ក្រុមបាល់ទាត់វិសាខា សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានធ្វើការប្រមូលផ្ដុំហ្វឹកហាត់ជាង១សប្ដាហ៍មកហើយ ដើម្បីត្រៀមប្រកួតមិត្តភាពអន្តរជាតិជាមួយក្រុម U18 Fukushima មកពីប្រទេសជប៉ុន នាដើមខែក្រោយ បន្ទាប់ពីឲ្យកីឡាករសម្រាកមួយរយៈក្រោយផុតរដូវកាលចាស់កន្លងទៅ។
លោក ហុក សុជីវ័ន គ្រូបង្វឹកក្រុមវិសាខា បានចាត់ទុកការប្រកួតនេះ គឺជាឱកាសដ៏ល្អ ដើម្បីធ្វើតេស្តកីឡាករចាស់-ថ្មី ពិសេសកីឡាករយុវជន ទើបផ្ទេរមកពីសាលាបាល់ទាត់ជាតិបាទីតែម្ដង។
លោកបានលើកឡើងថា៖«ការប្រកួតនេះ គឺជាការល្អមួយ ដើម្បីយើងធ្វើតេស្តសមត្ថភាពកីឡាករថ្មីៗ ហើយអាចឈានដល់ការធ្វើតេស្តកីឡាករបរទេសមួយចំនួនផងដែរ។ តែភាគរយច្រើន យើងផ្ដោតលើកីឡាករថ្មីៗ ពិសេសយុវជនមកពីសាលាបាល់ទាត់ជាតិបាទី តើគាត់អាចសហការគ្នា គាត់ខ្វះខាតកន្លែងណា និងត្រូវបំពេញកន្លែងណា ដើម្បីធ្វើឲ្យស៊ីជម្រៅជាមួយកីឡាករចាស់ៗ មុនរដូវកាលថ្មីមកដល់»។
លោកយល់ឃើញក្រុម U18 Fukushima គឺជាក្រុមមួយខ្លាំង ទោះនាមជាក្រុមយុវជនក៏ដោយ។ លោកគ្រូបង្វឹករូបនេះបន្តថា៖«ប្រកួតនេះ យើងអាចគិតពីលទ្ធផលទេ សំខាន់យើងចង់តេស្ដ តើរយៈពេលជាង ១សប្ដាហ៍ចុងក្រោយ ពួកគាត់មានការយល់ចិត្តគ្នា និងទម្រង់លេងមានការរីកចម្រើនកម្រិតណា? តែខ្ញុំជឿជាក់ថា យុវជនមកពីបាទី មានការអភិវឌ្ឍន៍ខ្លួនបានលឿន ជាក់ស្ដែងឆ្នាំមុន សាន គឹមហេង ក៏ដូច្នេះដែរ គាត់ព្យាយាមធ្វើតាមការណែនាំរបស់យើង ធ្វើឲ្យគាត់អភិវឌ្ឍន៍បានលឿន និងសហការគ្នាលេងជាក្រុមបានល្អ»។
ជំនួបមិត្តភាពរវាងក្រុមបាល់ទាត់វិសាខា និងក្រុម U18 Fukushima របស់ជប៉ុន នឹងធ្វើឡើងនាវេលាម៉ោង៥ល្ងាចថ្ងៃទី០២ ខែវិច្ឆិកាខាងមុខ នៅលើទីលានពហុកីឡដ្ឋានជាតិ រាជធានីភ្នំពេញ ស្របពេលការប្រកួតនេះ នឹងធ្វើឡើងក្នុងគោលបំណងសំខាន់ ដើម្បីអបអរសាទរខួបលើកទី៦៥ នៃទំនាក់ទំនងការទូតកម្ពុជា-ជប៉ុន។
ប៉ុន្ដែមុនជួបក្រុមវិសាខា ក្រុមយុវជនមកពីជប៉ុនមួយនេះ ក៏ត្រូវឆ្លងកាត់ការប្រកួតមិត្តភាពមួយ ជាមួយក្រុមយុវជនសាលាបាល់ទាត់ជាតិបាទី នាថ្ងៃទី៣១ ខែតុលាខាងមុខនេះផងដែរ៕
Source: Kampuchea Thmey Daily
0 Comments