ភ្នំពេញ ៖ អង្គសន្និសីទអន្តរជាតិស្តីពី”៤០ឆ្នាំ នៃកិច្ចសហប្រតិបត្តិការ អាស៊ានសហភាពអឺរ៉ុប សមិទ្ធផល និង មាគ៌ាឆ្ពោះទៅមុខ ”ត្រូវបានរៀបចំឡើងដោយវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជានិងឧបត្ថម្ភដោយ មូលនិធិ ខុនរ៉ាដ អាដិនណៅអ៊ែរ ប្រចាំកម្ពុជាក្នុងគោលបំណង រំឭកខួបអនុស្សាវរីយ៍ខួបលើកទី៤០ នៃកិច្ចសហប្រតិបត្តិការរវាងអាស៊ាននិងសហភាពអឺរ៉ុប។
សន្និសីទអន្តរជាតិនេះ ប្រមូលផ្តុំគ្នារវាងអ្នកស្រាវជ្រាវ អ្នកការទូត អ្នករៀបចំគោលនយោបាយនិងអ្នកពាក់ព័ន្ធផ្សេងទៀត ធ្វើការរួមគ្នាក្នុងគោលបំណងពិនិត្យមើលសមិទ្ធផលសំខាន់ៗចំណុចខ្លាំង ចំណុចខ្សោយ ភាពជោគជ័យនិងចំណុចខ្វះខាត នៃកិច្ចសហប្រតិបត្តិការរវាងអាស៊ាន និងសហភាពអឺរ៉ុប ក្នុងរយៈពេល៤០ឆ្នាំមកនេះ និងប្រមូលផ្តុំគំនិត បទពិសោធន៍ អនុសាសន៍ និងយុទ្ធសាស្ត្រសម្រាប់កិច្ចសហប្រតិបត្តិការតំបន់ សន្តិភាព ភាពសុខដុមនិងវិបុលភាព និងដើម្បីផ្តល់ចក្ខុវិស័យសម្រាប់កិច្ចសហប្រតិបត្តិការអាស៊ាន សហភាពអឺរ៉ុប នាពេលអនាគត។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាបានមានប្រសាសន៍ថា ប្រធានបទសំខាន់លើទិដ្ឋភាពបីនឹងត្រូវលើកយកមកបង្ហាញនូវក្នុងអង្គសន្និសីទរួមមានទី១ កិច្ចសហប្រតិបត្តិការនយោបាយនិងសន្តិសុខ ទី២ សហប្រតិបត្តិការសេដ្ឋកិច្ចនិងទី៣កិច្ចសហប្រតិបត្តិការសង្គមវប្បធម៌និងការតភ្ជាប់។ វិទ្យាស្ថានទំនាក់ទំនងអន្តរជាតិកម្ពុជាបានអញ្ជើញវាគ្មិននិងអ្នកពិភាក្សាមកពីបណ្តាប្រទេសអាស៊ាននិងសហភាពអឺរ៉ុប ឥស្សរជននិងអ្នកស្រាវជ្រាវកម្ពុជាដើម្បីចែករំលែកចំណេះដឹងនិងទស្សនៈរបស់ពួកគេលើទិដ្ឋភាពទាំងបីខាងលើនេះ។
ជាមួយគ្នានេះតំណាងក្រសួងការបរទេសនិងសហប្រតិបត្តិការអន្តរជាតិនៃព្រះរាជាណាចក្រកម្ពុជា តំណាងអគ្គលេខាធិការអាស៊ាន ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា និងឯកអគ្គរដ្ឋទូតសហភាពអឺរ៉ុបប្រចាំកម្ពុជា ក៏បានអញ្ជើញចូលរួមនិងថ្លែងសន្ទរកថាគន្លឹះបើកអង្គសន្និសីទអន្តរជាតិនេះផងដែរ។
លោកបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជាដែលបានអញ្ជើញចូលរួមបើកអង្គសន្និសីទនេះបានមានប្រសាសន៍ថា សន្និសីទនេះពិតជាបានរំលេចឡើងនូវសារៈសំខាន់ និងកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការធ្វើសមាហរណកម្មតំបន់របស់ខ្លួន ក៏ដូចជាបានធ្វើការពិចារណាអំពីសារៈសំខាន់នៃសមាគមតំបន់នានា ពិសេសនៅពេលនេះ គឺសមាគមប្រជាជាតិអាស៊ីអាគ្នេយ៍ហៅកាត់ថា”អាស៊ាន”។
សន្និសីទនេះក៏បានឆ្លុះបញ្ចាំងនូវសារៈសំខាន់នៃទំនាក់ទំនងរវាងកម្ពុជានិងអាស៊ាន និងរវាងកម្ពុជានិងសហភាពអឺរ៉ុប ដោយស្របនឹងគោលនយោបាយរបស់រាជរដ្ឋាភិបាលកម្ពុជាក្នុងការធ្វើសមាហរណកម្មក្នុងតំបន់និងពិភពលោក។
