កីឡាករវ័យក្មេង ឡុង ម៉េងហាវ ដែលទើបតែផុតកិច្ចសន្យាជាមួយក្រុមមជ្ឈមណ្ឌល និងសាលាបាល់ទាត់ជាតិបាទី បានចូលរួមក្នុងក្រុមវិសាខា ដែលជាសមាជិកក្នុងពានរង្វាន់លីគកំពូលកម្ពុជា កាលពីពេលថ្មីៗ បានបញ្ជាក់ថា រូបគេរីករាយ ក្រោយសម្រេចក្ដីស្រមៃក្លាយជាសមាជិករបស់ក្លិបមួយនេះ ហើយសន្យាថានឹងខិតខំហ្វឹកហាត់ដើម្បីដណ្តើមកៅអីជម្រើស១១នាក់ដំបូង។
កីឡាកររូបនេះគិតថាថា ទោះបីខ្លួនបានលេង ឬមិនបានលេង គឺអាស្រ័យលើខ្លួនឯងផ្ទាល់ ដែលទាមទារឲ្យគេ ត្រូវការខិតខំហ្វឹកហាត់ខ្លាំង ដើម្បីប្រកួតប្រជែងជាមួយរៀមច្បង។
យុវជនមានកំណើតពីខេត្តព្រះសីហនុរូបនេះនិយាយថា៖«ខ្ញុំសម្រេចចិត្តចូលរួមជាមួយវិសាខា ព្រោះក្លឹបនេះ ទើបបង្កើតមែន តែមានធនធានកីឡាករល្អៗច្រើន និងការលេងល្អ ពិសេសការគ្រប់គ្រងច្បាស់លាស់។ ខ្ញុំមកទីនេះ ខ្ញុំដឹង គឺមានកីឡាកររៀមច្បងមានសមត្ថភាពច្រើន អីចឹងខ្ញុំត្រូវមានការខំប្រឹង និងប្រកួតប្រជែងខ្លាំង ដើម្បីដណ្ដើមឱកាសលេង ព្រោះពួកគាត់មានបទពិសោធន៍ច្រើនជាងខ្ញុំ។ ដូច្នេះការប្រកួតប្រជែងក៏មិនងាយស្រួលដែរ ហេតុនេះ ខ្ញុំមានតែខំប្រឹង»។
ឡុង ម៉េងហាវ បានបន្តថា៖«សម្រាប់ការផ្ដល់ឱកាស ឬមិនផ្ដល់ឱកាស ក្នុងការលេងលើទីលានវិញ គឺអាស្រ័យលើខ្ញុំផ្ទាល់ ខ្ញុំត្រូវបង្ហាញសមត្ថភាពលើកទីលាន ពិសេសពេលហ្វឹកហាត់ ខ្ញុំត្រូវយកចិត្តទុកដាក់ ដើម្បីឲ្យគ្រូបង្វឹក គាត់មើលឃើញពីសមត្ថភាពរបស់ខ្ញុំ។
ជារួមទោះខ្ញុំបានលេងកម្រិតណាក៏ដោយ ខ្ញុំប្ដេជ្ញានឹងខិតខំឲ្យអស់ពីសមត្ថភាព ដើម្បីជួយក្លឹបវិសាខា ទទួលបានលទ្ធផលល្អទាំងលីគ និងពានរង្វាន់សម្ដេចតេជោ ហ៊ុន សែន នារដូវកាលក្រោយៗ»។
គួរបញ្ជាក់ថា ឡុង ម៉េងហាវ គឺជាកីឡាករម្នាក់ ក្នុងចំណោម ៦នាក់ ដែលផ្ទេរពីសាលាបាល់ទាត់ជាតិបាទី មកកាន់ក្លឹបវិសាខា ក្រោយសហព័ន្ធកីឡាបាល់ទាត់កម្ពុជា ប្រកាសរំសាយកីឡាករចំនួន១៦នាក់កាលពីពេលថ្មីៗ តែក្នុងនោះមានកីឡាករ៥នាក់ត្រូវចូលរួមជាមួយក្រុមធំ រួមមានកីឡាករ ទៀត គឹមហេង, ទូច គឹមឆាយ, ផុន តៃនិញ, អាត អូនតូច និងអ្នកចាំទី គង់ ពីលត់៕
Source: Kampuchea Thmey Daily
0 Comments