ភ្នំពេញ ៖ លោកស្រី (Tina Susan Redshaw)ឯកអគ្គរាជទូតថ្មីនៃចក្រភពអង់គ្លេសប្រចាំកម្ពុជាបានថ្លែងថា ក្នុងបេសកកម្មការទូតគ្រប់បែបយ៉ាង ទាំងអស់ដើម្បីពង្រឹងទំនាក់ទំនងទ្វេភាគីរវាងកម្ពុជានិងចក្រភពអង់គ្លេស។ ដោយយកចិត្តទុកដាក់ទៅលើបញ្ហាពាណិជ្ជកម្ម បញ្ហាលើកកម្ពស់ស្ត្រី បញ្ហាអប់រំផង ការបោសសំអាតមីន បច្ចេកវិទ្យានិងតិចណូឡូជី។
លោកស្រី (Tina Susan Redshaw) បានធ្វើការប្តេជ្ញាចិត្តបែបនេះ នៅចំពោះមុខសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា នៅក្នុងឱកាសដែលលោកស្រីត្រូវបានអនុញ្ញាតឲ្យចូលជួបសំដែងការគួរសមនាព្រឹកថ្ងៃទី១៧ ខែ សីហា នេះនៅវិមានសន្តិភាពទីស្តីការនាយករដ្ឋមន្ត្រី។
បើយោងតាមប្រសាសន៍លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុនសែនបានប្រាប់ឲ្យដឹងថា ក្នុងជំនួបនេះលោកស្រី ទីណា ហ្សូហ្សាន រេតស៍ បានជម្រាបជូនសម្ដេចតេជោថា ក្នុងដំណើរបេសកកម្មការទូតនៅកម្ពុជាក្នុងរយៈពេលប្រាំមួយសប្តាហ៍មកនេះលោកស្រី បានទទួលនូវការស្វាគមន៍យ៉ាងកក់ក្តៅជាទីបំផុត ហើយក្នុងបេសកកម្មបន្តទៀតលោកស្រីនឹងធ្វើអ្វីគ្រប់បែបយ៉ាងទាំងអស់ ដើម្បីពង្រឹងទំនាក់ទំនង ទ្វេភាគីរវាងកម្ពុជានិងចក្រភពអង់គ្លេស។
លោកស្រីក៏បានជម្រាបជូនសម្ដេចនាយកផងដែរថា លោកស្រីនឹងផ្ដោតការយកចិត្តទុកដាក់ ទៅលើបញ្ហាបច្ចេកវិទ្យានិងតិចណូឡូជី, យកចិត្តទុកដាក់ទៅលើបញ្ហាដោះមីន។ ក្នុងន័យនេះលោកស្រីបានជម្រាបជូនសម្ដេចថា ចក្រភពអង់គ្លេសនឹងបន្តធ្វើកិច្ចការងារនេះជួយដល់ កម្ពុជាបន្តទៅទៀត។ លោកស្រីក៏បានគូសបញ្ជាក់ទៀតថា ជាមួយនេះក៏នឹងបន្តយកចិត្តទុកដាក់ទៅលើបញ្ហាពាណិជ្ជកម្ម បញ្ហាលើកកម្ពស់ស្ត្រី និងបញ្ហាអប់រំផងដែរ។
ជាការឆ្លើយតប សម្ដេចតេជោបានអរគុណដល់ចក្រភពអង់គ្លេសក៏ដូចជាប្រជាជនអង់គ្លេសដែលបានជួយដល់កម្ពុជាជាពិសេសលើវិស័យអប់រំការបណ្ដុះបណ្ដាលធនធានមនុស្សដែលជាកត្តាសំខាន់របស់កម្ពុជានិងសូមអរគុណផងដែរ ដែលចក្រភពអង់គ្លេសបានជួយកម្ពុជា លើវិស័យដោះមីន។
សម្ដេចតេជោបានមានប្រសាសន៍ថា នៅកម្ពុជា មានមជ្ឈមណ្ឌលដោះមីនអាស៊ានហើយមានវិសាលភាពធំជួយដល់បណ្ដាប្រទេសក្នុង តំបន់ផង និង ចូលរួមចំណែកក្នុងការងារអង្គការសហប្រជាជាតិ ក្នុងការដោះមីន។ ដូច្នេះគប្បីពិចារណាពង្រឹងកិច្ចសហប្រតិបត្តិការលើវិស័យនេះ។ ពាក់ព័ន្ធនឹងការលើកកម្ពស់ស្ត្រី,សម្តេចបានជម្រាបជូនថា នៅកម្ពុជាមានរាជរដ្ឋាភិបាលបានយកចិត្តទុកដាក់ចំពោះសមភាពយេនឌ័រដោយរៀបចំឲ្យមានកូតាស្ត្រីចាប់តាំងពីថ្នាក់ ឃុំ ស្រុក ខេត្ត រហូតដល់ជួរកងទ័ព នគរបាល ក៏ ដូចជាសមាជិករាជរដ្ឋាភិបាលនិងស្ថាប័នរដ្ឋផងដែរ។ ពីនោះ ទៅទៀតរាជរដ្ឋាភិបាលក៏បានយកចិត្តដាក់កសាងសាលារៀននៅគ្រប់ទីកន្លែង ដោយបានកសាងអន្តេវាសិកសម្រាប់សិស្សជាស្ត្រី អាចចូលរៀន។
សម្តេចតេជោ ហ៊ុន សែន ក៏បានគូសបញ្ជាក់ផងដែរថា ថ្មីៗនេះរាជរដ្ឋាភិបាលបានយកចិត្តទុកដាក់អនុវត្តន៍គោលនយោបាយគាំពារសង្គមដោយបានជួយ ដល់ស្ត្រីមានផ្ទៃពោះ និង ឆ្លងទន្លេ ជាពិសេសកម្មការីនីនៅពេលឆ្លងទន្លេបានទទួលការឈប់សម្រាក ៣ខែ ដោយទទួលបានប្រាក់ឈ្នួលរហូតដល់ ១២០ ភាគរយ និង ពេលសម្រាលកូនទទួលបានការឧបត្ថម្ភពីរដ្ឋ ៤០ម៉ឺនរៀលសម្រាប់កូនមួយ។ ជាមួយនេះរាជរដ្ឋាភិបាលក៏នឹងដាក់ឲ្យអនុវត្តន៍ សម្រាប់ស្ត្រីក្រីក្រដែលមានផ្ទៃពោះត្រូវបានទទួលការឧបត្ថម្ភពីរដ្ឋនូវទឹកនូវទឹកប្រាក់ចំនួន ៧៦ ម៉ឺនរៀលដោយការផ្តល់ឲ្យជាដំណាក់បន្ទាប់ពីមាន ផ្ទៃពោះ រហូតសម្រាល និង បន្តរហូតទារកមានអាយុ ២ ខួប៕
Source: Kampuchea Thmey Daily
0 Comments