ភ្នំពេញ ៖ លោក វេង សាខុន និងរដ្ឋមន្ត្រី ក្រសួងកសិកម្ម បានជួបពិភាក្សាការងារ ជាមួយ លោកស្រី ចំរើន មុទិតា ប្រធានក្រុមការងារបេសកកម្មលើកទី៣ របស់ធនាគារពិភពលោកប្រចាំព្រះរាជាណាចក្រកម្ពុជា និងសហការី ស្តីពីសកម្មភាពអនុវត្តគម្រោងបែងចែកដីដើម្បីសង្គមកិច្ច និងអភិវឌ្ឍសេដ្ឋកិច្ច ជំហាន២ (LASED II)។ ជំនួបនេះ ធ្វើឡើងនៅក្នុងក្រសួងកសិកម្មនៅថ្ងៃទី១៤នេះ
នាឱកាសនេះ លោកស្រី ចំរើន មុទិតា បានឲ្យដឹងថា ក្រុមបេសកកម្មលើកទី៣ របស់ធនាគារពិភពលោកប្រចាំព្រះរាជាណាចក្រកម្ពុជាបានបំពេញទស្សនកិច្ច ចាប់ពីថ្ងៃទី៣០ ខែតុលា រហូតថ្ងៃទី១៤ ខែវិច្ឆិកា ឆ្នាំ២០១៨ ដើម្បីពិនិត្យមើលលទ្ធភាពនៃការធ្វើការអង្កេតទិន្នន័យមូលដ្ឋាន និងរៀបចំការវាយតម្លៃពាក់កណ្តាលអាណត្តិនៃគម្រោង ការជ្រើសរើសមុខសញ្ញាទទួលដីសម្បទានសង្គមកិច្ច និងពិនិត្យស្ថានភាពជីវភាពរស់នៅរបស់ប្រជាកសិករដែលទទួលបានដីសម្បទានសង្គមកិច្ចកន្លងមក។
យោងតាមការពិនិត្យទិដ្ឋភាពជាក់ស្ដែង លោកស្រីបានបញ្ជាក់ថា គម្រោងនេះបាននឹងកំពុងអនុវត្តបានយ៉ាងល្អប្រសើរ ដោយប្រាក់ចំណូលនិងជីវភាពគ្រួសាររបស់សម្បទានិកមានការរីកចម្រើនគួរឲ្យកត់សម្គាល់។ ជាមួយគ្នានេះផងដែរ លោកស្រីសូមថ្លែងអំណរគុណចំពោះលោករដ្ឋមន្ត្រី និងមន្ត្រីជំនាញរបស់ក្រសួងដែលបាន និងបន្តផ្តល់កិច្ចសហការយ៉ាងល្អក្នុងការអនុវត្តគម្រោងនេះ។
ជាកិច្ចស្វាគមន៍ លោករដ្ឋមន្ត្រីបានថ្លែងអំណរគុណយ៉ាងជ្រាលជ្រៅជូនចំពោះធនាគារពិភពលោកដែលបាននិងបន្តជួយគាំទ្រដល់រាជរដ្ឋាភិបាលកម្ពុជាក្នុងការអភិវឌ្ឍប្រទេសជាតិ។ ទន្ទឹមនឹងនេះ លោករដ្ឋមន្ត្រីក៏បានសាទរចំពោះវឌ្ឍនភាព និងសមិទ្ធផលនានាដែលគម្រោងសម្រេចបាន ដោយសមិទ្ធផលនេះហើយបានជួយលើកស្ទួយជីវភាពគ្រួសាររបស់ប្រជាជននៅជនបទ និងបានកាត់បន្ថយភាពក្រីក្របានយ៉ាងមានប្រសិទ្ធភាព។ ដើម្បីឲ្យគម្រោងនេះទទួលបានលទ្ធផលកាន់តែល្អប្រសើរ និងមាននិរន្តរភាព លោករដ្ឋមន្ត្រីបានស្នើឲ្យគ្រប់ភាគីពាក់ព័ន្ធ ជាពិសេសធនាគារពិភពលោកពិនិត្យ ពិចារណាលើការសិក្សា និងវាយតម្លៃស្ថានភាពនិងគុណភាពនៃដីឲ្យបានស៊ីជម្រៅ ក៏ដូចជាការធ្វើកំណត់តំបន់ដាំដុះ ដើម្បីធានាបាននូវផលិតភាពផលិតកម្មកសិកម្មរបស់សម្បទានិក។ ចំពោះដីដែលមិនមានភាពអំណោយផលក្នុងការដាំដុះដំណាំ លោករដ្ឋមន្ត្រីក៏បានណែនាំឲ្យពិនិត្យមើលពីលទ្ធភាពក្នុងផ្តល់ហេដ្ឋារចនាសម្ព័ន្ធឲ្យទទួលបានប្រសិទ្ធភាពខ្ពស់ ការផ្តល់ជំនួយទាំងផ្នែកបច្ចេកទេស ពូជសត្វដែលមានតម្លៃ និងសក្តានុពលខ្ពស់ជូនសម្បទានិកដើម្បីចិញ្ចឹម។ ជាការឆ្លើយតប លោកស្រីបានសន្យាថានឹងយកអនុសាសន៍ដែលលោក រដ្ឋមន្ត្រីបានផ្តល់ ហើយពិនិត្យឲ្យអស់លទ្ធភាព ដើម្បីធានាដល់ការអភិវឌ្ឍជីវភាពគ្រួសាររបស់សម្បទានិក៕
Source: Kampuchea Thmey Daily
0 Comments