អនុវត្ត​ទោស​លើ​ស្ត្រីជន​ជាតិចិន​ដែល​បើករថយន្ត​បំ​បុក​ចោរ​ស្លាប់​ដាក់​ពន្ធនាគារ​៣​ខែ​ និង​សង​ប្រាក់​ជាង​២​ម៉ឺន​ដុល្លារ

ភ្នំពេញ ៖ ទីបំផុត​ស្ត្រីជន​ជាតិចិន​ដែល​បើករថយន្ត​បំ​បុក​ចោរឆក់​ទូរស័ព្ទ​បណ្តាល​ឲ្យ​ស្លាប់​ម្នាក់​និង​របួសធ្ងន់​ម្នាក់​ ត្រូវ​បាន​ចៅក្រម​សាលាដំបូង​រាជធានី​ភ្នំពេញ លោក គី រិទ្ធី ប្រកាស​សាលក្រម​សម្រេច​ផ្ដន្ទាទោស​២​ឆ្នាំ តែ​អនុវត្ត​ទណ្ឌកម្ម​ទោស​ត្រឹម​៣​ខែ និង​ពិន័យ​ជា​ប្រាក់​៤​លាន​រៀល​ក្រោម​ការចោទប្រកាន់​ពី​បទ​ហិង្សា​ចេតនា​មាន​ស្ថាន​ទម្ងន់ទោស ដោយ​មរណភាព​នៃ​ជនរងគ្រោះ និង​បទ​បើកបរ​គ្មាន​ប័ណ្ណបើកបរ។

ជា​មួយ​គ្នា​នេះ​ តុលាការ​បានសម្រេច​បង្គាប់​ឲ្យ​ជនជាប់ចោទ​សង​ទៅ​គ្រួសារ​សព​ចំនួន​១​ម៉ឺន​ដុល្លារ និង​ជំងឺ​ចិត្ត​ចំនួន​៣០​លាន​រៀល។ ឲ្យ​សង​ទៅ​អ្នករបួស​ចំនួន​១៤ ០០០​ដុល្លារ និង​ជំងឺ​ចិត្ត​ចំនួន៣០​លាន​រៀល។

សេចក្ដីសម្រេច​នេះ​ធ្វើឡើង​ក្រោយពី​ក្រុមប្រឹក្សា​ជំនុំ​ជំ​រះ​បាន​បើកសវនាការ​នា​ល្ងាច​ថ្ងៃទី ៣១​តុលា ឆ្នាំ​២០១៨ នៅ​ចំពោះមុខ​ជនជាប់ចោទ​ឈ្មោះ ថា​ង យៀន អាយុ​២៦​ឆ្នាំ។

នៅក្នុង​សវនាការ ជនជាប់ចោទ​បាន​សារភាព​ថា ​នៅ​ថ្ងៃ​កើតហេតុ​ទី ១២​សីហា ឆ្នាំ​២០១៨ វេលា​ម៉ោង​ប្រហែល​២៣ នាង​មាន​មិត្ត​ភ័​ក្រ​ម្នាក់ទៀត​បាន​អង្គុយ​រង់ចាំ​មិត្តភ័ក្រ​នៅក្នុង​រថយន្ត​លុចស៊ីស ដោយ​បើក​បង្អួច​រថយន្ត ពេលនោះ​ស្រាប់​តែ​មាន​ចោរឆក់​២​នាក់​បាន​ជិះ​ម៉ូតូ​មកដល់​បាន​ឆក់​យក​ទូរស័ព្ទ​ដៃ​របស់​នាង​ទៅ​បាត់។ ឃើញ​ដូច្នោះ​នាង​ក៏​បើករថយន្ត​ដេញ​តាម​ក្នុង​គោល​បំពង​តាម​យក​ទូរស័ព្ទ​វិញ ពេលនោះ​ចោរ​ជិះ​ម៉ូតូ​ដល់​ផ្លូវ​ទាល់ រថយន្ត​នាង​ក៏​បុក​ពី​ចំហៀង​ខាងមុខ​បណ្ដាល​ឲ្យ​ម៉ូតូ​ដួល ហើយ​នាង​ក៏​ចុះទៅ​រើស​យក​ទូរស័ព្ទ​វិញ​តែ​វា​បែក​អស់ហើយ។

ក្នុង​សវនាការ​នេះ​ផង​ដែរ មេធាវី​តំណាង​ឲ្យ​ចោរឆក់​ដែល​ស្លាប់​បាន​ទាមទារ​សំណង​ចំនួន​៣​ម៉ឺន​ដុល្លារ។ ចំណែក​មេធាវី​តំណាង​ឲ្យ​ចោរឆក់​ដែល​រងរបួស​បានទាមទា​រ​សំណង​ចំនួន​៥​ម៉ឺន​ដុល្លារ។

