ជប៉ុន​គ្រោង​នឹង​ជ្រើសរើស​យុវជន​វ័យក្មេង​កម្ពុជា​ទៅ​ធ្វើការ​ស្របច្បាប់​នៅ​ប្រទេស​ជប៉ុន​ជា​លើកដំបូង​នៅ​ដើម​ឆ្នាំក្រោយ

ភ្នំពេញ ​៖ ​ជប៉ុន​គ្រោង​នឹង​ជ្រើសរើស​យុវជន​វ័យក្មេង​កម្ពុជា​ដែល​មាន​ទេស​កោសល្យ​ទៅ​ធ្វើការ​ស្របច្បាប់​នៅ​ប្រទេស​ជប៉ុន​ជា​លើកដំបូង​ នៅ​ដើមឆ្នាំ​ក្រោយនេះ​ដើម្បី​បង្កើន​ប្រាក់ចំណូល​ខ្ពស់​ជួយ​លើកស្ទួយ​ដល់​ជីវភាព​រស់នៅ​ឲ្យ​កាន់តែ​ប្រសើរ​ថែមទៀត​។

លោក Yohei Shibasaki នាយក​ប្រតិបត្តិ​នៃ​ក្រុមហ៊ុន Fourth Valley Concierge​បាន​មានប្រសាសន៍ថា​នៅ ដើមឆ្នាំ​២០១៩​ខាងមុខនេះ​ក្រុមហ៊ុន​របស់​លោក​នឹង​ចាប់ផ្តើម​សាងសង់​មជ្ឈមណ្ឌល​ជប៉ុន​នៅ​រាជធានី​ភ្នំពេញ​និង​ជ្រើសរើស​និស្សិត​និង​យុវជន​វ័យក្មេង​កម្ពុជា​ប្រមាណ​ពី​៣០​ទៅ​៥០​នាក់​ដំបូង​យក​មក​បណ្តុះបណ្តាល​ដើម្បី​បញ្ជូន​ទៅ​ធ្វើ​ការ​នៅ​ក្រុមហ៊ុន​SONY ,​ក្រុមហ៊ុន PANASONIC ,​ក្រុមហ៊ុន HONDA និង​ក្រុមហ៊ុន​TOYOTA​ជាដើម​ដោយ​ស្របច្បាប់​នៅ​ប្រទេស​ជប៉ុន​។

ថ្លែងប្រាប់​អ្នកសារព័ត៌មាន​ក្រោយ​ជំនួប​ជាមួយ​លោក បណ្ឌិត អ៊ិត សំហេង រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ​កាលពី​រសៀល​ថ្ងៃទី​៣០ ​ខែតុលា ​ឆ្នាំ​២០១៨ ​នៅ​ទីស្តីការ​ក្រសួង លោក Yohei Shibasaki បាន​បន្ត​ថា ​ពលករ​ខ្មែរ​ដែល​ទៅធ្វើ​ការ​នៅ​ជប៉ុន​នឹង​ទទួល​បាន​លក្ខខណ្ឌ​ការងារ អត្ថប្រយោជន៍​ផ្សេងៗ​និង​ប្រាក់ខែ​ខ្ពស់​ចាប់ពី​ជាង​២​ពាន់​ទៅជា​ង​៤​ពាន់​ដុល្លារ​ក្នុង​១​ខែ​ដូចជា​ប្រជាជន​ជប៉ុន​ដែរ​។

លោក​បាន​បន្ត​ថា ​ក្រុមហ៊ុន​របស់លោក​មានប​ទ​ពិសោធន៍​ខាង​ការងារ​នេះ​នៅ​តាម​ប្រទេស​អាស៊ី​១០​ឆ្នាំ​មក​ហើយ​ដែល​បា​ន​បញ្ជូន​និស្សិត​និង​យុវជន​វ័យក្មេង​ទៅធ្វើ​ការ​នៅ​ជប៉ុន​ដោយ​ទទួល​បាន​ប្រាក់ខែ​ខ្ពស់​ហើយ​ក្រុមហ៊ុន​ក៏​ចង់​បញ្ជូន​យុវជន​វ័យក្មេង​កម្ពុជា​ទៅ​ធ្វើ​ការ​នៅ​ជប៉ុន​ដែរ​ព្រោះថា​ពួកគេ​ក៏​មាន​សមត្ថ​ភាព​ខ្ពស់​ដូច​យុវជន​នៅ​ពិភពលោក​ដែរ​ឲ្យ​ទទួល​បាន​ការងារ​ល្អៗ​នៅ​ជប៉ុន​និង​ដើម្បី​លើកទឹកចិត្ត​ឲ្យ​ក្មេងៗ​ខិតខំ​រៀនសូត្រ​កាន់តែខ្លាំង​ថែមទៀត​។

