សម្ពាធ​កើន​ឡើង​កាន់តែ​ខ្លាំង​លើ​ប្រធានាធិបតី​ស្រីលង្កា​នៅ​ពេល​វិបត្ដិ​ប្រែក្លាយ​ទៅជា​អំពើហិង្សា

សម្ពាធ​បាន​ធ្លាក់​ទៅលើ​ប្រធានាធិបតី​ស្រីលង្កា​លោក Maithripala Sirisena ដើម្បី​កោះប្រជុំ​រដ្ឋសភា​ឡើងវិញ​នៅ​ថ្ងៃ​ចន្ទ​ក្រោយ​ការច្រានចោល​ដ៏​គួរ​ឲ្យ​ភ្ញាក់ផ្អើល​ពី​នាយករដ្ឋមន្ត្រី​ហើយ​ការផ្អាក​កិច្ចប្រជុំ​បាន​បង្ក​ឲ្យ​មាន​ការតស៊ូ​អំណាច​និង​ការប៉ះទង្គិច​គ្នា​ដែល​បានសម្លាប់​មនុស្ស​ម្នាក់​។​
​
ក្រសួងការបរទេស​អា​មេ​រិ​ក​កាលពី​ថ្ងៃអាទិត្យ​បាន​ជំរុញ​ឲ្យ​លោក Sirisena “​កោះប្រជុំ​សភា​ជាបន្ទាន់​” ដើម្បី​អនុញ្ញាត​ឲ្យ​សមាជិកសភា​លុបបំបាត់​វិបត្តិ​រដ្ឋធម្មនុញ្ញ​ដែល​បង្កឡើង​ដោយ​ការបណ្តេញ​លោកនាយក​រដ្ឋមន្ត្រី Ranil Wickremesinghe កាលពី​ថ្ងៃ​សុក្រ​។​
​
ក្រោយមក លោក Sirisena បានតែងតាំង​លោក Mahinda Rajapakse ដែលជា​អតីត​បុរស​ខ្លាំង​មាន​ទំនាក់ទំនង​ជិតស្និទ្ធ​ជាមួយ​ប្រទេស​ចិន​ឲ្យ​ធ្វើជា​នាយករដ្ឋមន្ត្រី​ថ្មី​ដែលជា​ហេតុ​បង្ក​ឲ្យ​មាន​ភាពចលាចល​ផ្នែក​នយោបាយ​នៅក្នុង​ប្រជាជាតិ​មហាសមុទ្រ​ឥណ្ឌា​មួយ​នេះ​។​
​
ប្រភព​ខាង​ការទូត​បាន​ប្រាប់ AFP ថា លោក Wickremesinghe និង​គណបក្ស​របស់គាត់​ត្រូវបាន​គេ​រំពឹងថា​នឹង​ស្នើ​ឲ្យ​តុលាការ​ប្រកាសថា សកម្មភាព​របស់លោក Sirisena គឺ​ខុសច្បាប់​ខណៈពេលដែល​ប្រទេស​នៅ​ជិតខាង​និង​ជា​មហាអំណាច​ក្នុង​តំបន់​គឺ​ឥណ្ឌា​កំពុង​ដាក់​សម្ពាធ​លើ​លោក Sirisena ឲ្យ​ស្តារ​សភា​ឡើងវិញ​។​
​
លោក Wickremesinghe បាន​បដិសេធ​ចាកចេញ​ពី​វិមាន​នាយករដ្ឋមន្ត្រី​ខណៈ​អ្នកគាំទ្រ​ជាង​១,០០០​នាក់​រាប់បញ្ចូល​ទាំង​ព្រះសង្ឃ​ផងដែរ​បាន​ប្រមូលផ្តុំ​គ្នា​នៅ​ខាងក្រៅ​។​
​
បុរស​វ័យ​៦៩​ឆ្នាំ​រូបនេះ​បាន​និយាយថា ការបណ្តេញចេញ​របស់​គាត់​គឺជា​អំពើ​ខុសច្បាប់​ហើយ​ចង់​ឲ្យ​សភា​កោះប្រជុំ​ជាបន្ទាន់​ដើម្បី​បង្ហាញថា គាត់​នៅតែ​ទទួលបាន​សំឡេង​ភាគច្រើន​។​
​
ភាព​តានតឹង​នៅតែមាន​កម្រិត​ខ្ពស់​នៅ​ទូទាំង​រដ្ឋធានី Colombo ខណៈ​តំណាងរាស្ត្រ​មួយចំនួន​ដែល​ស្មោះត្រង់​នឹង​លោក Wickremesinghe បាន​ព្រមាន​ពី​អំពើហិង្សា​តាម​ដងផ្លូវ​ប្រសិនបើ​លោក​ប្រធានាធិបតី​មិន​កោះប្រជុំ​សភា​ភ្លាមៗ​ទេនោះ​។​
​
ប៉ូលិស​បាន​និយាយថា បុរស​ម្នាក់​ត្រូវបាន​សម្លាប់​និង​ពីរ​នាក់​រងរបួស​កាល​ពីថ្ងៃ​អាទិត្យ​នៅពេល​អង្គរក្ស​របស់​រ​ដ្ឋ​មន្ត្រី​ក្រសួង​ប្រេងឥន្ធនៈ​លោក Arjuna Ranatunga ដែលជា​អ្នក​ស្មោះត្រង់​ចំពោះ​លោក Wickremesinghe បាន​បាញ់​លើ​ក្រុមមនុស្ស​ដែល​ប៉ុនប៉ង​ចាប់គាត់​ធ្វើជា​ចំណាប់ខ្មាំង​៕ AFP



Source: Kampuchea Thmey Daily