គួរ​រំលឹក​ថា លោក ធា​ម ច័ន្ទ​ពិសិដ្ឋ បានសម្រេច​កាលពី​ល្ងាច​ថ្ងៃទី ១៦​សីហា ឆ្នាំ​២០១៨​ដាក់​ឃុំខ្លួន​ជា​បណ្ដោះអាសន្ន​លើ​ស្ត្រីជន​ជាតិចិន​ឈ្មោះ ថា​ង យៀន​ក្រោម​ការចោទប្រកាន់​ពី​បទ បើកបរ​គ្មាន​ប័ណ្ណបើកបរ និង​បទ​ហិង្សា​ដោយ​ចេតនា​មាន​ស្ថាន​ទម្ងន់ទោស ដោយ​មរណភាព​នៃ​ជនរងគ្រោះ។

នគរបាល​បាន​បញ្ជាក់​ថា បទល្មើស​ដែល​ព្រះរាជអាជ្ញា​ចោទ​ប្រ​កាន់ ហើយ​ចៅក្រម​សម្រេច​ឃុំខ្លួន​រួមមាន បទល្មើស​ហិង្សា​ដោយ​ចេតនា​មាន​ស្ថាន​ទម្ងន់​ទោស​ដោយ​មរណភាព​នៃ​ជនរងគ្រោះ​តាម​មាត្រា​២២៤​នៃ​ក្រម​ព្រហ្ម​ទ​និង​បទ​បើកបរ​ដោយមាន​មាន​ប័ណ្ណបើកបរ។

ជន​ត្រូវ​ចោទ​ត្រូវ​បាន​នគរបាល​ខណ្ឌចំការមន​បញ្ជូន​ឡើង​តុលាការ​ល្ងាច​ថ្ងៃទី ១៥​សីហា ឆ្នាំ២០១៨​នេះ។

នគរបាល​ព្រហ្មទណ្ឌ​ខណ្ឌចំការមន​បាន​សរសេរ​របាយការណ៍​សន្និដ្ឋាន​ថា ស្ត្រីជន​ជាតិចិន រូបនេះ ប្រឈម​បទល្មើស​មនុស្សឃាត​ដោយ​អ​ចេតនា​ប៉ុណ្ណោះ​នា​គ្រា​ដំបូង តែ​ក្រោយពី​សាកសួរ​រួច កញ្ញា វ៉ា សក្ដា ព្រះរាជអាជ្ញា​រង​អម​តុលាការ​បាន​សម្រេច​ចោទប្រកាន់​រហូតដល់​៣​បទល្មើស។

តាម​របាយការណ៍​អគ្គស្នងការដ្ឋាន​នគរ​បាល​ជាតិ ចេញផ្សាយ​នៅ​ព្រឹក​ថ្ងៃទី​១៥ ខែសីហា នេះ​បាន​បញ្ជាក់​ថា ​នៅ​ថ្ងៃអាទិត្យ ទី​១២ ខែសីហា ឆ្នាំ​២០១៨ វេលា​ម៉ោង​២៤និង១០​នាទី មាន​ករណី​មនុស្សឃាត​ដោយ​អ​ចេតនា (​បើករថយន្ត​ដេញ​បុក​ជនសង្ស័យ​ឆក់​ទូរស័ព្ទដៃ​ស្លាប់​-​របួស​) នៅ​ចំណុច​ផ្លូវ​លេខ​១២៣ កែង​ផ្លូវ​លេខ​៤៥៦ មុខផ្ទះ​លេខ​៥៤ ក្រុម​២២ ភូមិ​៤ សង្កាត់​ទួល ទំពូង​១ ខណ្ឌចំការមន រាជធានី​ភ្នំពេញ អ្នករងរបួស​ធ្ងន់ ប្រុស​ម្នាក់ និង​ស្លាប់​ប្រុស​ម្នាក់ ជា​ជនសង្ស័យ​ឆក់​ទូរស័ព្ទដៃ​។

ជនសង្ស័យ​ឈ្មោះ សារុន ពិសិដ្ឋ ភេទ​ប្រុស អាយុ​២៨ ឆ្នាំ មុខរបរ​នៅផ្ទះ ស្នាក់​នៅផ្ទះ​លេខ ២៥០ ផ្លូវ​លេខ​៤៦០ ក្រុម​២២ ភូមិ​៤ សង្កាត់​ទួល​ទំពូង​១ ខណ្ឌចំការមន រង​របួស​ធ្ងន់​កំពុង​ព្យាបាល​នៅ​មន្ទីរពេទ្យ​មិត្តភាព​ខ្មែរ​-​សូ​វៀត និង ឈ្មោះ បេ សុភា​ដេវីត ភេទ ប្រុស អាយុ​២៤ មុខរបរ នៅផ្ទះ ស្នាក់​នៅផ្ទះ​លេខ​៣២A ផ្លូវ​លេខ​២៨០ ក្រុម ៤៣ ភូមិ ៥ សង្កាត់​បឹង​កេងកង​២ ខណ្ឌចំការមន រង​របួស​ធ្ងន់​បាន​ស្លាប់​នៅ​មន្ទីរពេទ្យ​មិត្តភាព​ខ្មែរ​-​សូ​វៀត​។



