ស​.​ប​.​ក បង្ហាញ​បញ្ជី​ឈ្មោះ​ក្រុម​ជម្រើសជាតិ​កម្ពុជា ២៣​នាក់​ត្រៀម​ប្រកួត​មិត្តភាព​អន្តរជាតិ​ជាមួយ​ម៉ាឡេស៊ី

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានប្រកាស​ពី​ប្រកាស​ពី​បញ្ជី​ឈ្មោះ​កីឡាករ​ចំនួន​២៣​នាក់​ក្នុង​ក្រុម​ជម្រើសជាតិ​កម្ពុជា នៅ​ព្រឹក​ថ្ងៃ​សៅរ៍ ទី​១ ខែកញ្ញា ឆ្នាំ​២០១៨ ដើម្បី​ប្រមូល​ផ្តុំ​ហ្វឹកហាត់​ត្រៀម​ប្រកួត​មិត្តភាព​អន្តរជាតិ​ជាមួយ​ក្រុម​ភ្ញៀវ​ជម្រើសជាតិ​ម៉ាឡេស៊ី ដែល​នឹង​ធ្វើឡើង​នៅ ថ្ងៃទី​១០ ខែកញ្ញា ខាងមុខ​។



កីឡាករ​ដែល​ត្រូវបាន​ស​.​ប​.​ក កោះហៅ​លើក​នេះ​មានដូចជា​អ្នកចាំទី​គឺ ស៊ូ យ៉ា​ទី របស់​ណាហ្គា​វើ​ល​, អ៊ុំ វិចិត្រ របស់​ក្រសួងការពារជាតិ​,​កែវ សុខ​សិលា របស់​វិសាខា​។ ចំណែក​ខ្សែការពារ​វិញ​មាន ហុង ផេង​,​លី វ៉ា​ហេ​ទ​,​សេរ រ៉​ស៊ី​ប របស់​បឹងកេត​, ស ពិសិដ្ឋ របស់​ក្រសួងការពារជាតិ​, ឆេង ម៉េង របស់​ណាហ្គា​វើ​ល​, អ៊ុក សុវណ្ណ របស់​ភ្នំពេញ​ក្រោ​ន​, នេន សុធា​រ័ត្ន និង​សឿ​យ វិសាល របស់​ព្រះខ័ន​រាជ​ស្វាយរៀង​។

ងាក​មក​មើល​ខ្សែបម្រើ​គឺមាន​ជ័យ ចិ​ត្រា របស់​អគ្គស្នងការដ្ឋាន​នគរបាលជាតិ​, ឈិន ឈឿន របស់​ក្រសួងការពារជាតិ​, ស៊ុះ ស៊ូ​ហា​ណា និង​គួច សុក​ម្ភៈ របស់​ណាហ្គា​វើ​ល​, អ៊ិន សុដាវី​ត និង ប្រាក់ ធី​វ៉ា របស់​ភ្នំពេញ​ក្រោ​ន​, ប៊ី​ន ចន្ថា​ជា​រី របស់​ក្រុម Teregannu FA (​ម៉ាឡេស៊ី​) និង​ទិ​ត្យ ឌី​ណា របស់​វិសាខា​។ សម្រាប់​ខ្សែប្រយុទ្ធ​មាន ប្រាក់ មុន្នី​ឧ​ត្ត​ម របស់​ព្រះខ័ន​រាជ​ស្វាយរៀង​, កែវ សុខ​ផេង របស់​វិសាខា​, រ៉ឹ​ម ប៊ុន​ហៀ​ង របស់​ក្រុម​ក្រសួងការពារជាតិ និង​ស៊ិន កក្កដា របស់​ភ្នំពេញ​ក្រោ​ន​។

សហព័ន្ធ​កីឡាបាល់ទាត់​កម្ពុជា បាន​ដាក់លក់​សំបុត្រ​សម្រាប់​ប្រកួត​មិត្តភាព​អន្តរជាតិ​រវាង​កម្ពុជា ជាមួយ​ម៉ាឡេស៊ី ចាប់ពី​ថ្ងៃទី​០១ ខែកញ្ញា ឆ្នាំ​២០១៨ ពី​ម៉ោង ៩:០០​ព្រឹក ដល់​ម៉ោង ៥:០០​ល្ងាច​តទៅ​នៅ​ពហុ​កីឡដ្ឋាន​ជាតិ ដែល​នឹង​ធ្វើឡើង​នៅវេលា​ម៉ោង​៦:៣០​ល្ងាច ក្នុង​ថ្ងៃទី​១០ ខែកញ្ញា ឆ្នាំ​២០១៨ លើ​ទីលាន​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ​។ ប្រកួត​នេះ​មាន​ផ្សាយ​ផ្ទាល់​តាម​ប៉ុស្តិ៍​ទូរទស្សន៍ BTV News ផងដែរ​។

