ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ឆ្លងកាត់ការប្រកួតប្រជែងនយោបាយរយៈពេលកន្លងមកនេះ នៅប្រទេសកម្ពុជា មានអ្នកនយោបាយពីរប្រភេទ គឺជាអ្នកនយោបាយដែលខិតខំរំដោះប្រទេស ដោះស្រាយបញ្ហារបស់ប្រជាពលរដ្ឋ និងអ្នកនយោបាយលំៗ មិនខិតខំទេ តែចាំតែជេរ និងលាបពណ៌អ្នកដទៃ។
លោក សុខ ឥសាន លើកឡើងថា ប្រភេទទីមួយ ជាអ្នកនយោបាយដែលខិតខំដើម្បីបានឈ្នះ ដោយ ទី១, ក្នុងខណៈដែលមាតុភូមិជួបគ្រោះមហន្តរាយនៃសង្គ្រាមវិនាសកម្ម និងគ្រោះប្រល័យពូជសាសន៍ ខិតខំតស៊ូ និងរិះរកវិធីរំដោះប្រទេសជាតិ និងប្រជាជនឲ្យរួចផុតពីគ្រោះថ្នាក់ទាំងនោះ បានទាន់ពេលវេលា ទី២, ខិតខំបំពេញតួនាទី ភារកិច្ចបម្រើប្រជាជនចេះដឹងសុខទុក្ខប្រជាជន និងខិតខំដោះស្រាយជូនប្រជាជនបានស្របតាមសំណូមពរ ទី៣, ក្នុងការប្រកួតប្រជែងបោះឆ្នោតខិតខំបង្កើតស្នាដៃគុណសម្បត្តិ យកចិត្តទុកដាក់ជួយប្រជាជនឲ្យរួចផុតពីទុក្ខលំបាក ទាក់ទាញសមានចិត្តពីប្រជាជន ធ្វើឲ្យប្រជាជនជឿទុកចិត្ត និងបោះឆ្នោតគាំទ្រឲ្យឈ្នះឆ្នោត បានកាន់អំណាច។
ប្រភេទទីពីរ៖ ជាអ្នកនយោបាយលំៗ មិនខិតខំទេ ចាំតែជេរ និងលាបព៌ណអ្នកដទៃ ដោយទី១, គ្នានគោលនយោបាយច្បាស់លាស់និងត្រឹមត្រូវទេ ទី២, គ្មានទស្សនវិស័យត្រឹមត្រូវ វែងឆ្ងាយទេ ទី៣, មួយថ្ងៃៗ គិតតែរិះរកវិធីវាយប្រហារគេឯលាបព៏ណគេឯង មិនខិតខំបង្កើតស្នាដៃទេ តែមានគោលគំនិតលាបព៏ណគេ បង្កាចបង្ខូចគេឯងយកស្នាដៃទៅវិញ ទី៤, មួយថ្ងៃៗមិនគិតធ្វើអ្វីទេគិតតែរិះរកវិធីធ្វើបាតុកម្មយកគុណសម្បត្តិ យកស្នាដៃ។
តាមលោក សុខ ឥសាន បើប្រៀបធៀបរវាងអ្នកនយោបាយប្រភេទទី១ និងអ្នកនយោបាយប្រភេទទី២ មតិប្រជាជនភាគច្រើនលើសលប់ ដើរតាម និងគាំទ្រអ្នកនយោបាយប្រភេទទី១ ដែលជាអ្នកនយោបាយមានឧត្តមគតិ មានការទទួលខុសត្រូវចំពោះជាតិ និងប្រជាជន ចេះផ្សារភ្ជាប់សុខទុក្ខជាមួយប្រជាជន ជាតួអង្គឈានមុខ ជាគំរូតួយ៉ាងដូចសម្តេចតេជោ ហ៊ុន សែន ជាតួអង្គឈ្នះជានិច្ច និងជារៀងរហូត។
ចំណែកអ្នកនយោបាយប្រភេទទី២ ជាអ្នកនយោបាយចោលម្សៀត មានសតិអារម្មណ៍អភិជនចង់ស្រួល ចង់ស្រណុក តែខ្ជិល ជាមនុស្សឱកាសនិយម ចាំតែឆ្លៀតឱកាសរៃអង្គាសស្រោមសំបុត្រ ពីអ្នកឆោតល្ងង់មួយចំនួន មើលបំណាំអ្នកដទៃ ដើម្បីចាប់កំហុសមកធ្វើជាគុណសម្បត្តិរបស់ខ្លួន ដែលប្រជាជនមិនចូលចិត្ត ដែលធ្វើឲ្យអ្នកនយោបាយប្រភេទនេះមិនទទួលការគាំទ្រពីប្រជាជនឡើយ ដែលធ្វើឲ្យទទួលបរាជ័យជារៀងរហូត តួយ៉ាងដូចទណ្ឌិតសម រង្សី ជាតួយ៉ាងជាក់ស្តែងជាឧទាហរណ៍ស្រាប់៕
Source: Kampuchea Thmey Daily
0 Comments