ឃីម បូរ៉ា ត្រូវ​ធ្លាក់​ហាលអាវ​ជា​ស្ថាពរ ខណៈ សុខ សា​វិ​ន រង់ចាំ​អ៊ុត​ជាមួយ​ សូត្រ ប៊ុន​ធី

ប្រដាល់ ៖ ក្រោយ​បញ្ចប់​ការប្រកួត​ជម្រុះ​ជុំ​ទី​៤ នៃ​ព្រឹត្តិការណ៍​ប្រដាល់​ដណ្ដើម​ខ្សែក្រវាត់​ខា​រ៉ា​បាវ​រដូវ​កាល​ទី​៧ ទម្ងន់​៦០​គីឡូក្រាម​នៅលើ​សង្វៀន​SEA-TV កាលពី​រសៀល​ថ្ងៃទី​២៧ ខែ​តុលា​ ឆ្នាំ​២០១៨​នេះ ឃីម បូរ៉ា អ្នក​ប្រដាល់​កម្ពុជា​ក្លិប​រស្មី​ភូមិ​គាប​ខេត្តបន្ទាយមានជ័យ ត្រូវ​បានដឹង​ច្បាស់​ថា គេ​ជ្រុះ​ធ្លាក់​ជា​ស្ថាពរ​ហើយ បន្ទាប់ពី​ចាញ់​ថៃ Phat Thana នោះ។​

​ចំណែក​ សុខ សា​វិ​ន ក្លិប​ឆ្មា​ស​សែន​សុខ​គុន​ខ្មែរ ដែល​គេ​បាន​វាយ​ឈ្នះ​ថៃ Phat Ngenthong ជាហេតុ​ធ្វើ​ឲ្យ សា​វិ​ន នៅ​រង់ចាំ​អ៊ុត​មើល​លទ្ធផល​ជាមួយ​សូត្រ បុ​ន​ធី ក្លិប​បក្សី​ស្លាប​ដែក ដែលមាន​ពិន្ទុ​ស្មើគ្នា​នោះ ។​

​ឃីម បូរ៉ា ត្រូវ​អ្នក​ប្រដាល់​ថៃ Phat Thana វាយ​ឲ្យ​បោះបង់​ការប្រកួត​ក្នុង​ទឹក​ទី​២ នៅក្នុង​ការប្រកួត​ជម្រុះ​ជុំ​ចុង​ក្រោយនេះ។ បូរ៉ា ត្រូវ​ខូច​ភ្លាត់​ក្បាលជង្គង់​ខាងឆ្វេង ដោយសារ​ការ​ទាត់​ត្រូវ​របស់ Phat Thana។​ ដួល​លើក​ទី​១ ឃីម បូរ៉ា អាច​ក្រោក​បន្ត​ការប្រកួត​បាន ក្រោយពី​អាជ្ញាកណ្ដាល​រាប់​ដល់​៨​នោះ ប៉ុន្តែ​ដួល​លើក​ទី​២ បូរ៉ា ក្រោក​លែង​រួច​តែម្តង ហើយ​បោះបង់ចោល​ការប្រកួត​ដែល​ធ្វើ​ឲ្យ Phat Thana ឈ្នះ​ក្នុង​ទឹក​ទី​២។

​ដូច្នេះ ឃីម បូរ៉ា អ្នក​ប្រដាល់​កម្ពុជា​យើង ដែល​ថិត​ក្នុង​ពូ​ល​A(​ពូ​ល​ខ្មែរ​) គេ​ត្រូវ​ជ្រុះ​ធ្លាក់​ជា​ស្ថាពរ​ហើយ ដោយ​ក្នុង​៤​ប្រកួត​ឈ្នះ​២​ចាញ់​២​ប្រកួត​បាន​៨​ពិន្ទុ​នោះ ហើយ Phat Thana បាន​១០​ពិន្ទុ ឈរ​កំពូល​តារាង​(​ពូ​ល​B) ដោយ​ក្នុង​៤​ប្រកួត​ឈ្នះ​៣​ចាញ់​១​ប្រកួត។​

​ចំពោះ សុខ សា​វិ​ន ដែល​គេ​ឈ្នះ Phat Ngenthong ទឹក​៥ ក្នុង​ជុំ​ជម្រុះ​ចុងក្រោយ​នេះ ធ្វើ​ឲ្យ​គេ​នៅ​អាច​ចាំ​អ៊ុត​ជាមួយ​ សូត្រ ប៊ុន​ធី ដែល​ត្រូវ​ប្រកួត​ចុង​សប្ដាហ៍​ខាងមុខ បើ​ ប៊ុន​ធី ​ឈ្នះ​នោះ ​ទើប ​សុខ សា​វិ​ន គេ​ត្រូវ​ជ្រុះ​ធ្លាក់ តែបើ​ចាញ់​វិញ​គឺមាន​ការ​ផ្ទៀងផ្ទាត់​គ្នា​ហើយ ថា​អ្នក​ណា​នៅ​អ្នកណា​ជ្រុះ​ធ្លាក់​នោះ។​

​សូមបញ្ជាក់ថា ការប្រកួត​ជើងឯក​ខា​រ៉ា​បាវ​រដូវ​កាល​ទី​៧ ទម្ងន់​៦០​គីឡូក្រាម​លើក​នេះ មាន​អ្នក​ប្រដាល់​ខ្លាំងៗ​ចំនួន៨រូប ចូលរួម​ប្រកួត គឺ​ខ្មែរ​៤​នាក់ ថៃ​៤​នាក់។