សូមបញ្ជាក់​ថា ​ក្រោយ​ប្រកាស​តែងតាំង​កីឡាករ Keisuke Honda ជា​អ្នកចាត់ការ​ទូទៅ​ក្រុម​ជម្រើសជាតិ​កម្ពុជា សហព័ន្ធ​កីឡាបាល់ទាត់​កម្ពុជា​បាន ត្រៀម​រៀបចំ​កម្មវិធី​ប្រកួត​មិត្តភាព​អន្តរជាតិ​ចំនួន​៤​ប្រកួត​ជាមួយ​ក្រុម​ជម្រើសជាតិ​មួយចំនួន​នៅក្នុង​តំបន់ មុន​ចេញទៅ​ចូលរួម​ប្រកួត​ក្នុង​ពានរង្វាន់ AFF Suzuki Cup ឆ្នាំ​២០១៨ ចុងឆ្នាំ​នេះ​។

យោង​តាម​ប្រភព​មកពី​សហព័ន្ធ​កីឡាបាល់ទាត់​កម្ពុជា បាន​បញ្ជាក់​ថា ​ការប្រកួត​មិត្តភាព​ទាំង​៤​លើក​នេះ​មាន​បូក​ទាំង​ប្រកួត​ជាមួយ ក្រុម​ជម្រើសជាតិ​ម៉ាឡេស៊ី ផងដែរ​។ ចំណែក​៣​ប្រកួត​ផ្សេងទៀត​នឹងធ្វើ​ឡើង​នៅ​១២ ខែតុលា ពោល​គឺ​ប្រកួត​ជាមួយ​ក្រុម​ជម្រើសជាតិ​ទី​ម័​រ​ខាងកើត និង​នៅ​ថ្ងៃទី​១៦ ខែតុលា ប្រកួត​ជាមួយ​ក្រុម​ជម្រើសជាតិ​សិង្ហ​បុរី​។ ចុងក្រោយ​នៅ​ថ្ងៃទី​២ ខែវិច្ឆិកា កម្ពុជា ត្រូវ​បន្ត​ប្រកួត​ជាមួយ​ក្រុម​បរទេស (​មិនទាន់​ប្រាកដថា​ក្រុម​ណា​)​។

បើ​និយាយ​ពី​ពានរង្វាន់ AFF Suzuki Cup 2018 ឆ្នាំនេះ​ពូ​ល A មាន​វៀតណាម ម៉ាឡេស៊ី មី​យ៉ាន់​ម៉ា កម្ពុជា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​អាចជា​ប្រ៊ុយណេ ឬ​ទី​ម័​រ​ខាងកើត​។ តាម​គម្រោងការ​វគ្គ​ជម្រុះ​តាម​ពូ​ល​នេះ​នឹងធ្វើ​ឡើ​ចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨​។ សម្រាប់​កម្មវិធី​ប្រកួត​ជម្រុះ​ពូ​ល A របស់​ក្រុម​កម្ពុជា វិញ​នឹង​ប្រកួត​បើកឆាក​ប៉ះ​ក្រុម​ម៉ាឡេស៊ី នៅ​ថ្ងៃទី​៦ ខែវិច្ឆិកា នៅ​រាជធានី​ភ្នំពេញ ខណៈ​ត្រូវ​ប៉ះ​ម្ចាស់ផ្ទះ​មី​យ៉ាន់​ម៉ា នៅ​ថ្ងៃទី​១២ ខែវិច្ឆិកា នៅ​ទីក្រុង​រ៉ង់​ហ្គូ​ន រហូតដល់​ថ្ងៃទី​២០ ខែវិច្ឆិកា ក្រុម​កម្ពុជា ត្រូវ​ប៉ះ​ឡាវ នៅ​រាជធានី​ភ្នំពេញ ហើយ​នៅ​ថ្ងៃទី​២៤ ខែវិច្ឆិកា ត្រូវធ្វើ​ដំណើរ​ទៅ​ប៉ះ​ម្ចាស់ផ្ទះ​វៀតណាម នៅ​ទីក្រុង​ហាណូយ​៕

 

Source: Kampuchea Thmey Daily