ម៉ឺងៗ ជាសញ្ញាថា ថ្ងៃបើកបវេសនកាលឆ្នាំសិក្សា២០១៨និង២០១៩ សូមសិស្សចាស់ថ្មី និងមាតាបិតានាំកូនចាប់ពីអាយុ៦ឆ្នាំ មកចូលរៀនឲ្យបានគ្រប់គ្នា

បន្ទាយមានជ័យ ៖ ម៉ឺងៗនេះ ជាសញ្ញាប្រាប់ឲ្យដឹងថា ថ្ងៃបើកបវេសនកាលឆ្នាំសិក្សា២០១៨និង២០១៩ចូលមកដល់ហើយ សូមសិស្សចាស់ ថ្មី និងមាតាបិតាសិស្ស នាំកូនចាប់ពីអាយុ៦ឆ្នាំ មកចុះឈ្មោះចូលរៀនឲ្យបានគ្រប់ៗចាប់ពីថ្ងៃនេះតទៅ។

ពិធីនេះ ប្រព្រឹត្តិទៅ នៅវេលាម៉ោង៧ព្រឹក ថ្ងៃទី១ ខែវិច្ឆិកា ឆ្នាំ២០១៨ នៅវិទ្យាល័យសិរីសោភ័ណ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ដែលមានការចូលរួមពី លោកសួនបវរ អភិបាលខេត្តបន្ទាយមានជ័យ លោកឈូប៊ុនរឿង ប្រធានមន្ទីរអប់រំខេត្តបន្ទាយមានជ័យ លោកហ៊ឹលរ៉ាយ៉ាអភិបាលក្រុងសិរីសោភ័ណ អង្គភាព មន្ទីរជុំវិញខេត្ត រួមជាមួយ សិស្សានុសិស្សជាច្រើនរយនាក់។

ក្នុងនោះលោកឈូ ប៊ុនរឿង បានមានប្រសាសន៍ថា ថ្ងៃទី១ ខែវិច្ឆិកា ឆ្នាំ២០១៨នេះ ជាសញ្ញាប្រាប់ដល់ មាតាបិតាសិស្ស សិស្សានុសិស្ស ទូទាំងប្រទេសឲ្យបានដឹងថា ថ្ងៃនេះជាថ្ងៃបើកបវេសនកាល ឆ្នាំសិក្សា ២០១៨ចូលមកដល់ហើយ សូមឲ្យ មាតាបិតាសិស្ស ដែលមានកូនចាប់អាយុ៦ឡើងសូមរួសរាន់យកកូនប្រុស ស្រីមកចុះឈ្មោះចូលរៀនឲ្យបានទាន់ពេលវេលា ដោយមិនបាច់បង់ប្រាក់ក្នុងការចូលរៀននោះឡើយ។

ចំណែកសិស្សានុសិស្សចាស់ត្រូវរៀបចំខ្លួនប្រាណជាឯកសណ្ឋានសិស្សឲ្យបានស្អាតចូលរៀនតាមថ្នាក់រៀងៗខ្លួនចាប់ពីថ្ងៃបើកបវេសនកាលនេះតទៅ។ លោក បានបញ្ជាក់ឲ្យដឹងទៀតថា ឆ្នាំសិក្សាថ្មីនេះ វាមានសរៈសំខាន់ណាស់សម្រាប់ សិស្ស និស្សិត ដែលជាកុលបុត្រ កុលធីតាជាទីស្រឡាញ់របស់យើងគ្រប់គ្នាបានបន្តការសិស្សានុសិស្សរៀនសូត្រនៅថ្នាក់ខ្ពស់បន្តទៀត និងជាថ្ងៃផ្ដើមនៃជីវិតសិក្សាដំបូងរបស់កុមារ ដែលទើបនឹងដល់អាយុត្រូវចូលរៀន។

ក្នុងនោះ សិស្សឈ្មោះ ហុង រក្សា រៀននៅថ្នាក់ទី១២Dនៃវិទ្យាល័យសិរីសោភ័ណបានឡើងប្ដេជ្ញាចិត្តថា ដើម្បីជាសក្ខីភាពនៃការយកចិត្តទុកដាក់ចំពោះវិស័យអប់រំ ចំពោះកុមារា និងកុមារី យុវជន និងយុវនារី ដែលជាទំពាំងស្នងឫស្សី ដែលជាអនាគត នឹងក្លាយជា សសរទ្រូងដ៏រឹងមាំរបស់ប្រទេសជាតិ។ កញ្ញាបានឡើងប្ដេជ្ញាចិត្តចិត្តថា ខំគោរពដំបូន្មានរបស់ឪពុក ម្ដាយ និងលោកគ្រូនិងអ្នកគ្រូប្ដេជ្ញារៀនសូត្រឲ្យក្លាយទៅជា កូនល្អ សិស្សល្អ និងមិត្តល្អ និងប្ដេជ្ញា ជាសឲ្យឆ្ងាយពីគ្រឿងញៀនឲ្យបានជាដាច់ខាត។

លោកសួនបវរក៏បានមានប្រសាសន៍ដែរថា ការប្រារព្ធបើកទិវាបវេសនកាលនេះឡើង ដើម្បីដាស់ស្មារតីសិស្សានុសិស្សឲ្យយកចិត្តទុកដាក់ខ្ពស់លើការសិក្សារបស់ខ្លួនគ្រប់ពេលវេលា ការសិក្សារៀនសូត្រ មិនត្រឹមតែអនុវត្តនៅក្នុងវិស័យសិក្សាតែប៉ុណ្ណោះទេ ថែមទាំងតម្រូវឲ្យមានការបន្តលើកកម្ពស់និងការអភិវឌ្ឍគ្មានថ្ងៃបញ្ចប់ ដើម្បីធានានូវការផលិតធនធានមនុស្សប្រកបដោយគុណភាពអភិវឌ្ឍប្រកបដោយចីរភាពផងដែរ។

លោកបានបញ្ជាក់ឲ្យដឹងទៀតថា ការអប់រំល្អផ្តល់អត្ថប្រយោជន៍យ៉ាងធំធេងដល់បុគ្គល គ្រួសារ និងសង្គមជាតិទាំងមូល ពោលការអប់រំល្អ និងនាំដល់ការផ្គត់ផ្គង់ធនធានមនុស្ស កម្លាំងពលកម្មដែលមានចំណេះដឹង ជំនាញវិជ្ជាជីវៈដើម្បីឆ្លើយតបកាន់តែមានប្រសិទ្ធភាពទៅនឹងទីផ្សារការងារ និងតម្រូវការអភិវឌ្ឍសង្គមជាតិផងដែរ។

លោកបានបញ្ជាក់ឲ្យដឹងទៀតថា សង្គមជាតិមួយអាចរីកចម្រើនទៅបានអាស្រ័យទៅដោយសង្គមជាតិសម្បូរទៅដោយធនធានមនុស្សប្រកបទៅដោយសក្ដានុពល សមត្ថភាព ដែលអាចប្រែក្លាយសង្គមជាតិឲ្យមានការអភិវឌ្ឍជឿនលឿនបានយ៉ាងឆាប់រហ័ស និងមានភាពកាន់តែរឹងមាំទៀតផង៕