ដីព្រៃប្រមាណជាង៣២២៨ហិកតា០៣៨អា នៅតំបន់ អូរថ្មស្ថិតក្នុងស្រុកស្ទឹងហាវ និងស្រុកព្រៃនប់ នឹងធ្វើការដាំដុះដើមឈើឡើងវិញ

ព្រះសីហនុ ៖ ដីព្រៃឈើតំបន់អូរថ្ម ស្ថិតក្នុងស្រុកចំនួន២ គឺស្រុកស្ទឹងហាវ និងស្រុកព្រៃនប់ ខេត្តព្រះសីហនុ ទំហំប្រមាណ៣២ ២៨ហិកតា និង០៣៨អារ ដែលកន្លងមករងការកាប់បំផ្លាញ ឈូសឆាយពីសំណាក់ក្រុមមន្ត្រីមានបុណ្យស័ក្ដិមានអំណាចធំៗ ក៏ដូចជា ក្រុមឧកញ៉ា មានមានលុយ មានឥទ្ធិពល មួយចំនួន រួមនឹងក្រុមប្រជាពលរដ្ឋខិលខូច ក្នុងគោលដៅវាតទីយកដី ព្រៃឈើធម្មជាតិទាំងនោះ ធ្វើជាកម្មសិទ្ធិ ឯកជនដោយខុសច្បាប់នោះ នឹងត្រូវធ្វើការ ដាំដុះព្រៃឈើ ដើម្បីរក្សាការពារ ធនធានធម្មជាតិឡើងវិញ។

លោក ឌី សុខុម ប្រធានរដ្ឋបាលព្រៃឈើខេត្តព្រះសីហនុ បានឲ្យដឹងថា ផ្ទៃដីទំហំ ប្រមាណ ៣២២៨ ហិកតា និង០៣៨អារ ខាងលើនេះ ក្រោយពីបញ្ចប់យុទ្ធនាការ បោសសម្អាតភាពអនាធិបតេយ្យ ក្រសួងកសិកម្ម បានសម្រេច ធ្វើការដាំដើមឈើ ឡើងវិញ តាម ការស្នើសុំរបស់ រដ្ឋបាលខេត្តព្រះសីហនុ។ សកម្មភាពការដាំដើមឈើ នឹងចាប់ផ្តើម ពីថ្ងៃ នេះតទៅ ដោយជំហានដំបូង រដ្ឋបាលព្រៃឈើ នឹងរៀបចំ ថ្នាលបណ្ដុះកូនឈើ ជាមុនសិន ព្រមទាំងលើកប្លាកប៉ាណូធ្វើការ ផ្សព្វផ្សាយព័ត៌មានបន្ថែម ស្តីអំពីច្បាប់ អនុញ្ញាតរបស់ក្រសួងកសិកម្ម លើទំហំសរុប ៣២២៨ ហិកតា និង០៣៨អារ ក្នុងគោលដៅ ច្បាស់លាស់ ដើម្បី ឲ្យប្រជាពលរដ្ឋ មានការយល់ដឹង ឲ្យរឹតតែច្បាស់ ជាពិសេស គឺក្រុមអ្នកមានបំណង ធ្វើ សកម្មភាពទិញលក់ដីតំបន់នេះបង្កភាពអនាធិបតេយ្យ ឲ្យបានដឹង និងបញ្ឈប់សកម្មភាព របស់ខ្លួន ចៀសវាង ប្រឈមមុខនឹងទោសទណ្ឌ។ ជាមួយគ្នា លោក ឌី សុខុម ក៏បាន ធ្វើការ បញ្ជាក់ផងដែរថា ការលើកប្លាកប៉ាណូផ្សព្វផ្សាយខាងលើនេះ ត្រូវបានលើក ដាក់រួចរាល់ហើយ នាថ្ងៃទី៣១ ខែតុលា ឆ្នាំ២០១៨នេះ គឺដាក់ចំនួន ៣ចំណុច សំខាន់ គឺទីមួយ តំបន់ ក្បែរស្ពាន អូរថ្ម ស្រុកព្រៃនប់ និងទី២ ដាក់នៅព្រំប្រទល់ ស្រុក ស្ទឹងហាវ និង ទីដាក់ ក្នុង តំបន់ក្បាលឆាយ។
ក្នុងឱកាលនោះ ឧកញ៉ា លោក ថន វិរៈ ដែលជាសប្បុរសជន ក្នុងការជួយឧបត្ថម្ភ សេវាកម្មគ្រឿងចក្រ ឈូសឆាយ ផ្ទៃដី សម្រាប់ដាំ ដើមឈើ និង សាងសង់អាគារ ថ្នាលបណ្ដុះ កូនឈើ រួមនឹង ថ្នាលបណ្ដុះដាំផ្កា គ្រប់ប្រភេទ សម្រាប់ ផ្គត់ផ្គង់ ខេត្តព្រះសីហនុ ក៏បានមាន ប្រសាសន៍ផងដែរថា អ្វីដែលលោកអាចជួយបានគឺលោក ជួយដោយចិត្ត ស្មោះ ដើម្បីរួមចំណែក ក្នុងការដាំដុះ និង ថែរក្សា ការពារព្រៃឈើ ឡើងវិញ ពីព្រោះនេះ គឺជាគោលដៅ ការពារផលប្រយោជន៍ ធនធានជាតិរបស់យើងទាំងអស់គ្នា ហើយលោកសង្ឃឹមថា ការយកចិត្តទុកដាក់ការពារដាំដុះព្រៃឈើ ដូចនេះ នឹងមានជា បន្តបន្ទាប់ទៀត ដើម្បីរួមចំណែកក្នុង ការអភិវឌ្ឍធនធានធម្មជាតិ ប្រទេសជាតិ ទៅថ្ងៃអានាគត ជាពិសេស កិច្ចការពារបរិស្ថាន ជាចំណុចមួយ ដែលរាជរដ្ឋាភិបាលកម្ពុជាកំពុងមានការចាប់អារម្មណ៍ផងដែរ។

