លោក ត្រាំ និយាយថា មី​ស៊ី​ល​កូរ៉េខាងជើង “​ធ្វើការ​ធម្មតា​”

លោក​ប្រធានាធិបតី​អាមេរិក ដូ​ណា​ល់ ត្រាំ បាន​និយាយ​កាលពី​ថ្ងៃ​អង្គា​រថា សហរដ្ឋអាមេរិក​បាន​ដឹង​អំពី​មូលដ្ឋាន​មី​ស៊ី​ល​មិនបាន​ប្រកាស​របស់​កូរ៉េខាងជើង​ដែល​បានបង្ហាញ​ដោយ​ក្រុម​ស្រាវជ្រាវ​អាមេរិក​ប៉ុន្តែ​បាន​ទទូចថា រឿង​ទាំងអស់​គឺ​មិន​អី​ទេ​។​
​
លោក ត្រាំ ដែល​កំពុង​ស្វែងរក​ជំនួប​កំពូល​លើក​ទី​២​ជាមួយ​មេដឹកនាំ​កូរ៉េខាងជើង​លោក គីម ជុង​អ៊ុន បាន​សរសេរ​នៅលើ Twitter ថា “​យើង​ដឹង​យ៉ាងច្បាស់​អំពី​ទីតាំង​ដែល​គេ​កំពុងតែ​ពិភាក្សា គ្មានអ្វី​ថ្មី​ទេ​ហើយ​គ្មានអ្វី​កើតឡើង​ខុសពី​ធម្មតា​ឡើយ​។ ខ្ញុំ​នឹង​ជា​មនុស្ស​ដំបូង​ដែល​ប្រាប់​អ្នក​ឲ្យ​ដឹង​ប្រសិនបើ​រឿងរ៉ាវ​ប្រែក្លាយ​ទៅជា​អាក្រក់​”​។​
​
ក្រុម​អ្នកស្រាវជ្រាវ​នៅ​មជ្ឈមណ្ឌល​សិក្សា​យុទ្ធសាស្ត្រ​និង​អន្ដរជាតិ (CSIS) ដែលជា​វិទ្យាស្ថាន​ដ៏​លេចធ្លោ​របស់​ទីក្រុង​វ៉ាស៊ីនតោន​បាន​និយាយ​កាលពី​ថ្ងៃ​អង្គា​រថា រូបភាព​ផ្កាយរណប​បាន​រកឃើញ​មូលដ្ឋាន​មី​ស៊ី​ល​ចំនួន​១៣​ដែល​មិនត្រូវ​បានប្រកាស​ដោយ​ប្រទេស​កូរ៉េខាងជើង​។​
​
ការស្រាវជ្រាវ​នេះ​បាន​និយាយថា មូលដ្ឋាន​ទាំងនេះ​អាច​ត្រូវបាន​គេ​ប្រើ​ដើម្បី​លាក់​មី​ស៊ី​ល​ដែលមាន​សមត្ថភាព​នុយក្លេអ៊ែរ​ហើយ​បាន​ព្រមាន​ថា កូរ៉េខាងជើង​អាច​រក្សា​ទីតាំង​ទាំងនេះ​និង​លទ្ធភាព​វាយប្រហារ​ថ្វីបើ​កំពុង​ចរចារ​ជាមួយ​លោក ត្រាំ លើ​កិច្ចព្រមព្រៀង​ជា​ប្រវត្តិសាស្ត្រ​មួយ​ក៏ដោយ​។​
​
ទោះបីជា​យ៉ាងណាក៏ដោយ លោក ត្រាំ បាន​រៀបរាប់​របាយការណ៍​មួយ​ស្តីពី​ការរកឃើញ​នេះ​ដោយ​កាសែត The New York Times ថា “​មិន​ត្រឹមត្រូវ​” និង​ជា “​ព័ត៌មាន​ក្លែងក្លាយ​”​។​
​
ប្រទេស​កូរ៉េខាងត្បូង​ក៏​ធ្លាប់បាន​ច្រានចោល​ការសិក្សា​នេះ​ផងដែរ​ដោយ​និយាយថា ទីតាំង​ទាំងនោះ​គឺ​ត្រូវបាន​គេ​ដឹង​រយៈពេល​ជាច្រើន​ឆ្នាំ​មកហើយ​។​
​
លោក Kim Eui-kyeom អ្នកនាំពាក្យ​របស់​ប្រធានាធិបតី​កូរ៉េខាងត្បូង​លោក មូ​ន ចេ​អ៊ី​ន បាន​ជំទាស់​ថា កូរ៉េខាងជើង​កំពុង​បញ្ឆោត​ខណៈ​ទីក្រុង​ព្យុងយ៉ាង​មិនដែល​សន្យាថា​នឹង​កម្ចាត់​មី​ស៊ី​ល​រយៈ​ចម្ងាយ​ខ្លី​របស់ខ្លួន​ទេ​។​
​
របាយការណ៍​របស់ CSIS បាន​និយាយថា មូលដ្ឋាន​ទាំងនេះ​គឺ​នៅ​រាយប៉ាយ​ជុំវិញ​ប្រទេស​កូរ៉េខាងជើង​និង​ពេលខ្លះ​នៅតាម​ជ្រលង​ភ្នំ​តូចចង្អៀត​ដែល​មានន័យថា ពួកគេ​អាច​ផ្លាស់​ទី​យ៉ាង​ឆាប់រហ័ស​ដើម្បី​ធ្វើការ​វាយប្រហារ​៕ AFP

​

Source: Kampuchea Thmey Daily