ចៅក្រមសហព័ន្ធ នឹងបើកសវនាការនៅថ្ងៃពុធលើបណ្តឹងរបស់ទូរទស្សន៍ CNN ប្រឆាំងនឹងរដ្ឋបាលរបស់លោក Donald Trump ដែលចោទប្រកាន់សេតវិមានថា បានរំលោភបំពានសិទ្ធិអ្នកឆ្លើយឆ្លងព័ត៌មានលោក Jim Acosta ដោយការដកហូតប័ណ្ណព័ត៌មានរបស់គាត់ បន្ទាប់ពីមានជម្លោះដ៏ក្តៅគគុកជាមួយប្រធានាធិបតីសហរដ្ឋអាមេរិក។
ទោះបីជាយ៉ាងណាក៏ដោយ សេតវិមានបានច្រានចោលពាក្យបណ្តឹងរបស់ទូរទស្សន៍ CNN ថាជា “ការទាក់ទាញចំណាប់អារម្មណ៍” និងបានប្តេជ្ញា “ការពារយ៉ាងរឹងមាំ” ប្រឆាំងបណ្តឹងនេះ។
ជម្លោះដែលផ្សាយផ្ទាល់តាមកញ្ចក់ទូរទស្សន៍ជាតិនិងការលុបចោលសិទ្ធិរបស់លោក Acosta បានបង្កឲ្យមានការចោទប្រកាន់ថា លោក Trump កំពុងរារាំងសេរីភាពសារព័ត៌មានហើយបានបណ្តាលឲ្យមានភាពតានតឹងយ៉ាងខ្លាំងរវាងរវាងប្រធានាធិបតីនិង CNN ដែលជាគោលដៅនៃកំហឹងជាញឹកញាប់របស់គាត់។
បណ្តាញសារព័ត៌មាននេះបាននិយាយនៅក្នុងសេចក្តីថ្លែងការណ៍មួយដែលប្រកាសពីពាក្យបណ្តឹងកាលពីថ្ងៃអង្គារក្នុងតុលាការសហព័ន្ធនៅទីក្រុងវ៉ាស៊ីនតោនថា “ការដកហូតខុសច្បាប់នៃប័ណ្ណទាំងនេះគឺបានរំលោភលើសិទ្ធិវិសោធនកម្មទីមួយនៃសេរីភាពសារព័ត៌មានប្រឆាំង CNN និងលោក Acosta និងសិទ្ធិវិសោធនកម្មទី៥របស់ពួកគេដោយសារតែដំណើរការនេះ”។
ស្របពេលជាមួយគ្នានោះ ទូរទស្សន៍ CNN បានស្នើសុំឲ្យមានបញ្ជាបញ្ឈប់ជាបណ្តោះអាសន្នដោយព្រមានថា ការផ្អាកប័ណ្ណរបស់លោក Acosta អាចកំណត់អាទិភាពសម្រាប់ការវាយប្រហារនាពេលអនាគតលើសារព័ត៌មានផ្សេងទៀត។
សេចក្តីថ្លែងការណ៍បាននិយាយថា “ប្រសិនបើគ្មានការតស៊ូជំទាស់ទេនោះ សកម្មភាពរបស់សេតវិមាននឹងបង្កើតឲ្យមានផលប៉ះពាល់ដ៏គួរឲ្យភ័យខ្លាចចំពោះអ្នកកាសែតនានាដែលផ្សាយពីមន្ត្រីជាប់ឆ្នោតរបស់យើង”។
ចៅក្រមសង្កាត់អាមេរិកលោក Timothy Kelly បានបញ្ជាឲ្យរដ្ឋបាលលោក Trump ឆ្លើយតបត្រឹមម៉ោង១១ព្រឹកថ្ងៃពុធនិងរៀបចំសវនាការនៅម៉ោង៣:៣០រសៀល។
គួររម្លឹកឡើងវិញថា សេតវិមានបានហាមឃាត់ការចូលយកព័ត៌មានរបស់លោក Acosta បន្ទាប់ពីគាត់មានជម្លោះនៅក្នុងសន្និសីទកាសែតមួយជាមួយលោកប្រធានាធិបតីដែលបានទាមទារឲ្យគេដកមេក្រូចេញពីអ្នកយកព័ត៌មានរូបនេះនិងបានហៅគាត់ថាជាមនុស្សឈ្លើយនិងគួរឲ្យខ្លាច៕ AFP
Source: Kampuchea Thmey Daily
0 Comments