ខ្សែប្រយុទ្ធ នួន បូរី សមាជិកក្នុងក្រុមបាល់ទាត់អគ្គស្នងការដ្ឋាននគរបាលជាតិ (ប៉ូលីស) កំពុងតែរកបានគ្រាប់បាល់ច្រើនជាងគេក្នុងពានរង្វាន់បាល់ទាត់សម្តេចអគ្គសេនាបតីតេជោ ហ៊ុន សែន ឆ្នាំ២០១៨ នេះក្នុងវគ្គជម្រុះជើងឯកថ្នាក់ជាតិ ខណៈក្រុមនេះជាបេក្ខជននៅក្នុងវគ្គផ្តាច់ព្រ័ត្រ ដែលនឹងធ្វើឡើងនៅដើមខែតុលា ខាងមុខដែរ។
គិតចាប់ពីវគ្គជម្រុះតាមពូលរហូតដល់វគ្គផ្តាច់ព្រ័ត្រនេះឃើញថា គ្រាប់បាល់សរុបដែល នួន បូរី រកបាននាពេលកន្លងគឺចំនួន៧គ្រាប់ ច្រើនជាងកីឡាករដទៃ។ ចំណែកកីឡាករ២នាក់ផ្សេងទៀតដែលកំពុងតែគ្រាប់បាល់តាមពីក្រោយគឺកីឡាករ សុខ ហៀង របស់ក្រុមក្រសួងការពារជាតិ និងកីឡាករ ឈិន ឈឿន របស់ក្រុមក្រសួងការពារជាតិ។
គណៈកម្មការរៀបចំការប្រកួតបានកំណត់ថា កីឡាករដែលរកបានគ្រាប់បាល់បានច្រើនជាងគេក្នុងព្រឹត្តិការណ៍នេះ នោះគណៈកម្មការរៀបចំការប្រកួតបាល់ទាត់ជាតិកម្ពុជា (CNCC) ដែលជាអ្នករៀបចំកម្មវិធីនេះនឹងប្រគល់ស្បែកជើងមាសចំនួន១និងប្រាក់រង្វាន់លើកទឹកចិត្តមួយចំនួនទៀត។
គិតតាំងពីពានរង្វាន់នេះបង្កើតឡើងពីឆ្នាំ២០០៧មក គេឃើញថា មានកីឡាករជាច្រើនធ្លាប់ឈ្នះពានរង្វាន់នេះដូចជា ហុក សុជីវ័ន្ត របស់ក្រុមភ្នំពេញក្រោន ឈ្នះនៅឆ្នាំដំបូង ហើយកីឡាករ សុក ចាន់រស្មី របស់ក្រុម Spark FC នៅឆ្នាំ២០០៨ កីឡាករ គូច សុកុម្ភៈ របស់ក្រុមខេមរាកីឡា ឈ្នះនៅឆ្នាំ២០០៩ ហើយនៅឆ្នាំ២០១០ កីឡាករ គួច សុកុម្ភៈ របស់ក្រុមខេមរាកីឡា និងកីឡាករ ស្រី វាសនា របស់ក្រុមភ្នំពេញក្រោន ជាម្ចាស់ស្បែកជើងមាស។ នៅឆ្នាំ២០១១និង២០១២ ពានរង្វាន់នេះបានទៅកីឡាករ ឃួន ឡាបូរ៉ាវី របស់ក្រុមព្រះខ័នរាជស្វាយរៀង ហើយនៅឆ្នាំ២០១៣ កីឡាករ ចាន់ វឌ្ឍនាកា របស់បឹងកេត ឈ្នះវិញម្តង។ កីឡាករ ឃួន ឡាបូរ៉ាវី បានឈ្នះម្តងទៀតនៅឆ្នាំ២០១៤ ក្រោយផ្ទេរទៅកាន់បឹងកេត។ នៅឆ្នាំ២០១៥ ពាននេះបានទៅកីឡាករ ប្រាក់ មុន្នីឧត្តម របស់ក្រុមព្រះខ័នរាជស្វាយរៀង វិញម្តង ហើយកីឡាករ សួង វីរៈ កាលនៅអង្គរថាយហ្គឺរ ឈ្នះពានរង្វាននេះនៅឆ្នាំ២០១៦ និងនៅឆ្នាំ២០១៧ កីឡាករ ឃួន ឡាបូរ៉ាវី ឈ្នះម្តងទៀត។
ចំណែកនៅឆ្នាំ២០១៨ នេះពានរង្វាន់សម្តេចតេជោ ហ៊ុន សែន ធ្វើដំណើរដល់វគ្គផ្តាច់ព្រ័ត្រហើយដោយក្រុមក្រសួងការពារជាតិ ត្រូវប៉ះក្រុមអគ្គស្នងការដ្ឋាននគរបាលជាតិ ពោលគឺនឹងធ្វើឡើងនៅថ្ងៃទី៦ ខែតុលា ឆ្នាំ២០១៨ ខាងមុខ។ ចំណែកក្រុមអង្គរថាយហ្គឺរ និងក្រុមណាហ្គាវើល ដែលចាញ់នៅវគ្គពាក់កណ្ដាលផ្តាច់ព្រ័ត្រ ទទួលបានចំណាត់ថ្នាក់៣ស្ទួន៕
Source: Kampuchea Thmey Daily
0 Comments