ឧត្ដមសេនីយ៍​អាមេរិក ​៖ យន្តហោះ​ទម្លាក់​គ្រាប់បែក​អាមេរិក​លែង​ហោះហើរ​លើ​ឧបទ្វីប​កូរ៉េ​ទៀតហើយ

ឧ​ត្ត​ម​សេនីយ៍​អាមេរិក​ម្នាក់​បាន​និយាយ​កាលពី​ថ្ង​ចន្ទ​ថា យន្តហោះ​ទម្លាក់​គ្រាប់បែក​អាមេរិក​លែង​ធ្វើការ​ហោះហើរ​លើ​ប្រទេស​កូរ៉េខាងត្បូង​ទៀតហើយ​បន្ទាប់ពី​ទីក្រុង​សេ​អ៊ូ​ល​បាន​ស្នើសុំ​ឲ្យ​បេសកកម្ម​បែបនេះ​ត្រូវ​ផ្អាក​។​

លោក​ឧ​ត្ត​ម​សេនីយ៍ Charles Brown ដែលជា​ប្រធាន​កងកម្លាំង​អាកាស​អាមេរិក​ប្រចាំ​តំបន់​ប៉ាស៊ីហ្វិក​បាន​ប្រាប់​ក្រុម​អ្នកយកព័ត៌មាន​របស់​មន្ទីរ​បញ្ច​កោណ​ថា ការ​សម្រាក​នេះ​គឺ​ដើម្បី​ជួយ​បង្កើត​ចន្លោះ​សម្រាប់​កិច្ចខិតខំ​ប្រឹងប្រែង​ការទូត​ដែល​កំពុង​បន្ត​ដើម្បី​ដោះស្រាយ​សកម្មភាព​នុយក្លេអ៊ែរ​របស់​កូរ៉េខាងជើង​។​

លោក Brown បាន​និយាយថា “​នៅពេល​យើង​ឆ្លងកាត់​ទិដ្ឋភាព​ការទូត យើង​មិន​ចង់​ធ្វើ​អ្វីមួយ​ដែល​នឹងធ្វើ​ឲ្យ​រាំងស្ទះ​ដល់​ការចរចា​ការទូត​នោះទេ​។ ដូច្នេះ នោះ​គឺជា​ផ្នែក​មួយ​នៃ​មូលហេតុ​ដែល​យើង​មិន​ធ្វើការ​ហោះហើរ​លើ​ប្រទេស​កូរ៉េ​”​។​

ជា​ផ្នែក​មួយ​នៃ​អ្វីដែល​គេ​ហៅថា “Continuous Bomber Presence Mission”, កងកម្លាំង​ទ័ពអាកាស​អាមេរិក​បានរ​ក្សា​ទុក​យន្តហោះ B-1B, B-52 និង B-2 នៅលើ​ទឹកដី Guam របស់​អាមេរិក​ចាប់តាំងពី​ឆ្នាំ​២០០៤​មកម្ល៉េះ​។​

ជាទូទៅ វា​បាន​ហោះហើរ​ឆ្លងកាត់​តំបន់​នេះ​ដែល​ជារឿយៗ​ជាមួយ​ដៃគូ​នានា​រួមទាំង​ប្រទេស​ជប៉ុន កូរ៉េខាងត្បូង​និង​អូស្ត្រាលី​ផងដែរ​ដែលជា​មធ្យោបាយ​ហ្វឹកហ្វឺន​និង​បង្ហាញ​វត្តមាន​យោធា​ដ៏​រឹងមាំ​ប្រឆាំងនឹង​ប្រទេស​កូរ៉េខាងជើង​និង​សត្រូវ​ផ្សេងៗ​ទៀត​។​

លោក Brown បាន​និយាយថា បើទោះបីជា​លែង​ហោះហើរ​លើ​ឧបទ្វីប​កូរ៉េ​ក៏ដោយ ចំនួន​សរុប​នៃ​ជើងហោះហើរ​របស់​យន្តហោះ​ទម្លាក់​គ្រាប់បែក​គឺ​មិនមាន​ការប្រែប្រួល​ទេ​។​

សហរដ្ឋអាមេរិក​និង​កូរ៉េខាងត្បូង​បាន​កាត់បន្ថយ​ឬ​លុបចោល​សមយុទ្ធ​យោធា​រួមគ្នា​ជាច្រើន​ចាប់តាំងពី​កិច្ចប្រជុំ​កំពូល​ជា​ប្រវត្តិសាស្ត្រ​រវាង​មេដឹកនាំ​កូរ៉េខាងជើង​លោក​គីម​ជុង​អ៊ុន​និង​លោក​ប្រធានាធិបតី​ដូ​ណា​ល់​ត្រាំ​នៅ​ប្រទេស​សិង្ហ​បុរី​កាលពី​ខែមិថុនា​។​
​នៅឯ​កិច្ចប្រជុំ​នោះ លោក​ត្រាំ​បានប្រកាសថា សហរដ្ឋអាមេរិក​នឹង​ឈប់​ធ្វើ​លំ​ហាត់​សមយុទ្ធ​រួមគ្នា​ជាមួយ​កូរ៉េខាងត្បូង​ទៀតហើយ​ដោយ​ហៅ​ពួកគេ​ថា​មានតម្លៃ​ថ្លៃ​និង​បង្កហេតុ​៕ AFP

​

Source: Kampuchea Thmey Daily