គួរបញ្ជាក់ផងដែរថា ដីព្រៃឈើធម្មជាតិ ដែលជាដីរដ្ឋ តំបន់ អូរថ្ម ខាងលើនេះ បានរង ការកាប់បំផ្លាញ យ៉ាងពេញបន្ទុក នៅក្នុងអំឡុង ដើមឆ្នាំ ២០១៨មុនឧកាសបោះឆ្នោត ជ្រើសរើស តំណាងរាស្ត្រ អាណត្តិទី៦ ដោយ មេខ្លោងធំជាងគេ ក្នុងការបំផុស និងនាំគ្រឿងចក្រ ចូល ទៅឈូសឆាយ បំផ្លាញ ដីតំបន់ហាមឃាត់ខាងលើនេះ គឺ មានមនុស្សពីរនាក់គឺទី១ ឈ្មោះ ជួន ទី មានឋានៈពាក់ផ្កាយមួយ ជាទាហាន មូលដ្ឋានរាម និង មួយទៀត ឈ្មោះ ម៉ៅ មករា មានឋានៈ ផ្កាយ ២ ដែលអះអាងថាខ្លួន ជាជំនួយការផ្ទាល់ របស់ នាយឧត្ដមសេនីយ៍ ឈិន ច័ន្ទពណ៌ នេះបើតាមការអះអាង របស់ មន្ត្រីរដ្ឋបាលព្រៃឈើ ដែលបានធ្វើរបាយការណ៍ ដាក់ចូលទៅ ថ្នាក់ដឹកនាំខេត្តព្រះសីហនុកន្លង មក។

ដោយឡែក សម្រាប់ប្រជាពលរដ្ឋ ដែលចូលទៅធ្វើសកម្មភាពផងដែរនោះ ពួកគេហ៊ានក៏ដោយសារ ក្រុមមេខ្លោងទាំងពីរនាក់ ខាងលើ នេះដែរ ជាហេតុធ្វើឲ្យតំបន់នោះ ក្លាយជាតំបន់អនាធិបតេយ្យ យ៉ាងពេញ ទំហឹង ហើយ ព្រៃឈើ ទំហំរាប់ពាន់ហិកតា ត្រូវឈូសឆាយ កាប់បំផ្លាញ អស់ គ្មានសល់ក្នុងមួយប៉ប្រិចភ្នែក គួរឲ្យស្រណោះ។ ប៉ុន្តែសម្រាប់ពេលនេះ ភាពអនាធិបតេយ្យនៃតំបន់ខាងលើ ត្រូវបានគណៈកម្មការ ចម្រុះរបស់ រដ្ឋបាលខេត្ត ដឹកនាំដោយ លោកស្រ៊ុនស្រ៊នអភិបាលរងខេត្តព្រះសីហនុ ធ្វើការ បោសសម្អាត អស់មួយចំនួនធំហើយ គឹ នៅសល់តែ មេខ្លោង ឈ្មោះ ទៀត ឈ្មោះ ម៉ៅ មករា មានឋានៈ ផ្កាយ ២ ដែលអះអាងថាខ្លួន ជាជំនួយការផ្ទាល់ របស់ នាយឧត្ដមសេនីយ៍ប៉ុណ្ណោះ ដែលមិនព្រមដកខ្លួនចេញ៕