ភ្នំពេញ ៖ ក្រោយទទួលបានចម្លើយសារភាព និង វត្ថុតាងច្បាស់លាស់រួចមកកម្លាំងការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថរាជធានី បានកសាងសំណុំរឿងបញ្ជូនជនសង្ស័យ(ខ្ទើយ)ទៅតុលាការផ្ដន្ទាទោសតាមច្បាប់ នារសៀលថ្ងៃទី១៤វិច្ឆិកា ឆ្នាំ២០១៨បន្ទាប់ពីបង្ក្រាបនាថ្ងៃអង្គារ ០៧កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែវិច្ឆិកា ឆ្នាំ២០១៨ វេលាម៉ោង២១និង៣០នាទីរួចមក។
មន្ត្រីអាវុធហត្ថរាជធានីបានឲ្យដឹងថា ការចាប់នោះ ធ្វើឡើងនៅចំណុចបន្ទប់ជួលលេខ៣ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានករណីហិង្សាដោយចេតនា(យកកាំបិតចាក់) បង្កឡើងដោយជនសង្ស័យម្នាក់ ឈ្មោះ វ៉ាត ហឿប ភេទស្រី(ខ្ទើយស្រីតែងខ្លួនធ្វើប្រុស) អាយុ៣១ឆ្នាំ ទីលំនៅបន្ទប់ជួលលេខ២ ភូមិកន្ទោកជើង សង្កាត់កន្ទាក ខណ្ឌពោធិ៍សែនជ័យ មុខរបរកម្មកររោងចក្រ។
ដោយឡែកជនរងគ្រោះឈ្មោះ ប្រាក់ គឹមហុង ភេទប្រុស អាយុ២៩ឆ្នាំ មុខរបរបើកបរ ស្នាក់នៅបន្ទប់ជួលលេខ៣ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ របួសពោះខាងស្តាំ ដេរចំនួន៥ថ្នេរ។
តាមដំណើររឿងក្រោយការសាកសួរជនរងគ្រោះបានប្រាប់សមត្ថកិច្ចយើងថា មុនពេលកើតហេតុជនរងគ្រោះបានឈ្លោះជាមួយប្រពន្ធតាមទូរស័ព្ទ និងបានជេរប្រពន្ធតាមទូរសព្ទ័ ពេលនោះជនសង្ស័យអង្គុយចិតផ្លែឈើហូប(បន្ទប់ជាប់គ្នា)ហើយក៏បានឈ្លោះគ្នា បន្ទាប់មកជនសង្ស័យបានយកកាំបិតចាក់មកលើខ្លួនបណ្តាលឲ្យរងរបួសត្រង់ពោះតែម្តង។
ប្រភពបន្តទៀតថា តាមការឆ្លើយបំភ្លឺរបស់ជនសង្ស័យបានប្រាប់សមត្ថកិច្ចយើងថា ពេលដែលជនរងគ្រោះជេរបញ្ចោរនោះ ខ្លួនអង្គុយចិតផ្លែឈើហូប និងជក់បារី ហើយបានស្តោះទឹកមាត់ ពេលនោះជនរងគ្រោះបានស្រែកដាក់ជនសង្ស័យថា ហ្អែងឈ្លើយម្ល៉េះ ហើយបានដើរតម្រង់មករកខ្លួន និងបានច្របាច់កខ្លួន ខ្លួនក៏បានយកកាំបិតចាក់ទៅលើជនរងគ្រោះតែម្តងទៅ។
បច្ចុប្បន្ន ជនសង្ស័យត្រូវបានបញ្ជូនទៅការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់តុលាការ កាត់ទោសតាមផ្លូវច្បាប់៕
Source: Kampuchea Thmey Daily
0 Comments