កោះ​តៃវ៉ាន់​អនុវត្ត​ទោស​ប្រហារជីវិត​ជា​លើកដំបូង​ក្នុង​រយៈពេល​២​ឆ្នាំ

កោះ​តៃវ៉ាន់​ បាន​ប្រហារជីវិត​អ្នកទោស​ម្នាក់​កាលពី​ថ្ងៃ​សុក្រ​ ដែល​នេះ​ជា​ការ​ប្រហារជីវិត​លើកដំបូង​បង្អស់ ​ដែល​ធ្វើឡើង​ក្រោម​រដ្ឋាភិបាល​របស់​លោក​ស្រី​ប្រធានាធិបតី Tsai Ing-wen បើទោះបីជា​មានការ​អំពាវនាវ​ជា​បន្តបន្ទាប់​ពី​ក្រុម​សិទ្ធិមនុស្ស​ឲ្យ​លុបចោល​ទោស​ប្រហារជីវិត​ក៏ដោយ។

យោង​តាម​ក្រសួងយុត្តិធម៌​បាន​ឲ្យ​ដឹងថា លោក Lee Hung-chi ត្រូវបាន​ប្រហារជីវិត​នៅក្នុង​គុក​មួយ​នៅ​ភាគខាងត្បូង​ទីក្រុង Kaohsiung កាលពី​រសៀល​ថ្ងៃ​សុក្រ​ដោយ​ការបាញ់​កាំភ្លើង​ដោយសារតែ​គាត់​បានសម្លាប់​អតីត​ភរិយា​និង​កូនស្រី​អាយុ​ប្រាំ​ឆ្នាំ​របស់គាត់​ក្នុង​ឆ្នាំ​២០១៤​។​
​
លោក Lee បាន​ចាក់​សម្លាប់​អតីត​ប្រពន្ធ​របស់គាត់​នៅ​ខាងក្រៅ​សាលា​មតេយ្យ​របស់​កូនស្រី​ទាំងពីរ​នាក់​របស់​ពួកគេ​ហើយ​បន្ទាប់មក​បាន​យក​ក្មេងស្រី​ម្នាក់​ចូលក្នុង​ឡាន​របស់គាត់​ដែល​នៅ​ទីនោះ​គាត់​ព្យាយាម​សម្លាប់​កូន​ទាំងពីរ​និង​ខ្លួនឯង​ដោយសារ​ការបំពុល​កាបូន​ម៉ូ​ណូ​ស៊ីត​។​
​
លោក Lee បាន​រស់រានមានជីវិត​ក្រោយពី​ពួកគេ​ត្រូវបាន​ជួយសង្គ្រោះ​ប៉ុន្តែ​ក្មេងស្រី​ម្នាក់​បាន​ស្លាប់​ក្នុង​រយៈពេល​ពីរ​ខែ​ក្រោយមក​បើទោះបីជា​មានការ​ព្យាបាល​ក៏ដោយ​។​
​
អនុរដ្ឋមន្ត្រី​ក្រសួងយុត្តិធម៌​លោក Chen Ming-tang បាន​ប្រាប់​ក្រុម​អ្នកយកព័ត៌មាន​ថា “​សកម្មភាព​របស់គាត់​គឺ​ឃោរឃៅ​និង​គ្មាន​មេ​ត្ដា​ហើយ​បានធ្វើ​ឲ្យ​ប៉ះពាល់​ដល់​ក្រុមគ្រួសារ​ជនរងគ្រោះ​”​។ លោក​បាន​បន្ថែមថា តុលាការ​បានសម្រេច​ថា គ្មាន​ការលើកលែង​សម្រាប់​លោក Lee ទេ​។​
​
កោះ​តៃវ៉ាន់​បាន​បន្ត​ការកាត់ទោស​ប្រហារជីវិត​ឡើងវិញ​នៅ​ឆ្នាំ​២០១០​ក្រោយពី​ផ្អាក​រយៈពេល ៥​ឆ្នាំ​ហើយ​ការកាត់ទោស​ប្រហារជីវិត​ត្រូវបាន​រក្សាទុក​សម្រាប់​ឧក្រិដ្ឋកម្ម​ធ្ងន់ធ្ងរ​បំផុត​ដូចជា​ការសម្លាប់​មនុស្ស​និង​ការចាប់​ជំរិត​ជាដើម​។​
​អ្នកនយោបាយ​និង​ក្រុម​សិទ្ធិមនុស្ស​មួយចំនួន​បាន​អំពាវនាវ​ឲ្យ​លុបបំបាត់ចោល​ទោស​នេះ​ប៉ុន្តែ​ការស្ទង់មតិ​ជាច្រើន​បានបង្ហាញ​ពី​ការគាំទ្រ​ភាគច្រើន​សម្រាប់​ការកាត់ទោស​ប្រហារជីវិត​។​
​
បច្ចុប្បន្ននេះ​មាន​អ្នកទោស​ចំនួន​៤២​នាក់​ដែល​កំពុង​ជាប់ទោស​ប្រហារជីវិត​នៅ​កោះ​តៃវ៉ាន់​។​
​ការប្រហារជីវិត​លោក Lee គឺជា​លើកដំបូង​ចាប់តាំងពី​អតីត​និស្សិត​មហាវិទ្យាល័យ​ម្នាក់​ត្រូវ​ជាប់ទោស​ប្រហារជីវិត​ក្នុង​ខែឧសភា​ឆ្នាំ​២០១៦​ដោយសារ​ការសម្លាប់​ម​នុស្ស​៤​នាក់​នៅក្នុង​ការវាយប្រហា​រ​ដោយ​កាំបិត​លើ​រថភ្លើង​ក្រោម​ដី​មួយ​ដែល​បាន​បង្ក​ការភ្ញាក់ផ្អើល​ដល់​កោះ​ដែលមាន​សន្តិភាព​មួយ​នេះ​៕ AFP

​

Source: Kampuchea Thmey Daily