ភ្នំពេញ ៖ ជនសង្ស័យ២នាក់ ប៉ងធ្វើសកម្មភាពលួចទ្រព្យសម្បត្តិប្រជាពលរដ្ឋ សមត្ថកិច្ចឃើញទាន់ឃាត់ខ្លួនបាន២នាក់រួមទាំងវត្ថុតាងមួយចំនួន។
ហេតុការណ៍នេះ បានកើតឡើងកាលពីវេលាម៉ោង ២រំលងអធ្រាត្រ ឈានចូលថ្ងៃទី២៨ ខែតុលា ឆ្នាំ២០១៨ នៅចំណុចផ្លូវ ៩០៧ ក្រុម៥ ភូមិទួលសងែ្ក សង្កាត់ទួលសង្កែ ១ ខណ្ឌឫស្សីកែវ។
សមត្ថកិច្ចឲ្យដឹងថា ជនសង្ស័យទី១.ឈ្មោះ ងួន ភកី្ត ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះ០១០ ភូមិ១ សង្កាត់ឃ្មួញ ខណ្ឌសែនសុខ។ ជនសង្ស័យទី២.ឈ្មោះ ឃុត ចំរើន ភេទប្រុស អាយុ១៨ឆ្នាំ មុខរបរកម្មករ ស្នាក់នៅ ផ្ទះជួល ផ្លូវបេតុងភូមិ១ សង្កាត់ឃ្មួញ ខណ្ឌសែនសុខ។ សម្ភារៈដកហូត មានម៉ូតូមួយគ្រឿងម៉ាក សង់ C125ពណ៌ខ្មៅ ស៊េរី២០០៥បិទតែម២០១៨ ដែកសំប៉ែតចុងស្រួចចំនួនមួយ កូនសោខ្សៀលេខ៨ចំនួន១ ដែកលួសចំនួនមួយ។
ប្រភពដដែលបន្តថា នៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៨ ខែតុលា ឆ្នាំ២០១៨ មានជនសង្ស័យចំនួន០២នាក់ បានជិះម៉ូតូមួយគ្រឿងចេញពីផ្ទះនៅខណ្ឌសែនសុខក្នុងគោលបំណងលួចទ្រព្យប្រជាពលរដ្ឋ លុះមកដល់ចំណុចកើតហេតុខាងលើ បានប្រទះនឹងកម្លាំងសមត្ថកិច្ចកំពុងល្បាតក្នុងមូលដ្ឋាន ក៏មានការសង្ស័យ បានហៅត្រួតពិនិត្យរកឃើញកូនសោលេខ៨ ចំនួនមួយ ដែកកែច្នៃសំប៉ែតចុងស្រួចចំនួនមួយ និងដែកលួសកែច្នៃចំនួនមួយ នាំយកមកកាន់ប៉ុស្តិ៍នគរបាលរដ្ឋបាលទួលសង្កែ១ដើម្បីសាកសួរនិងកសាងសំណុំរឿងចាត់ការតាមនីតិវិធី។ បច្ចុប្បន្នជនសង្ស័យខាងលើត្រូវបានបញ្ជូនទៅអធិការដ្ឋាននគរបាលខណ្ឌឫស្សីកែវ៕
Source: Kampuchea Thmey Daily
0 Comments