ក្រុម​អង្គ​រថា​យ​ហ្គឺ​រ ប្រកាស​ចុះកិច្ចសន្យា​កីឡាករ​ថ្មី​៣​នាក់​មុន​រដូវ​កាល​២០១៩​មកដល់

ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Cambodian Tiger FC) សមាជិក​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League 2018) ដែលមាន​មូលដ្ឋាន​នៅ​ខេត្តសៀមរាប បានសម្រេច​ចិត្ត​ប្រកាស​ពី​សម​សភាព​កីឡាករ​ថ្មី​របស់​ខ្លួន​ចំនួន​៣​នាក់​ដើម្បី​ចុះបញ្ជី​ត្រៀមខ្លួន​ទទួល​ស្វាគមន៍​រដូវ​កាល​ឆ្នាំ​២០១៩​ខាងមុខនេះ​។

យោង​តាម​សេចក្តី​ប្រកាស​របស់​ក្លិប​អង្គ​រថា​យ​ហ្គឺ​រ នៅ​រសៀល​ថ្ងៃ​ព្រ​ហ​ស្បតិ៍ ទី ០១ ខែ វិច្ឆិកា ឆ្នាំ ២០១៨ បាន​បញ្ជាក់​ថា ​កីឡាករ​ទាំង​៣​រូប​នោះ​មាន អតីត​កីឡាករ​របស់​គូប្រជែង​ក្នុង​ខេត្តសៀមរាប ២​រូប និង​អ្នកចាំទី​មកពី​ក្លិប​ព្រះខ័ន​រាជ​ស្វាយរៀង​១​រូប​ផងដែរ​។ កីឡាករ ឡុង ភា​រ៉ាត់ ដែលជា​អតីត​កីឡាករ​យុវជន​របស់​ជម្រើសជាតិ​កម្ពុជា U-19 និង ខ្សែប្រយុទ្ធ​វ័យក្មេង ឈឿន ពិសិដ្ឋ ដែល​អ្នក​ទាំងពីរ សុទ្ធតែ​ផ្ទេរ​មកពី​ក្លិប សូល​ទី​ឡូ​អង្គរ កាលពី​រដូវ​កាល ២០១៨ កន្លងទៅ​។ ចំណែក​មួយ​រូប​ទៀត​វិញ គឺជា​អ្នកចាំទី​យុវជន​របស់​ក្លិប​បាល់ទាត់​ព្រះខ័ន​រាជ​ស្វាយរៀង យី ប៊ុនហេង ដែល​ទើប​បញ្ចប់​កិច្ចសន្យា​ជាមួយ​ក្លិប​ចាស់​កាលពីពេល​ថ្មីៗ​។



សូម​រំលឹក​ថា ​ក្រោយ​បញ្ចប់​យុទ្ធនាការ​ក្នុង​រដូវ​កាល​ចាស់​ឆ្នាំ​២០១៨ កន្លងទៅ​ក្លិប​ដែល​មាន​ក្បាលម៉ាស៊ីន ជា​ជនជាតិ​ជប៉ុន​មួយ​នេះ ​បញ្ចប់​កិច្ចសន្យា​ជាមួយ​កីឡាករ​មួយចំនួន​ដូចជា កីឡាករ Masahiro Fukasawa ជនជាតិ​ជប៉ុន ប្រកាស​ចូលនិវត្តន៍​ពី​អាជីព​បាល់ទាត់​។ កីឡាករ​ខ្មែរ គង់ ឧ​ត្ត​ម​,​ប៉ោ សុខុម សុទ្ធតែ​ចែកផ្លូវ​ជាមួយ​ក្លិប​។ ចំណែក​កីឡាករ​មួយចំនួន​ត្រូវ​បាន​ក្លិប​សម្រេចចិត្ត​បន្ត​កិច្ចសន្យា​បន្ថែម​គឺ​កីឡាករ​តាំង ពិសី កីឡាករ​Joichiro Sugiyama កីឡាករ ពេជ្រ សុវណ្ណ​ខេ​ម​រិ​ន្ទ្រ និង​អ្នកចាំទី​ហែម ស៊ី​ម៉ៃ បន្ត​កុងត្រា​រយៈពេល ០១​រដូវ​កាល​បន្ថែមទៀត​។

​ក្រុម​អង្គ​រថា​យ​ហ្គឺ​រ បាន​ប្តូរ​ឈ្មោះ​មកពី​ក្រុម​ត្រាយ​អាស៊ី​ភ្នំពេញ កាលពី​ចុងរដូវ​កាល​២០១៤ ហើយ​នៅ​រដូវ​កាល​២០១៥ គឺជា​កំណត់ត្រា​ល្អ​របស់​ក្លិប​ពោល​គឺ អាច​ឡើងដល់​វគ្គ​៤​ក្រុម​ចុងក្រោយ​ទាំង​ពានរង្វាន់​សម្តេច ហ៊ុន សែន និង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ក្រោយ​ឈរ​ចំណាត់ថ្នាក់​លេខ​៣​ដូចគ្នា​។ ក្រុម​នេះ ទទួល​បាន​សិទ្ធិ​ប្រើប្រាស់​កីឡដ្ឋាន​ខេត្តសៀមរាប ពី​ក្រសួង​អប់រំ​យុវជន​និង​កីឡា កាលពី​រដូវ​កាល​ឆ្នាំ​២០១៧ កន្លង​ធ្វើជា​ទឹកដី​របស់​ខ្លួន​រាល់​ការប្រកួត​នានា​។



ចំណែក​លទ្ធផល​ក្នុង​រដូវ​កាល​ឆ្នាំ​២០១៨ កន្លងទៅ​ក្រុម​អង្គ​រថា​យ​ហ្គឺ​រ បាន​បញ្ចប់​យុទ្ធនាការ​របស់ខ្លួន​ដោយ​ឈរ​ចំណាត់ថ្នាក់​លេខ​៨ ក្នុងចំណោម​ក្លិប​ទាំង​១២ ក្រោយ​ប្រកួត​បាន​២២​លើក​ឈ្នះ​បាន​៧​លើក ហើយ​ស្មើគ្នា​បាន​៧​លើក​និង​បរាជ័យ​៨​លើក​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន វិញ​បាន​ឈរ​ចំណាត់ថ្នាក់​លេខ​៣​ស្ទួន ក្រោយ ប្រកួត​បរាជ័យ​នៅ​វគ្គ​ពាក់កណ្ដាល​ផ្តាច់ព្រ័ត្រ ដោយ​ថ្វីជើង​ក្រុម​អគ្គស្នងការដ្ឋាន​នគរបាល​ជាតិ ២ទល់០៕

Source: Kampuchea Thmey Daily