អ្នកវិភាគ​ ៖​ កូរ៉េខាងជើង ​កំពុង​រៀបចំ​ក្បួនព្យុហយាត្រា​យោធា

រូបភាព​ផ្កាយរណប​បាន​បង្ហាញថា ប្រទេស​កូរ៉េខាងជើង ​កំពុង​ត្រៀម​រៀបចំ​ក្បួន​ដង្ហែ​ព្យុហយាត្រា​យោធា​មួយ​ផ្សេងទៀត​ចំពេល​មានការ​ព្រួយបារម្ភ​ថ្មី​ថា កិច្ចខិតខំ​ប្រឹងប្រែង​ការទូត​លើ​ការលុបបំបាត់​អាវុធ​នុយក្លេអ៊ែរ​ត្រូវបាន​ជាប់គាំង​បើទោះបីជា​ក្រុមអ្នកវិភាគ​និយាយថា ខ្លួន​មិន​ច្បាស់​ថា​តើ​កូរ៉េខាងជើង​នឹង​បង្ហាញ​នូវ​មី​ស៊ី​ល​ផ្លោង​ធំៗ​របស់​ប្រទេស​ដែរ​ឬ​អត់​ក៏ដោយ​។​
​
ក្រុង​ព្យុងយ៉ាង​កំពុង​ត្រៀម​រៀបចំ​ព្រឹត្តិការណ៍​សំខាន់ៗ​មួយចំនួន​នៅ​ថ្ងៃទី​៩​ខែកញ្ញា​សម្រាប់​ខួប​លើក​ទី​៧០​នៃ​ការបង្កើត​ប្រទេស​។ ក្នុង​ព្រឹត្តិការណ៍​នោះ​អាច​រួមមាន​ក្បួន​យោធា​មួយ​ដែលមាន​ការចូលរួម​ទស្សនា​ដោយ​គណប្រតិភូ​បរទេស​។​
​
អស់​រយៈពេល​ជា​យូរ​មកហើយ ក្បួនព្យុហយាត្រា​គឺជា​វិធី​មួយ​សម្រាប់​ប្រទេស​កូរ៉េខាងជើង​ដើម្បី​បង្ហាញ​នូវ​កម្លាំងយោធា​របស់ខ្លួន​ហើយ​ការបង្ហាញ​នៅ​ខែកញ្ញា​នេះ​បាន​កើតឡើង​ចំពេល​មានការ​ចរចា​រសើប​អំពី​អនាគត​នៃ​អាវុធ​នុយក្លេអ៊ែរ​និង​ឃ្លាំង​មី​ស៊ី​ល​ផ្លោង​របស់​ប្រទេស​។​
​
ដោយ​ផ្អែកលើ​រូបភាព​ផ្កាយរណប​ពាណិជ្ជកម្ម​ដែល​ប្រមូលបាន​ដោយ​ក្រុមហ៊ុន Planet Labs Inc., ក្រុមអ្នកវិភាគ​បាន​និយាយថា ក្បួន​ដង្ហែ​យោធា​ខែកញ្ញា​នេះ​ទំនងជា​ស្រដៀង​គ្នា​ទៅនឹង​ក្បួន​ដង្ហែ​មួយ​កាលពី​ថ្ងៃទី​៨​ខែកុម្ភៈ​ប៉ុន្តែ​រហូតមក​ដល់ពេលនេះ​មិនមាន​សញ្ញា​នៃ​មី​ស៊ី​ល​ឆ្លង​ទ្វីប (ICBM) ដែល​ត្រូវបាន​គេ​ជឿថា​មាន​សមត្ថភាព​ក្នុងការ​កំណត់​គោលដៅ​លើ​សហរដ្ឋអាមេរិក​ទេ​។​
​
លោក Jeffrey Lewis នាយក​កម្មវិធី​មិន​រីក​សាយភាយ​ថាមពល​នៅ​អាស៊ី​បូព៌ា​នៃ​វិទ្យាស្ថាន​សិក្សា​អន្តរជាតិ Middlebury បាន​និយាយថា “​នៅពេលនេះ ក្បួន​ដង្ហែ​នេះ​មាន​ភាពស្រដៀងគ្នា​បើ​វា​មិនតូច​ជាង​ក្បួន​ដង្ហែ​មួយ​នៅក្នុង​ខែកុម្ភៈ​”​។​
​
គួរ​បញ្ជាក់ថា ក្នុងចំណោម​អាវុធ​ដែល​វិទ្យាស្ថាន​សិក្សា​អន្តរជាតិ Middlebury នៃ​រដ្ឋកា​លី​ហ្វ​រ​នីញ៉ា​បាន​ប្រទះឃើញ​ក្នុង​រូបភាព​កាលពី​ថ្ងៃទី​២២​ខែសីហា​នៃ​ទីតាំង Mirim Parade Training Ground របស់​កូរ៉េខាងជើង​គឺមាន​រថក្រោះ កាំភ្លើង​ធំ​ស្វ័យប្រវត្តិ យាន​ដឹកជញ្ជូន​ទ័ពថ្មើរជើង មី​ស៊ី​ល​ប្រឆាំង​យន្តហោះ​និង​ជើង​ទម្រ​បាញ់​រ៉ុក្កែត​៕ REUTERS

​

Source: Kampuchea Thmey Daily