ស្ត្រី​ចិន​ដែក​ត្រូវ​ឃាត់ខ្លួន​បញ្ជូន​ឡើង​តុលាការ​ឈ្មោះ YUAN TANG ថា​ង យៀន ភេទ​ស្រី អាយុ​២៦​ឆ្នាំ ជនជាតិ​ចិន មុខរបរ​លក់ដូរ ស្នាក់នៅ​ផ្ទះ​ជួល​គ្មាន​លេខ ផ្លូវលំ សង្កាត់​ទឹកថ្លា ខណ្ឌ​សែន​សុខ មិន​ចាំ​លេខ​លិខិតឆ្លងដែន មិនបាន​យក​មក​តាម​ខ្លួន​ជា​អ្នក​បើករថយន្ត។

វត្ថុតាង​ដកហូត ម៉ូតូ ០១​គ្រឿង​ម៉ាក​SCOOPY ពណ៌​ស ស្លាក​លេខ ភ្នំពេញ​1CL-7241 ( របស់​អ្នក​ឆក់​ទូរស័ព្ទ​ដៃ​ខូចខាត​យ៉ាងដំណំ ) , រថយន្ត​ម៉ាក​LEXUS RX-300 ពណ៌​ស ស្លាក​លេខ 2AN-9745 ភ្នំពេញ ( ខូចខាត​ដូចគ្នា ) និង​ទូរស័ព្ទ​ដៃ​០១ គ្រឿង ម៉ាក Meitu ពណ៌​ខ្មៅ​-​បៃតង លេខ​ស៊ីម 096 696 7899 ( បែក​អេក្រង់ របស់​ជនសង្ស័យ បើកឡាន​បុក )។

ចំពោះ​រឿងហេតុ មុនដំបូង​ឈ្មោះ សារុន ពិសិដ្ឋ និង​ឈ្មោះ បេ សុភា​ដេវីត បាន​ជិះ​ម៉ូតូ ០១ គ្រឿង​ខាងលើ ឌុប​គ្នា មកដល់​ចំណុច​មុខ​ផ្ទះ​កើតហេតុ​ខាងលើ ឃើញ​ស្ត្រី​ជាតិចិន និង​មិត្ត​ភ័​ក្រ​ម្នាក់ទៀត ឈប់​រថយន្ត​តេ​ទូរស័ព្ទ ចំហ​កញ្ចក់ ខាងមុខ​ផ្នែក​ខាងឆ្វេង ហើយ​ឈ្មោះ សារុន ពិសិដ្ឋ និង​ឈ្មោះ បេ សុភា​ដេវីត ក៏​ធ្វើ​សកម្មភាព​ឆក់ យក​ទូរស័ព្ទដៃ ជន ជាតិ ចិន​ឈ្មោះ Yuan Tang បានសម្រេច រួច បើក​ម៉ូតូ​គេចខ្លួន​។

ភ្លាម​នោះ​ស្ត្រី​ជាតិចិន​ឈ្មោះ Yuan Tang ដែលជា ម្ចាស់ ទូរស័ព្ទ បាន​បើករថយន្ត​ដេញ​តាម​បុក​ម៉ូតូ ពីក្រោយ​បណ្តាល​ឲ្យ ដួល​ខ្ទាត់​ទៅ​ក្បែរ​ជញ្ជាំង​របង​ផ្ទះ​លេខ​៣៩ ផ្លូវ​លេខ ១២៣ កែង ផ្លូវ​លេខ​៤៥៦ បណ្តាល​ឲ្យ​រង​របួស​ធ្ងន់ធ្ងរ ត្រូវ​បាន​សមត្ថកិច្ច​បញ្ជូន​ទៅ​សង្គ្រោះ​បន្ទាន់​តាម​រថយន្ត​សង្គ្រោះបន្ទាន់ ទៅ​មន្ទីរ ពេទ្យ​មិត្ត ភាព​ខ្មែរ​-​រុស្ស៊ី។

លុះដល់​ម៉ោង ០២.៥០ រំលង​អធ្រាត្រ ចូល​ដល់​ថ្ងៃទី ១៣ ខែសីហា ឆ្នាំ​២០១៨ អ្នក​ឆក់​ទូរស័ព្ទ​ឈ្មោះ បេ សុភា​ដេវីត បាន​ស្លាប់បាត់​បង់ជីវិត​នៅ​មន្ទីរ​ពេទ្យ​រុស្ស៊ី សព​តម្កល់​រង់ចាំ​ក្រុម​គ្រួសារ​មក​ទទួល។

ចំណែក​អ្នក​ឆក់​ម្នាក់ទៀត​ឈ្មោះ សារុន ពិសិដ្ឋ សន្លប់​មិនទាន់​ដឹងខ្លួន កំពុង​សង្គ្រោះ​បន្ទាន់​នៅ​មន្ទីរពេទ្យ​មិត្តភាព​ខ្មែរ​-​រុស្ស៊ី ឥឡូវនេះ​លឺថា ​ព្រះរាជអាជ្ញា​បាន​អនុញ្ញាត​ឲ្យ​សាច់ញាតិ​នាំ​ជនសង្ស័យ​នេះ​ទៅ​ព្យាបាល​នៅ​ប្រទេស​វៀតណាម​ហើយ៕

Source: Kampuchea Thmey Daily