ភ្នំពេញ ៖ មុនបើកមហាសន្និបាតលើកទី១១ នៃសភាតំបន់អាស៊ី (Asian Parliamentary Assembly/APA) គណៈប្រតិភូសភាកម្ពុជា ដឹកនាំដោយ លោកបណ្ឌិត ងួន ញ៉ិល អនុប្រធានទី១រដ្ឋសភា និងជាប្រធានក្រុមសភាជាតិកម្ពុជានៃសភាតំបន់អាស៊ី (APA) បានអញ្ជើញចូលរួមកិច្ចប្រជុំក្រុមប្រឹក្សាប្រតិបត្តិលើកទី២ នាព្រឹក ថ្ងៃទី២៩ ខែវិច្ឆិកា ឆ្នាំ២០១៨ នៅទីក្រុងអ៊ីស្តង់ប៊ូល នៃសាធារណរដ្ឋទួរគី។
យោងតាមព័ត៌មានរបស់នាយកដ្ឋានព័ត៌មាន នៃអគ្គលេខាធិការដ្ឋានរដ្ឋសភាបានឲ្យដឹងថា កិច្ចប្រជុំក្រុមប្រឹក្សាប្រតិបត្តិលើកទី២ របស់សភាតំបន់អាស៊ី នៅទីក្រុងអ៊ីស្តង់ប៊ុល សាធារណរដ្ឋទួរគីនេះ បានពិភាក្សាលើបៀបវារៈសំខាន់ៗចំនួន៧ ៖ ទី១- ពិនិត្យ និងស្តាប់របាយការណ៍នៃកិច្ចប្រជុំក្រុមប្រឹក្សាប្រតិបត្តិលើកទី១។ ទី២ - ពិនិត្យ និងស្តាប់រាយការណ៍ កិច្ចប្រជុំគណៈកម្មាធិការអចិន្ត្រៃយ៍ ស្តីពី ថវិកា និងផែនការរបស់ APA។ ទី៣- ពិភាក្សា និងផ្តល់អនុសាសន៍ទៅលើសេចក្តីព្រាងសេចក្តីសម្រេច របស់គណៈកម្មាធិការអចិន្ត្រៃយ៍ទទួលបន្ទុកកិច្ចការនយោបាយ និងគណៈកម្មាធិការអចិន្ត្រៃយ៍ ស្តីពីថវិកា និងផែនការ ដើម្បីដាក់ជូនមហាសន្និបាតអនុម័ត។ ទី៤- ពិនិត្យ និងពិភាក្សាលើបេក្ខភាព និងជ្រើសរើសអនុប្រធាន APA សម្រាប់ឆ្នាំ២០១៩ ដើម្បីដឹកនាំកិច្ចប្រជុំគណៈកម្មការអចិន្ត្រៃយ៍ទាំង ៤ របស់ APA ដែលមានគណៈកម្មាធិការអចិន្ត្រៃយ៍ ស្តីពីកិច្ចការនយោបាយ, គណៈកម្មាធិការអចិន្ត្រៃយ៍ ស្តីពីសេដ្ឋកិច្ច និងការអភិវឌ្ឍប្រកបដោយចីរភាព គណៈកម្មាធិការអចិន្ត្រៃយ៍ ស្តីពីការសង្គម និងវប្បធម៌ និងគណៈកម្មាធិការអចិន្ត្រៃយ៍ ស្តីពីថវិកា និងផែនការរបស់ APA។ ទី៥- ការពិនិត្យលើបេក្ខភាព សភាប៉ាហ្គីស្ថានធ្វើជាប្រធានសភាតំបន់អាស៊ីសម្រាប់ឆ្នាំ២០២០-២០២១។ ទី៦ - ការពិនិត្យលើសេចក្តីព្រាងសេចក្តីសម្រេចដើម្បីដាក់ជូនមហាសន្និបាតលើកទី១១។ ទី៧- ពិនិត្យ និងអនុម័តរបៀបវារៈនិងកម្មវិធីសម្រាប់មហាសន្និបាតលើកទី១១។
កិច្ចប្រជុំក្រុមប្រឹក្សាប្រតិបត្តិលើកទី២នេះ ក៏ត្រូវបានអង្គប្រជុំជ្រើសរើសលោកបណ្ឌិត ងួន ញ៉ិល អនុប្រធានទី១រដ្ឋសភា និងជាប្រធានគណៈប្រតិភូសភាកម្ពុជា ធ្វើជាអនុប្រធានដឹកនាំកិច្ចប្រជុំនេះផងដែរ៕
Source: Kampuchea Thmey Daily
0 Comments