លោក​បាន​បន្ថែម​ថា​ និស្សិត​ ឬ​ យុវជន ​ដែល​ត្រូវ​ទៅ​ធ្វើការ​ស្របច្បាប់​នៅ​ជប៉ុន​ត្រូវ​រៀន​ចប់​មហាវិទ្យាល័យ​មាន​ជំនាញ​ច្បាស់លាស់​ដូចជា​ផ្នែក​ព័ត៌មានវិទ្យា វិស្វកម្ម សេវាកម្ម ទេសចរណ៍ សណ្ឋាគារ និង​បដិសណ្ឋារកិច្ច​។

លោក​បាន​បញ្ជាក់​ថា ​ប៉ុន្តែ​មុននឹង​ប​ញ្ជួ​ន​ទៅ​ជប៉ុន​ក្រុមហ៊ុន​នឹងធ្វើ​ការ​បំពាក់​បំប៉ន​ជា​មុនសិន​ទៅលើ​ភាសា​ជប៉ុន ដោយ​បណ្តុះបណ្តាល​ភាសា​ជប៉ុន​ចាប់ពី​៣​ទៅ​៦​ខែ​សម្រាប់​អ្នកចេះ​ខ្លះៗ​និង​ចាប់ពី​៦​ខែ​ទៅ​១០​ខែ​សម្រាប់​អ្នក​ដែល​អត់​ចេះ​ភាសា​ជប៉ុន​សោះតែ​ម្តង និង​ជំនាញ​ផ្សេងៗ​ព្រមទាំង​លក្ខខណ្ឌ​ការងារ​ជាដើម​។

លោក​បាន​ឲ្យ​ដឹង​ទៀតថា​ ការ​បំពាក់​បំប៉ន ការរៀបចំ​ឯកសារ​ផ្សេងៗ ការធ្វើដំណើរ​រួម​ទាំង​ទទួល​បាន​ទិដ្ឋាការ​ការងារ​ស្រ​ច្បាប់​ទៅ​ធ្វើ​ការ​នៅ​ជប៉ុន​គឺ​ក្រុមហ៊ុន​មិន​គិត​កម្រៃ​ទេ​តែ​ក្រុមហ៊ុន​នឹង​គិត​ថវិកា​ពី​ក្រុមហ៊ុន​ទទួល​ពលករ​នៅ​ជប៉ុន​វិញ​។

លោក បណ្ឌិត ​អ៊ិត ​សំហេង រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ​បាន រីករាយ​ស្វាគមន៍ និង​គាំទ្រ​ចំពោះ​សំណើ​នេះ ប៉ុន្តែ​លោក​រដ្ឋមន្ត្រី​ស្នើ​ដល់​ក្រុមហ៊ុន ត្រូវ​រៀបចំ​ឯកសារ​តាម​នីតិវិធី​ដែល​តម្រូវ​ទៅតាម​ច្បាប់​ជាមុនសិន​។

លោក​រដ្ឋមន្ត្រី​មានប្រសាសន៍ថា រដ្ឋាភិបាល​កម្ពុជា​រីករាយ និង​ស្វាគមន៍​ចំពោះ​កិច្ច​សហប្រតិបត្តិការ ជាមួយ​រដ្ឋាភិបាល​ជប៉ុន ដែល​មកដល់ពេលនេះ​កម្ពុ​ជា​មាន​ក្រុមហ៊ុន​សហគ្រាស​ជាច្រើន របស់​ជប៉ុន ចូល​មក​វិនិយោគ​នៅ​កម្ពុជា​។ រីឯ​ខាង​ផ្នែក​វិស័យ​ការងារ​វិញ កម្ពុជា​ក៏បាន​បញ្ជូន​កម្មសិក្សាការី​ទៅ​ធ្វើ​ការ​នៅ​ជប៉ុន​ក៏​ច្រើន​ដែរ មកដល់ពេលនេះ​កម្មសិក្សាការី​កម្ពុ​ជា​មាន​ប្រហែល​ជាង​៨​ពាន់​នាក់​កំពុង​ធ្វើ​កម្មសិក្សា​នៅ​ទីនោះ ដែល​នៅ​ជប៉ុន​មាន​កម្លាំង​ពលកម្ម​ច្រើន​ទាក់ទង​ទៅនឹង​ឧស្សាហកម្ម កសិកម្ម សេវាកម្ម និង​ថែទាំ​មនុស្ស​ចាស់​ជាដើម​។