អ្នក​ប្រដាល់​ខ្មែរ​ទាំង​៤​នាក់​ក្នុង​ពូ​ល​A​នោះ រួមមាន​​ ឃីម បូរ៉ា ក្លិប​រស្មី​ភូមិ​គាប​ខេត្តបន្ទាយមានជ័យ , សុខ សា​វិ​ន ក្លិប​ឆ្មា​ស​សែន​សុខ​គុន​ខ្មែរ , លី ភា ក្លិប​សំរោង​កោង​ខេត្តបាត់ដំបង និង​សូត្រ ខេ​វិ​ន ក្លិប​បក្សី​ស្លាប​ដែក​។ ឯ អ្នក​ប្រដាល់​ថៃ៤នាក់​ក្នុង​ពូ​ល​B​វិញ មាន Phat ChhayakPhum , Phat Maha , Phat Ngenthong និង Phat Thana។

មឿ​ន​ សុខ​ហ៊ុ​ច​ ឈ្នះ​ថៃ​ដោយ​ពិន្ទុ ខណៈ ​ន​ន់ ជំនិត ចាញ់​បារាំង​ដោយ​ពិន្ទុ នៅក្នុង​ការប្រកួត​ជាមួយ​អ្នក​ប្រដាល់​ថៃ លើស​ង្វៀន​Ganzberg Top Fighter នៅ SEA-TV កាលពី​យប់​ថ្ងៃ​សៅរ៍ ទី​២៧​ ខែ​តុលា ឆ្នាំ​២០១៨ មឿ​ន សុខ​ហ៊ុ​ច អ្នក​ប្រដាល់​ក្លិប​ពុទ្ធ​សេរី​វង្ស​កីឡា បាន​វាយ​ឈ្នះ អ្នក​ប្រដាល់​ថៃ Khum Phit ហើយ​អ្នក​ប្រដាល់ ​ន​ន់ ជំនិត ក្លិប​ស្វាយ​រលំ​ឫទ្ធិ​ជ័យ វាយ​ចាញ់​អ្នក​ប្រដាល់​បារាំង ​Julien ដោយ​ពិន្ទុ។

​មឿ​ន សុខ​ហ៊ុ​ច បាន​វាយ​ឈ្នះ​ Khum Phit ត្រឹមតែ​ពិន្ទុ​ប៉ុណ្ណោះ ក្រោយពី​ប្រកួត​គ្នា​ប្រាំ​ទឹក​ពេញ​នោះ ។ សុខ​ហ៊ុ​ច គេ​បាន​វាយ​ប្ដូរ​កណ្ដាប់ដៃ និង​ទាត់​ជាមួយ​អ្នក​ប្រដាល់​ថៃ​នេះ តាំងពី​ក្នុង​ទឹក​ដំបូង​ម្ល៉េះ។​

Khum Phit ក៏​មិនធម្មតា​ដែរ គេ​វាយ​ប្ដូរ​សង​ទៅលើ​ សុខ​ហ៊ុ​ច ​វិញ ប៉ុន្តែ​យ៉ាងណា នៅ​ពីរ​ទឹក​ចុង​ក្រោយ អ្នក​ប្រដាល់​ថៃ​រូបនេះ បាន​ចាញ់​ប្រៀប​ទាត់​របស់ ​សុខ​ហ៊ុ​ច។ ដោយសារតែ​ការប្រកួត​ក្នុង​២​ទឹក​ចុង​ក្រោយនេះ Khum Phit ចាញ់​ប្រៀប​នោះ ធ្វើឲ្យ​ចប់​ការប្រកួត ​មឿ​ន សុខ​ហ៊ុ​ច គេ​បានទទួល​ជ័យជំនះ​ដោយ​ពិន្ទុ។ និយាយ​រួម ជ័យជំនះ​របស់​ សុខ​ហ៊ុ​ច​ លើ​Khum Phit នេះ គឺ​ថិ​ត​ក្នុង​លក្ខណៈ​ប្រផុតប្រផើយ​តែប៉ុណ្ណោះ។​

​ចំពោះ​ការប្រកួត​រវាង​ ន​ន់ ជំនិត និង អ្នក​ប្រដាល់​បារាំង Julien វិញ ន​ន់ ជំនិត ទប់ទល់​បាន​៥ ទឹក​ពេញ​តែម្តង ហើយ​លទ្ធផល​ចាញ់​ពិន្ទុ​បារាំង​នោះ ក៏ដោយ​សារ​ជំនិត​ចាញ់​ ស៊ុ​ហ្វ និង​កម្ពស់ Julien ដែល​ធ្វើ​ឲ្យ​គេ​មិនអាច​វាយ​ត្រូវចំ​គោលដៅ​បានល្អ។

​ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ កំពែង ខ្មៅ អ្នក​ប្រដាល់​សមាគម​កីឡាប្រដាល់​ក្រសួង​កសិកម្ម បាន​វាយ​ឈ្នះ​ គឿ​ម សុវណ្ណ​នឿ​ត អ្នក​ប្រដាល់​ក្លិប​ឃ្លាំងមឿង​កីឡា​ក្នុង​ទឹក​ទី​៣។ ហើយ​ ង៉ែត វុ​ធ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ បាន​វាយ​ឈ្នះ សៅ ប៊ុនធឿន ក្លិប​អ្នក​ប្រដាល់​ក្លិប​តា​ព្រហ្ម​មានជ័យ​ដោយ​ពិន្ទុ៕



​

Source: Kampuchea Thmey Daily