមុខរាជរដ្ឋាភិបាលនេះគឺជាគំនិតមួយដ៏ល្អដែលទទួលបានការគាំទ្រពីថ្នាក់ដឹកនាំគណបក្សដែលចូលរួមបោះឆ្នោតអាណត្តិទី៦នេះ។ ពួកគេទាំងនោះចាត់ទុកការរៀបចំវេទិកានេះគឺជារបត់នយោបាយមួយក្នុងដំណើររួមគ្នាអភិវឌ្ឍជាតិរវាងគណបក្សកាន់អំណាចនិងគណបក្សក្រៅរដ្ឋាភិបាល។ នេះជាការបើកទូលាយសម្រាប់ការចូលរួមនូវគ្រប់តួអង្គចង់ចូលរួមចំណែករក្សាសន្តិភាពនិងការអភិវឌ្ឍប្រទេសជាពិសេសទៅលើការកសាងប្រទេសរបស់ធ្វើម៉េចឲ្យវាលឿនទៅមុខ។
សម្តេចតេជោ ហ៊ុន សែន បានមានប្រសាសន៍ថា “ខ្ញុំចង់ប្រើប្រាស់អាណត្តិទី ៦ នេះឲ្យទៅជាអាណត្តិនៃការប្រមូលធនធានខួរក្បាល។ យើងចង់ប្រមូលធាតុចូលដែលខ្ញុំធ្លាប់បាននិយាយកាលពីមុនថា ប្រមូលកម្លាំងមនុស្ស កម្លាំងបញ្ញា និងកម្លាំងទ្រព្យសម្បត្តិ ដើម្បីអភិវឌ្ឍប្រទេស”៕
Source: Kampuchea Thmey Daily
0 Comments