ភ្នំពេញ ៖ យុវជន២នាក់ ត្រូវបានកម្លាំងសមត្ថកិច្ចប៉ុស្តិ៍រដ្ឋបាលនៃអធិការខណ្ឌដូនពេញចាប់ឃាត់ខ្លួន ខណៈហៅឆែកឆេរឃើញលាក់ទុកថ្នាំញៀននៅថ្ងៃអង្គារ៍ ៦រោច ខែអស្សុជ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី៣០ ខែតុលា ឆ្នាំ២០១៨ វេលាម៉ោង១៦ និង៣០នាទីនៅចំណុចផ្លូវលេខ៩០។
មន្ត្រីនគរបាលមូលដ្ឋានបានឲ្យដឹងថា កម្លាំងផ្នែកជំនាញខណ្ឌនិងប៉ុស្តិ៍បានសហការគ្នាចេញល្បាតតាមគោលដៅនិងតាមបណ្តាភូមិសាស្ត្រសង្កាត់ទាំង១១ប៉ុស្តិ៍ដូចសព្វដង លុះមកដល់ចំណុចផ្លូវលេខ៩០ កែងផ្លូវព្រះស៊ីសុវត្ថិ ភូមិ១១ សង្កាត់ស្រះចក បានឃើញសមាសភាពសង្ស័យចំនួន០២នាក់ ក៏ឃាត់ធ្វើការត្រួតពិនិត្យ នឹងបានរកឃើញក្រាមពណ៌ សថ្លាសង្ស័យជាសារធាតុញៀនចំនួន១កញ្ចប់ ភ្លាមនោះសមត្ថកិច្ចយើងក៏បានឃាត់ខ្លួនជនសង្ស័យខាងលើតែម្តង។
សមត្ថកិច្ចបញ្ជាក់ទៀតថា ជនសង្ស័យទាំង២នាក់នេះទី១.ឈ្មោះ ស៊ឹម អ៊ុលឡាវី ភេទប្រុស អាយុ២៩ឆ្នាំ ជនជាតិខ្មែរ-ឥស្លាម មុខរបរ នៅផ្ទះ ស្នាក់នៅភូមិច្រករមៀត ឃុំឈូកសរ ស្រុកកំពង់ត្រឡាច ខេត្តកំពង់ឆ្នាំង (ឃាត់ខ្លួន)ទី២.ឈ្មោះ ហ៊ីម នោវ៉ាន់ ភេទប្រុស អាយុ៣០ឆ្នាំ ជនជាតិខ្មែរ-ឥស្លាម មុខរបរ ជាងដែក ស្នាក់នៅភូមិច្រករមៀត ឃុំឈូកសរ ស្រុកកំពង់ត្រឡាច ខេត្តកំពង់ឆ្នាំង (ឃាត់ខ្លួន)។
ចំណែកវត្ថុតាងចាប់យកបានមាន ក្រាមពណ៌សថ្លា សង្ស័យជាគ្រឿងញៀនចំនួន០១កញ្ចប់តូច និងទូរស័ព្ទដៃមួយគ្រឿងម៉ាក OPPO ពណ៌ខ្មៅ(ជារបស់ជនសង្ស័យឈ្មោះ ហ៊ីម នោវ៉ាន់)និងម៉ូតូមួយគ្រឿងម៉ាក HONDA DREAM 125 ពណ៌ខ្មៅ និងទូរស័ព្ទដៃមួយគ្រឿងម៉ាក SAMSUNG ពណ៌ទឹកមាស(ជារបស់ជនសង្ស័យឈ្មោះ ស៊ឹម អ៊ុលឡាវី)។
សមត្ថកិច្ចបញ្ជាក់ទៀតថា ចំពោះមុខ ផ្នែកជំនាញខណ្ឌប៉ុស្តិ៍បាននឹងកំពុងប្រើប្រាស់វិធានការជំនាញសួរចម្លើយ ដើម្បីបន្តយកបក្ខពួកក្នុងការចរាចរណ៍ជួញដូរ នឹងអនុវត្តន៍តាមនីតិវិធីបញ្ជូនសំណុំរឿងទៅតុលាការ៕
Source: Kampuchea Thmey Daily
0 Comments