លោកបណ្ឌិតសភាចារ្យ ប្រធានបានរំលឹកឲ្យដឹងថា ចាប់តាំងពីឆ្នាំ២០១២-២០១៧ សហភាពអឺរ៉ុបនិងអាស៊ាន បានរួមចំណែកផ្ដួចផ្ដើមគំនិតក្នុងការរៀបចំយន្តការនានា ដើម្បីទប់ស្កាត់បញ្ហាប្រឈមនឹងសន្តិសុខតំបន់ និងពិភពលោក ដូចជាសន្តិសុខ លំហសមុទ្រ សន្តិសុខបច្ចេកវិទ្យា ការប្រឆាំងភេរវកម្ម សិទ្ធិមនុស្ស ការរីកសាយភាយអាវុធប្រល័យលោក និងឧក្រិដ្ឋកម្មឆ្លងដែនជាដើម។
លើសពីនេះទៅទៀត តាមរយៈកិច្ចសហប្រតិបត្តិការតំបន់នេះ អាស៊ាន -សហភាពអឺរ៉ុប ក៏បានទទួលស្គាល់គ្នាថា ជាដៃគូពាណិជ្ជកម្មដ៏សកម្មមិនអាចខ្វះបាន។អាស៊ានបានចាត់ទុកសហភាពអឺរ៉ុបជាដៃគូពាណិជ្ជកម្មដ៏ធំលំដាប់លេខ២របស់ខ្លួន ហើយសហភាពអឺរ៉ុបវិញក៏បានចាត់ទុកថា អាស៊ានគឺជាដៃគូពាណិជ្ជកម្មដ៏ធំលំដាប់លេខ៥របស់ខ្លួនផងដែរ។
ពាណិជ្ជកម្មរវាងតំបន់ទាំងពីរបានកើនឡើងគួរឲ្យកត់សំគាល់ក្នុងរយៈពេលប៉ុន្មានទសវត្សរ៍ចុងក្រោយនេះ ជាក់ស្តែងក្នុងឆ្នាំ២០១៧ អាស៊ានបាននាំចេញទៅកាន់អឺរ៉ុប ប្រមាណជា ១៣៦ពាន់លានអឺរ៉ូ ហើយសហភាពអឺរ៉ុបបាននាំចេញទៅកាន់អាស៊ានប្រមាណជា ៩១ពាន់លានអឺរ៉ូ។
លើសពីនេះសហភាពអឺរ៉ុបជាដៃគូវិនិយោគផ្ទាល់ពីបរទេស(FDI) ដ៏ធំរបស់អាស៊ាន ដែលមានទឹកប្រាក់រហូតដល់២៦៣ពាន់លានអឺរ៉ូ។
ជារួម “ខ្ញុំ យល់ឃើញថា មកទល់នឹងពេលនេះកិច្ចសហប្រតិបត្តិការអាស៊ាន សហភាពអឺរ៉ុប ប្រៀបបាននឹងសំណាញ់អន្តរអាស្រ័យ និងផលប្រយោជន៍រួមកំពុងកើនឡើងដែលផ្តល់ជាមូលដ្ឋានគំរូនៃកិច្ចសហប្រតិបត្តិការតំបន់និងពិភពលោក។ ការណ៍នេះពង្រីកឲ្យមានការយោគយល់គ្នាកាន់តែច្រើនឡើង ពាណិជ្ជកម្មពិភពលោកកាន់តែរីកធំឡើង ការរក្សាសន្តិសុខនិងសេរីភាព ទាំងនៅលើគោក និងការចូលទៅលំហសមុទ្រ យុទ្ធសាស្ត្រនៃអាស៊ាន សហភាពអឺរ៉ុបកាន់តែល្អប្រសើរ ដែលជាសរសៃឈាមស្លាប់រស់ នៃពាណិជ្ជកម្ម និងជាចរន្តលំហូរនៃកំណើនសេដ្ឋកិច្ចពិភពលោក ហើយក៏ជាចលករប្រកបដោយអានុភាពក្នុងការបង្កើននូវផលប្រយោជន៍រួម និងការទប់ស្កាត់នូវការរីកលូតលាស់នៃបញ្ហាប្រឈមអវិជ្ជមានផ្សេងៗ ដូចជា អសន្តិសុខក្នុងតំបន់ ការរីកសាយអាវុធប្រល័យលោក និងអំពើភេរវកម្មជាដើម”។
លោកបណ្ឌិតសភាចារ្យ សុខ ទូចបាន បញ្ជាក់ថា កម្ពុជាដែលជាសមាជិកអាស៊ាន មានការប្តេជ្ញាចិត្តខ្ពស់ក្នុងការកសាងទំនាក់ទំនងនិងកិច្ចសហប្រតិបត្តិការល្អជាមួយបណ្តាប្រទេសជាមិត្តជុំវិញពិភពលោក និងធ្វើសមាហរណកម្មរបស់ខ្លួនចូលទៅក្នុងតំបន់និងពិភពលោក ដើម្បីរក្សាសុខសន្តិភាព បង្កើនភាពទាក់ទាញវិនិយោគ បើកចំហទីផ្សារ សេដ្ឋកិច្ចសំរាប់កម្ពុជា ឲ្យកាន់តែទូលំទូលាយ ការទាក់ទាញភ្ញៀវទេសចរណ៍ ការពង្រឹងការអនុវត្តលទ្ធិប្រជាធិបតេយ្យនិងការគោរពសិទ្ធិមនុស្ស។
“ខ្ញុំ ជឿជាក់ថា តាមរយៈកិច្ចពិភាក្សា ក្នុងអង្គសន្និសីទអន្តរជាតិស្តីពី”៤០ឆ្នាំនៃកិច្ចសហប្រតិបត្តិការ អាស៊ានសហភាពអឺរ៉ុប សមិទ្ធផលនិងមាគ៌ាឆ្ពោះទៅមុខ” នឹងក្លាយជាសារមួយនៃស្មារតី និង សុឆន្ទៈនៃកិច្ចសហប្រតិបត្តិការអាស៊ាន អឺរ៉ុប ហើយដាស់អង្រួនដល់ប្រជាជាតិទាំងមូលក្នុងតំបន់និងពិភពលោក ឲ្យរួបរួមសាមគ្គីគ្នា ដើម្បីកសាងផែនដីយើងប្រកបដោយ សុខសន្តិភាព សុខដុមនីយកម្ម វិបុលភាព និងការអភិវឌ្ឍន៍ពិតប្រាកដ”៕
Source: Kampuchea Thmey Daily
0 Comments