ឧត្ដមសេនីយ៍ម៉មស្រ៊ីមវណ្ណា រងការចោទប្រកាន់ថា ប្រើអំណាចប្តឹងយកដី ផ្ទះ និងឱ្យកូនចៅទៅលួចចុចGPSវាស់វែងផ្ទះគេ

ភ្នំពេញ ៖ ឧត្ដមសេនីយ៍ ប៉ូលិសផ្កាយ៣ ម៉ម ស្រ៊ីមវណ្ណា ដែលកាលពីឆ្នាំ២០១៦ ប៊ិះនឹងអស់ផ្កាយម្តងហើយ ដោយសារតែអាងអំណាច ធ្វើបាបប៉ូលិសចរាចរណ៍តូចតាចម្នាក់នោះ ឥឡូវលោកផ្កាយ៣ អាងអំណាច ទៀតហើយ ដោយបានប្រើឯកសារ ពាក្យបណ្តឹងនៅឆ្នាំ២០០៦ ដែលមានឈ្មោះ លោកជាអ្នកប្តឹង ប៉ុន្តែ គ្មានហត្ថលេខាឬស្នាមមេដៃរបស់លោក មកប្តឹងសាលាខណ្ឌឬស្សីកែវ ដើម្បីទាមទារយកផ្ទះគេ ដែលបានរស់នៅតាំងពីឆ្នាំ១៩៧៩ រហូតមកដល់បច្ចុប្បន្ន មិនតែប៉ុណ្ណោះកាលពីពេលថ្មីៗនេះ ប្រើក្មួយឱ្យយកGPS ទៅចុចវាស់វែងលើដីគេដោយគ្មានការអនុញ្ញាត ក៏ត្រូវម្ចាស់ផ្ទះប្តឹងវិញ។

យោងតាមពាក្យបណ្តឹងរបស់ឈ្មោះរេះ ស៊ីយ៉ា ភេទស្រី អាយុ៥១ឆ្នាំ រស់នៅផ្ទះលេខ១៨៧Eក្រុមទី៤ភូមិខ ២ សង្កាត់ច្រាំងចំរេះ ទី២ខណ្ឌឫស្សីកែវ ដែលប្តឹងពីបទរំលោភរូបវ័ន្ត ដែលភ្នាក់ងារកម្ពុជាថ្មីទទួលបាន ដោយបានរៀបរាប់ថា កាលពីវេលាម៉ោង១២និង៣០នាទីថ្ងៃទី១៨ឈ្មោះ ហ្វា ករ៉ណៃ ភេទប្រុស និងបក្ខពួក២នាក់ទៀត បានយកGPS ទៅចុចវាស់វែងនៅដីផ្ទះលំនៅដ្ឋានរបស់គាត់ជាច្រើនកន្លែងដោយគ្មានការអនុញ្ញាតឡើយ ហើយឈ្មោះហ្វា ករ៉ណៃនេះជាក្មួយរបស់លោកផ្កាយ៣ ម៉មស្រ៊ីម វណ្ណា ដោយគាត់សង្ស័យថាលោក ម៉មស្រ៊ីមវណ្ណា ឱ្យកូនចៅយកGPSទៅវាស់ដីគាត់ដើម្បីលួចធ្វើប្លង់កម្មសិទ្ធិដែលគាត់មិនអាចអត់អោនឱ្យបានឡើយ។

លោក ស្រីរេះ ស៊ីយ៉ា បានឱ្យដឹងថា សព្វថ្ងៃគាត់រស់នៅវេទនាណាស់ គាត់ជាស្ត្រីមេម៉ាយកូន៨នាក់រស់នៅក្នុងផ្ទះពុកផុយតូចមួយ ដោយសារពិបាកពេកក៏រុះរើផ្ទះនោះ សាងសង់ថ្មី ក៏ស្រាប់តែលោកផ្កាយ៣ម៉មស្រ៊ីមវណ្ណា ប្តឹងមិនឱ្យសាងសង់ ហើយទាមទារយកដីផ្ទះដែលគាត់រស់នៅតាំងឆ្នាំ១៩៧៩ ដែលមានអាជ្ញាធរភូមិ សង្កាត់ ខណ្ឌដឹងឮទទួលស្គាល់មានឯកសារបញ្ជាក់ស្របច្បាប់ទាំងអស់ ដោយលោកម៉មស្រ៊ីម វណ្ណាអះអាងថាជាដីកេរិ៍តាំងពីសង្គមចាស់ តែលោកម៉មស្រីមវណ្ណាគ្មានឯកសារបញ្ជាក់នោះទេ។