លោក​ង៉ុ​យ រិ​ទ្ធ នាយករង​ខុទ្ទកាល័យ​ក្រសួង​ការងារ​និង​បណ្តុះបណ្តាល​វិជ្ជាជីវៈ​បាន​ឲ្យ​ដឹង​ថា តាមរយៈ​ក្រុមហ៊ុន​នេះ​យុវជន និស្សិត​កម្ពុជា នឹង​ទទួល​បាន​នូវ ឱកាស​ចេញទៅ​ធ្វើការ​នៅ​ជប៉ុន ជាមួយ​ក្រុមហ៊ុន​ធំៗ រយៈពេល​ពី​៥​ទៅ​១០​ឆ្នាំ​ដែល​នេះ​ជា ឱកាស​ដែល​យើង​មិន​ធ្លាប់មាន​ពីមុន ដែល​ពីមុន​កម្ពុជា​បញ្ជូន​ត្រឹម​ជា​សិក្ខាកាម ឬ​ជា​អ្នក​ហាត់​ការ​ទេ មិនទាន់​បានទទួល​ទិដ្ឋការ​ការងារ​នៅឡើយ​ទេ ប៉ុន្តែ​ក្រុមហ៊ុន​នេះ​ផ្តល់ ឱកាស​ឲ្យ​យុវជន​កម្ពុជា​ទទួលបាន​នូវ​ទិ​ដ្ឋ​ការ​ការងារ​តែម្តង ធ្វើការ​បាន​រហូត​ពី​៥​ទៅ​១០​ឆ្នាំ​ឯណោះ​។

​លោក​បាន​បន្ត​ថា ​ពេល​ដែល​យុវជន​កម្ពុជា​បាន​ទៅ​ធ្វើ​ការ​ជាមួយ​ក្រុមហ៊ុន​ល្បីៗ ពួកគេ​នឹងមាន​សមត្ថភាព​កាន់តែ​ខ្ពស់ ហើយ​ពេល​ត្រឡប់មកវិញ​មក​បម្រើ​ការងារ​ឲ្យ​ក្រុមហ៊ុន​ជប៉ុន​នៅក្នុង​ប្រទេស​កម្ពុ​នឹង​អាច​ទាក់ទាញ​ក្រុមហ៊ុន​ពី​ជប៉ុន​មក​បណ្តាក់​ទុន​នៅ​កម្ពុជា​កាន់តែច្រើន​និង​បង្កើត​ឱកាស​ការងារ​ដល់​យុវជន​កាន់តែ​សម្បូរបែប​ថែមទៀត​។

គួរ​បញ្ជាក់​ថា​បច្ចុប្បន្ន​នេះ​មាន​ពលករ​បរទេស​កំ​ពុង​ធ្វើ​ការងារ​នៅ​ប្រទេស​ជប៉ុន​ចំនួន​១​លាន​២​សែន​នាក់​ក្នុង​នោះ​មាន​២៤​ម៉ឺន​នាក់​ធ្វើការ​ដោយមាន​ទិដ្ឋាការ​ការងារ​។​រីឯ​ប្រទេស​កម្ពុ​ជា​មាន​កម្មសិក្សាការី​ ឬ ​សិក្ខាកាម ឬ​អ្នក​ហាត់​ការ ជាង​៨​ពាន់​នាក់​ដោយ​ធ្វើការ​ទៅលើ​វិស័យ​ឧស្សាហកម្ម កសិកម្ម សេវាកម្ម និង​ថែទាំ​មនុស្ស​ចាស់​ជាដើម​៕

Source: Kampuchea Thmey Daily