ប៉ៃលិន ៖ ស្ត្រីម្នាក់ដែលគេស្គាល់ថាជានាយកស្តីទី ទីចាត់ការហិរញ្ញវត្ថុសាលាខេត្តប៉ៃលិន បានស្លាប់ ក្នុងហេតុការណ៍គ្រោះថ្នាក់ចរាចរណ៍ក្នុងទឹកដីថៃ ចំណែកបុរសជាប្តី ជាអនុប្រធានមន្ទីរសុខាភិបាលខេត្ត បានរងរបួសធ្ងន់ធ្ងរ កំពុងសង្គ្រោះបន្ទាន់នៅមន្ទីរពេទ្យស្រុកពោងណាំរ៉ង ខេត្តចាន់បូរី ប្រទេសថៃ។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង៨និង២០នាទីយប់ថ្ងៃទី៣១ ខែសីហា ឆ្នាំ២០១៨ នៅចំណុចជិតផ្លូវបំបែក ក្នុងឃុំតាបសៃ ស្រុកពោងណាំរ៉ន ខេត្តចាន់បូរី ប្រទេសថៃ។
ជនរងគ្រោះក្នុងហេតុការណ៍គ្រោះថ្នាក់ចរាចរណ៍ខាងលើឈ្មោះ សៀក រតនៈ ភេទប្រុស អាយុ៥០ឆ្នាំ ជាប្តី និងមានមុខងារជាអនុប្រធានមន្ទីរសុខាភិបាលខេត្តប៉ៃលិន បានរងរបួសធ្ងន់ ចំណែកប្រពន្ធឈ្មោះ ឃាង ធីរ៉ាផន អាយុ៤១ឆ្នាំ ជានាយកស្តីទីចាត់ការហិរញ្ញវត្ថុសាលាខេត្តប៉ៃលិន បានស្លាប់បន្ទាប់ពីយកទៅសង្គ្រោះក្បែរកន្លែងកើតហេតុ ដោយបើកបររថយន្តម៉ាក CRV ពណ៌ប្រាក់ មិនស្គាល់ស្លាកលេខ រងការខូចខាតទាំងស្រុង។ ចំណែកអ្នកបើកបររថយន្តភាគីថៃ មិនទាន់ស្គាល់អត្តសញ្ញាណនៅឡើយ ក្រោយកើតហេតុ បានបើកទ្វាររថយន្ត រត់គេចខ្លួនបាត់ស្រមោលតែម្តង។
តាមប្រភពព័ត៌មានពីសមត្ថកិច្ចច្រកទ្វារអន្តរជាតិព្រំ ខេត្តប៉ៃលិន បានឲ្យដឹងថា ៖ ដំបូងឡើយជនរងគ្រោះទាំងពីរនាក់ប្តីប្រពន្ធ បានបើកបររថយន្តរបស់ខ្លួនម៉ាក CRV ពណ៌ប្រាក់ ក្នុងទិសដៅពីកើតទៅលិចដោយឆ្លងព្រំដែនខេត្តប៉ៃលិន ឆ្ពោះទៅខេត្តចាន់បូរី ប្រទេសថៃ លុះកំពុងតែធ្វើដំណើរសុខៗតាមដងផ្លូវ ស្រាប់តែមានរថយន្តរបស់ថៃ១គ្រឿងម៉ាក មីសុយមីស៊ី ពណ៌ស បើកបរវ៉ាជែងគ្នា ក៏បានជ្រុលទៅបុកជាមួយរថយន្តជនរងគ្រោះយ៉ាងពេញទំហឹង បណ្តាលឱ្យរងរបួសធ្ងន់ និងស្លាប់តែម្តង ហើយរថយន្តទាំង២គ្រឿងទទួលរងការខូចខាតយ៉ាងខ្លាំង។ ក្រោយកើតហេតុភាគីរថយន្តថៃ បានបើកទ្វាររថយន្ត រត់គេចខ្លួនបាត់ស្រមោលតែម្តង ចំណែកសមត្ថកិច្ចថៃ ក៏បានមកដល់ទីតាំងកើតហេតុ ព្រមទាំងស្ទូចយករថយន្តទាំងពីរចេញពីផ្លូវ ទៅរក្សាទុក ដោយរង់ចាំធ្វើការដោះស្រាយគ្នាតាមច្បាប់នៃប្រទេសថៃផងដែរ។
បច្ចុប្បន្នសពស្ត្រីរងគ្រោះ ត្រូវបានសាច់ញាតិទាក់ទងទៅខាងភាគីថៃ ដើម្បីដឹកត្រឡប់យកមកខេត្តប៉ៃលិន រៀបចំធ្វើបុណ្យតាមប្រពៃណី ចំណែកលោក សៀក រតនៈ អនុប្រធានមន្ទីរសុខាភិបាលខេត្ត កំពុងស្ថិតនៅក្នុងបន្ទប់សង្គ្រោះបន្ទាន់ប្រទេសថៃនៅឡើយ៕
Source: Kampuchea Thmey Daily
0 Comments