ក្រុមបាល់ទាត់វិសាខា សមាជិកពានរង្វាន់លីគកំពូលកម្ពុជា (Metfone Cambodian League 2018) នៅល្ងាចថ្ងៃព្រហស្បតិ៍ ទី១ ខែវិច្ឆិកា ឆ្នាំ២០១៨ សប្ដាហ៍នេះបានប្រកាសថា ក្លិបជោគជ័យក្នុងកិច្ចសន្យានាំយកកីឡាករឆ្នើម២រូបមកពីក្លិបជើងឯកណាហ្គាវើល គឺខ្សែបម្រើឆេង ម៉េង និង សារី ម៉ាត់ណូរ៉ូទីន។
យោងតាមសេចក្តីប្រកាសរបស់ក្លិបវិសាខា បានបញ្ជាក់ថា សារី ម៉ាត់ណូរ៉ូទីន និង ឆេង ម៉េង នឹងត្រូវចូលរួមហ្វឹកហាត់និងការប្រកួតផ្សេងៗ របស់ក្លិបវិសាខា ចាប់ពីពេលនេះតទៅ ពិសេសជំនួបមិត្តភាពអន្ដរជាតិ រវាងក្រុមវិសាខា ប៉ះក្រុម U18 Fukushima របស់ជប៉ុន ដើម្បីអបអរសាទរខួបលើកទី ៦៥ នៃទំនាក់ទំនងការទូតកម្ពុជា-ជប៉ុន។ ម៉ាត់ណូរ៉ូទីន នឹងធ្វើការបង្ហាញខ្លួនលើកដំបូង លើកលែងតែ ឆេង ម៉េង ដោយសារជាប់ភារកិច្ចជាមួយក្រុមជម្រើសជាតិកម្ពុជា គេមិនទាន់ចូលរួមការប្រកួតនេះបានឡើយ។
ក្លិបបានបន្តថា ឆ្លៀតក្នុងឱកាសនេះ ក្នុងនាមថ្នាក់ដឹកនាំ គ្រូបង្វឹក បុគ្គលិក និងកីឡាករ នៃក្លិបបាល់ទាត់វិសាខា បានស្វាគមន៍យ៉ាងកក់ក្ដៅ ចំពោះវត្តមានរបស់កីឡាករចំណូលថ្មីទាំងពីរ និងជឿជាក់យ៉ាងមុតមាំថា សារី ម៉ាត់ណូរ៉ូទីន និង ឆេង ម៉េង នឹងក្លាយជាផ្នែកមួយដ៏សំខាន់ ដើម្បីរួមចំណែកជួយក្រុមក្នុងការប្រកួតពានរង្វាន់ផ្សេងៗ នារដូវកាលថ្មី ពិសេសការប្រកួតក្របខណ្ឌលីគកំពូលកម្ពុជា និងពានរង្វាន់សម្ដេចតេជោ ហ៊ុន សែន-Hun Sen Cup នាឆ្នាំ២០១៩ ខាងមុខតែម្ដង។
នេះជាការប្រកាសបង្ហាញសមាសភាពកីឡាករលើកដំបូងរបស់ក្លិបវិសាខា ខណៈកាលពីរដូវកាលចាស់បានឈរចំណាត់ថ្នាក់លេខ៣ ក្នុងចំណោមក្លិបជាសមាជិកទាំង១២ ក្រោយប្រកួត២២លើក ឈ្នះបាន១៤លើក ហើយស្មើគ្នា៣លើក និងចាញ់៥លើក។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមវិសាខា បានធ្លាក់ចេញត្រឹមវគ្គ១៦ក្រុមចុងក្រោយចាញ់ក្រុមព្រះខ័នរាជស្វាយរៀង ២ទល់១៕
Source: Kampuchea Thmey Daily
0 Comments