ភ្នំពេញ ៖ ជនសង្ស័យជនជាតិវៀតណាមម្នាក់ក្នុងចំណោមបក្ខពួក២នាក់ ខណៈដែលធ្វើសកម្មភាពឆក់កាបូបស្ពាយពីស្ត្រីជនជាតិបារាំងកំពុងដើរជាមួយមិត្តប្រុស បានសម្រេច ហើយព្យាយាមជិះរត់គេចខ្លួន តែត្រូវជនរងគ្រោះស្រែឆោឡោផ្អើលសមត្ថកិច្ចកំពុងល្បាតក្បែរ ដេញតាមក្របួចជាប់ម្នាក់និងបក្ខពួកម្នាក់ទៀតរត់គេចខ្លួនបាត់កាលពីវេលាម៉ោង ២០និង៣០នាទីយប់ថ្ងៃពុធ ៧រោច ខែ អស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨ ស្ថិតនៅចំណុចផ្លូវលេខ១៧៨កែង ផ្លូវព្រះនរោត្តមភូមិ០៩ សង្កាត់ជ័យជំនះខណ្ឌដូនពេញ រាជធានីភ្នំពេញ។
មន្ត្រីនគរបាលខណ្ឌដូនពេញ បានឲ្យដឹងថា ករណីនេះ បង្កឡើងដោយជនសង្ស័យមានបក្ខពួក២នាក់ ជិះម៉ូតូចំនួន០១គ្រឿងម៉ាកហុងដាឌ្រីម សេ125ពណ៌ខ្មៅពាក់ស្លាកលេខភ្នំពេញ1I 2664មកពីក្រោយជនរងគ្រោះ ហើយជនសង្ស័យឈ្មោះ ហេង ភេទប្រុស អាយុប្រហែល២០ឆ្នាំ ដែលអង្គុយពីក្រោយ បានធ្វើសកម្មភាពឆក់យកកាបូបស្ពាយពីស្ត្រីជាជនរងគ្រោះជនជាតិបារាំង ដែលកំពុងដើរជាមួយមិត្តប្រុសតាមផ្លូវលេខ១៧៨ ពីទិសកើតទៅលិច បានសម្រេច។ ពេលនោះជនរងគ្រោះបានស្រែកឆោឡោ ហើយត្រូវបានកម្លាំងល្បាតរបស់ខណ្ឌ និងកម្លាំងល្បាតរបស់ប៉ុស្តិ៍ជ័យជំនះឃើញហេតុការណ៍ ក៏បានដេញប្រផាប់ចាប់ប្រភីង ឃាត់ខ្លួនបានជនសង្ស័យឈ្មោះង្វៀង យ៉ាំងធួយ ភេទប្រុសអាយុ១៨ឆ្នាំជាអ្នកបើកម៉ូតូ រួមជាមួយវត្ថុតាង ម៉ូតូម៉ាកC125ពណ៌ខ្មៅពាក់ស្លាកលេខភ្នំពេញ1I 2664 ជាមធ្យោបាយជិះធ្វើសកម្មភាពនិងកាបូបស្ពាយរបស់ជនរងគ្រោះនាំមកទីស្នាក់ការប៉ុស្តិ៍នគរបាលរដ្ឋបាលជ័យជំនះ ចំណែកជនសង្ស័យម្នាក់ទៀតឈ្មោះ ហេង បានរត់គេចខ្លួនបាត់។
សមត្ថកិច្ចបានឲ្យដឹងថា ជនសង្ស័យឃាត់ខ្លួនបានឈ្មោះង្វៀង យ៉ាងធួយ ភេទប្រុស អាយុ១៨ឆ្នាំជនជាតិវៀតណាម មុខរបរមិនពិតប្រាកដ មានទីលំនៅស្នាក់នៅលើទូកមាត់ទន្លេ សង្កាត់ចាក់អង្រែក្រោមខណ្ឌមានជ័យ រាជធានីភ្នំពេញ។ ចំណែកជនរងគ្រោះឈ្មោះROUX RAPHAELLE. ភេទស្រីអាយុ២៦ឆ្នាំ ជនជាតិបារាំងមុខរបរទេសចរណ៍កាន់លិខិតឆ្លងដែនលេខ12A P66853. ស្នាក់នៅសណ្ឋាគារមណ្ឌលគីរីផ្លូវលេខ៦៣ សង្កាត់បឹងរាំង ខណ្ឌដូនពេញរាជធានីភ្នំពេញ។ ក្រោយឃាត់ខ្លួនសមត្ថកិច្ចបានធ្វើតេស្តទឹកនោមលើជនសង្ស័យឈ្មោះង្វៀង យ៉ាំងធួយ ជាលទ្ធផលគឺអវិជ្ជមាន(គ្មានសារធាតុញៀន)។
បច្ចុប្បន្ន ជនសង្ស័យឈ្មោះង្វៀង យុំាងធួយ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីចាត់ការតាមនីតិវិធី៕
រស្មី
Source: Kampuchea Thmey Daily
0 Comments