ក្រុម​ហ្វូត​សាល​ជម្រើស​ជាតិ​កម្ពុជា បន្ត​ចាញ់​ជា​លើក​ទី៣ នៅ​រាជធានី​បាងកក មុន​ត្រឡប់​មក​ប្រទេស​កម្ពុជា​វិញ

ក្រុម​ហ្វូត​សាល​ជម្រើស​ជាតិ​កម្ពុជា បាន​បញ្ចប់​កម្មវិធី​បោះ​ជំរំ​ហ្វឹកហាត់​នៅ​រាជធានី​បាងកក​ ប្រទេស​ថៃ រយៈពេលជិត១សប្ដាហ៍​រួច​ហើយ​មុនចូលរួមព្រឹត្តិការណ៍ AFF Futsal Championship 2018​ ដែល​ត្រូវ​ធ្វើ​ឡើង​នៅ​ប្រទេស​ឥណ្ឌូណេស៊ី ខាង​មុខ ខណៈ​ក្រុម​កម្ពុជា បាន​ប្រកួត​ចាញ់​ទាំង​៣លើក​ក្នុង​ប្រកួត​មិត្តភាពក​ម្តៅ​សាច់ដុំ​នៅទីនោះ​។

លទ្ធផល​សរុប​របស់​ក្រុមកម្ពុជា​គឺ​បានប្រកួតចាញ់ក្រុម Rachanavy FC ៥ទល់១ ថ្ងៃពុធ ទី២៤ ខែ​តុលា ឆ្នាំ២០១៨ លើ​ទីលាន​កីឡដ្ឋាន Phutianan Stadium ខណៈ​នៅថ្ងៃ​ព្រហស្បតិ៍​ទី២៥ ខែ​តុលា ឆ្នាំ២០១៨ បាន​ប្រកួតចាញ់ក្រុម Samutsakhon University ៤ទល់១ លើទីលានជាមួយគ្នា។

ចំណែកប្រកួតចុងក្រោយកម្ពុជា ត្រូវបន្ត​ចាញ់​ក្រុម Bangkok City ៩ទល់១ ថ្ងៃសុក្រ ទី២៦ ខែតុលា ឆ្នាំ២០១៨ ដែលជាប្រកួតចុងក្រោយ។

យោង​តាម​ការ​ឲ្យ​ដឹង​ពី​លោក ឃុល ភីរម្យ នាយក​ផ្នែក​អភិវឌ្ឍន៍​ហ្វូតសាល​ប្រចាំ​សហព័ន្ធ​កីឡា​បាល់​ទាត់​កម្ពុជា បានលើកឡើង​ក្រុម​ហ្វូតសាលា​ជម្រើស​ជាតិ​កម្ពុជា បាន​​ដាក់​កម្មវិធី​ទៅ​ហ្វឹកហាត់ ​និង​ប្រកួត​មិត្តភាព​នៅ​ប្រទេស​ថៃ ចាប់​ពី​ថ្ងៃ​ទី២១ ដល់​ថ្ងៃ​ទី២៧ ខែ​តុលា ឆ្នាំ​២០១៨។

សូម​បញ្ជាក់​ថា កីឡាករ​ដែល​សហព័ន្ធ​កីឡាបាល់ទាត់កម្ពុជា​ បាន​កោះហៅ​ចេញ​ទៅ​ហ្វឹកហាត់​និង​ប្រកួត​នៅ​ក្រៅ​ប្រទេស​លើក​នេះ​មាន​កីឡាករ ហេង សុខលី, រស់ រតនៈ, រស់ ស៊ីចំរើន,គន្ធ លន់​ដារ៉ុត,គឹម សុខយុទ្ធ,កែវ ជាតូ, គឹម ហាប់,អ៊ុក សេរីរតនៈ, នៅ រ៉ូហ្សេត,តាត់ ផាត់ឌី,សឹង ចាន់​វ៉ាន​ណូ,វង្ស ដារ៉ា,ផុន ចាន់ឧត្តម, ញឹក ថាលីដា, ហូ អត្រា,អ៊ឹង ស្លូត,ចន្ថា ចន្ទាកា, សេដ្ឋា សច្ចៈបុត្រ, កែវ ណារ៉េត និង ឡាក់ ភីរុណ។

ងាក​មកមើលពានរង្វាន់ជើងឯកបាល់ទាត់អាស៊ានក្នុងសាលឆ្នាំ២០១៨ ឬ AFF Futsal Championship 2018 នឹង​ត្រូវប្រកួតនៅក្នុងខែវិច្ឆិកាខាងមុខនេះហើយ ពោល​គឺ​សហព័ន្ធ​កីឡា​បាល់ទាត់​អាស៊ាន សម្រេច​ធ្វើឡើង​នៅប្រទេសឥណ្ឌូណេស៊ី ខណៈ​កម្ពុជា បាន​សម្រេច​បញ្ជូន​ក្រុម​ចូលរួម​ប្រកួត​ឡើង​វិញ​ដែរ ក្រោយខកខានតាំងពីឆ្នាំ២០១២ មក​ម្ល៉េះ។ ការប្រកួតនឹងចាប់ផ្ដើមពីថ្ងៃទី០៥ ដល់ ១១វិច្ឆិកា ឆ្នាំ២០១៨ ក្នុង​ទីក្រុង Jakarta ប្រទេសឥណ្ឌូណេស៊ី ដែលមានក្រុម៨ចូលរួម ក្នុងនោះពូល A មាន កម្ពុជា ម៉ាឡេស៊ី ឥណ្ឌូណេស៊ី និង​មីយ៉ាន់ម៉ា​ខណៈ​ពូល B មាន​ថៃ វៀតណាម ប្រ៊ុយណេ និង​ទីម័រ​ខាង​កើត៕



 

 

Source: Kampuchea Thmey Daily