លោកស្រីបន្តថា ដោយសាររុះផ្ទះចាស់អស់គេមិនឱ្យសង់គាត់ក៏ប្រក់តង់រស់នៅបណ្តោះអាសន្ន ពេលភ្លៀងមកលិចរកកន្លែងដេកគ្មានទេ។ លោកស្រីបន្តទៀតថា លោកម៉ស្រ៊ីមវណ្ណា អាងអំណាចផ្កាយ៣យកពាក្យបណ្តឹងតាំងឆ្នាំ២០០៦គ្មានផ្តិតមេដៃគ្មានហត្ថលេខាប្តឹងគាត់មិនឱ្យសង់ផ្ទះហើយទាមទារយកដីផ្ទះដែលរស់សព្វថែមទៀត ទង្វើទាំងនេះវាអយុត្តិធម៌ណាស់សម្រាប់ពួកគាត់ជាប្រជាជនក្រីក្រតូចតាច។

លោកហួតហៀង ចៅសង្កាត់រងសង្កាត់ច្រាំងចំរេះទី២ បានឱ្យកម្ពុជាថ្មីដឹងថា លោកស្រីរេះស៊ីយ៉ានិងគ្រួសារបានមករស់នៅទីនេះតាំងពីឆ្នាំ១៩៧៩មែន ដោយមានឯកសារបញ្ជាក់ពីអាជ្ញាធរភូមិ សង្កាត់ ខណ្ឌត្រឹមត្រូវ ចំណែកឯលោក ម៉មស្រ៊ីមវណ្ណា ដែលប្តឹងអះអាងថាដីនេះជាដីរបស់ខ្លួនពីសង្គមចាស់នោះ មិនមានឯកសារអ្វីមកបញ្ជាក់នោះទេ។

ពាក់ព័ន្ធនឹងបញ្ហាខាងលើលោកជា ពិសី អភិបាលខណ្ឌឫស្សីកែវបានបញ្ជាក់ថា ផ្ទះនោះពីដំបូងខាងខណ្ឌបានអនុញ្ញាតឱ្យម្ចាស់ផ្ទះជួសជុលហើយ តែដោយសារមានទំនាស់ពីអ្នកជិតខាងក៏ផ្អាកវិញ ហើយលោកបានឱ្យអភិបាលរងខណ្ឌ២នាក់ទៅធ្វើការសម្របសម្រួលជាមួយភាគីទំនាស់ដោយ ព្យាយាមរកដំណោះស្រាយ ពន្យល់ឱ្យចរចាគ្នាជាមួយលោកម៉មស្រ៊ីមវណ្ណា ជាច្រើនលើកច្រើនសា តែមិនត្រូវរ៉ូវគ្នា ក៏ឱ្យពួកគាត់ប្តឹងទៅតុលាការតែម្តងទៅ។

ចុងក្រោយលោកស្រី រេះ ស៊ីយ៉ា បានសំណូមពរទៅមន្ត្រីពាក់ព័ន្ធមេត្តាជួយរកយុត្តិធម៌ឱ្យគាត់ដែលជាស្ត្រីមេម៉ាយផង ព្រោះគាត់គ្មានអ្នកទីពឹងទេរយៈពេលជាងមួយឆ្នាំហើយ ដែលគាត់រុះផ្ទះហើយមិនឱ្យជួសជុលវិញ។

គួរបញ្ជាក់ថា ក្រោយថ្ងៃរំដោះ៧មករាឆ្នាំ១៩៧៩ ដីធ្លីផ្ទះសម្បែងទាំងអស់ជារបស់រដ្ឋ អ្នកណាចូលមកនៅមុន នឹងបានចុះបញ្ជីឲ្យរដ្ឋទទួលស្គាល់ មុន អ្នកនោះគឺជាម្ចាស់កម្មសិទ្ធិ រហូតមកដល់សម័យ តេជោ ហ៊ុនសែន បច្ចុប្បន្ន បើយើងចង់ប្តឹងទាមទារយកទ្រព្យសម្បត្តិ របស់អ្នកដទៃ មកជារបស់យើង វាទាល់តែយើងជាម្ចាស់កម្មសិទ្ធិ លើទ្រព្យនោះ ដែលច្បាប់បច្ចុប្បន្នទទួលស្គាល់សិនបើមិនចឹងទេមិនបានទេ ព្រោះផ្ទុយពី គោលនយោបាយ របស់សម្តេច តេជោហ៊ុនសែន ប្រមុខដឹកនាំរាជរដ្ឋាភិបាលកម្ពុជាបច្ចុប្បន្នហើយ។

ពាក់ព័ន្ធនឹងរឿងរ៉ាវខាងលើ កម្ពុជាថ្មីមិនអាចសុំការពន្យល់ពីលោក ម៉មស្រ៊ីមវណ្ណា បានទេ ដោយទូរស័ព្ទចូលគ្មានអ្នកទទួល៕