តាកែវ ៖ បុរសម្នាក់ បានស្លាប់ភ្លាមៗនៅនឹងកន្លែងក្នុងករណីគ្រោះថ្នាក់ចរាចរណ៍មួយដែលកើតឡើង ដោយការធ្វេសប្រហែស ដោយបានបុករថយន្តបើកបរបញ្ច្រាសទិសគ្នាពេញទំហឹង ខណៈមានរថយន្ត១គ្រឿងខូចចតចោលនៅលើទ្រូងផ្លូវ ទើបធ្វើឲ្យជនរងគ្រោះបើកម៉ូតូគេចរថយន្តខូចនោះ ក៏ត្រូវរថយន្តមួយគ្រឿងទៀតបុកពេញទំហឹង។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងវេលាម៉ោង១៨និង៣០នាទីថ្ងៃទី២៣ ខែកញ្ញា ឆ្នាំ២០១៨ នៅលើផ្លូវលេខ១២៩E ស្ថិតនៅភូមិស៊ីស្លា ឃុំធ្លាប្រជុំ ស្រុកកោះអណ្តែត ខេត្តតាកែវ។
លោកជាល សុផាត នាយការិយាល័យចរាចរណ៍ផ្លូវគោកខេត្ត បានឲ្យដឹងថា រថយន្តបង្កជារថយន្តកូរ៉េ តែមិនបានស្គាល់ពិតប្រាកដទេ ព្រោះរថយន្តបង្កបានបើកគេចទៅបាត់ហើយ រហូតមកដល់ពេលនេះ ស្រាវជ្រាវតាមរកមិនទាន់បានឃើញនៅឡើយទេ។ លោកបន្តថា រថយន្តមិនស្គាល់អត្តសញ្ញាណខាងលើ បើកទិសដៅពីលិចទៅកើត លុះដល់ចំណុចកើតហេតុខាងលើ បានបុកជាមួយម៉ូតូបើកបញ្ច្រាសផ្លូវគ្នា ម៉ាកហុងដាសេ១២៥ ស៊េរី២០១៧ ពណ៌ខ្មៅ ពាក់ស្លាកលេខតាកែវ 1N-9028 បើកបរដោយឈ្មោះ លឹម គឿន ភេទប្រុស អាយុ៥១ឆ្នាំ រស់នៅភូមិដំណាក់ ឃុំពេជសារ ស្រុកកោះអណ្តែត ខេត្តតាកែវ បណ្តាលឲ្យស្លាប់នៅកន្លែងកើតហេតុ។
លោកនាយការិយាល័យបានបន្ថែមថា ដោយមានរថយន្តកូរ៉េ១,២៥ តោនខូចនៅទីនោះ ជនរងគ្រោះបើកម៉ូតូគេចរថយន្តដែលខូចនោះ ដោយមិនបានមើលមុខក្រោយ ក៏ត្រូវរថយន្តបុកស្លាប់តែម្តងទៅ។
បច្ចុប្បន្នសពជនរងគ្រោះបានប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី ចំណែកម៉ូតូជនរងគ្រោះសមត្ថកិច្ចបានយកមករក្សាទុកនៅអធិការដ្ឋាននគរបាលស្រុកកោះអណ្តែត រង់ចាំធ្វើការដោះស្រាយគ្នានៅពេលក្រោយ៕
Source: Kampuchea Thmey Daily
0 Comments