បាត់ដំបង ៖ ជនសង្ស័យចំនួន០២នាក់ ត្រូវបានកម្លាំងការិយាល័យជំនាញ នៃស្នងការខេត្តបាត់ដំបងរៀបចំសំណុំរឿង និងបញ្ជូនទៅសាលាដំបូងខេត្តហើយ កាលពីថ្ងៃទី៣០ ខែវិច្ឆិកាម្សិលមិញនេះ។
តាមរបាយការណ៍ពី សមត្ថកិច្ច នៃស្នងការខេត្តបានឲ្យដឹងថា កាលពីថ្ងៃទី២៨ ខែវិច្ឆិកា ឆ្នាំ២០១៨នៅវេលាម៉ោង២២និង០០នាទី កម្លាំងផ្នែកប្រឆាំងគ្រឿងញៀន បានធ្វើការសហការជាមួយកម្លាំងផ្នែកព្រហ្មទណ្ឌ នៃអធិការនគរបាលស្រុកឯកភ្នំ ចុះប្រតិបត្តិការបង្ក្រាបករណីរក្សាទុក ដោយខុសច្បាប់នូវសារធាតុញៀន ដោយឃាត់ខ្លួនជនសង្ស័យម្នាក់ រួមនឹងវត្ថុតាងមួយចំនួនក្នុងបទល្មើសជាក់ស្ដែង។
របាយការណ៍ដដែលបន្តថា ជនសង្ស័យមានឈ្មោះ ចាន់ ប៊ុនធឿន ហៅលីន ភេទប្រុស អាយុ១៨ឆ្នាំ មានទីលំនៅភូមិរំចេក១ សង្កាត់រតនៈ ក្រុង/ខេត្តបាត់ដំបង ឃាត់ខ្លួននៅថ្ងៃខែ និងពេលវេលាខាងលើ ស្ថិតត្រង់ចំណុចភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង។
ក្រោយឃាត់ខ្លួន សមត្ថកិច្ច បានដកហូតវត្ថុតាងដូចជា ថ្នាំញៀនប្រភេទម៉ាទឹកកកចំនួន០៦កូនថង់ទម្ងន់០,៩៨ក្រាម ទាំងសំបកថង់,ទូរស័ព្ទដៃចាស់០១គ្រឿង រួមនឹងសំបកកូនថង់សម្រាប់វេចខ្ចប់ថ្នាំញៀនមួយចំនួនទៀត។
របាយការណ៍បានបញ្ជាក់ថា ឆ្លងតាមចម្លើយសារភាពរបស់ជនសង្ស័យខាងលើ ដោយមានការសម្របសម្រួលផ្នែកនីតិវិធីពីមន្ត្រីតុលាការផង ទើបកម្លាំងសមត្ថកិច្ចឃាត់ខ្លួនបានជនសង្ស័យម្នាក់ទៀត ដែលជាក្រុមបក្ខពួក កាលពីថ្ងៃទី២៩វិច្ឆិកា នៅវេលាម៉ោង១៤និង០០នាទី ឃាត់ខ្លួនបានត្រង់ចំណុចភូមិតាព្រូច សង្កាត់ក្តុលដូនទាវ ស្រុកឯកភ្នំ។
ជនសង្ស័យមានឈ្មោះ លឿម សុណារិទ្ធ ហៅបឹម ភេទប្រុស អាយុ១៨ឆ្នាំ មានទីលំនៅត្រង់ចំណុចឃាត់ខ្លួនខាងលើ និងជាអ្នកលក់ថ្នាំញៀន ឲ្យទៅជនសង្ស័យឈ្មោះ ចាន់ ប៊ុនធឿន ហៅ លីន។
ក្រោយឃាត់ខ្លួនជនសង្ស័យ សមត្ថកិច្ច បានឆែកឆេររកឃើញ និងធ្វើការដកហូតជាវត្ថុតាងរួមមានថ្នាំញៀនប្រភេទម៉ាទឹកកកចំនួន០៩កូន ថង់ទម្ងន់៣,៨៥ក្រាម ទាំងសំបកថង់ រួមនឹងទូរស័ព្ទដៃចាស់០១គ្រឿងផង។
ជនសង្ស័យទាំងពីរនាក់ខាងលើ ត្រូវបានសមត្ថកិច្ចធ្វើការសរុបសារធាតុញៀនប្រភេទម៉ាទឹកកកដូចគ្នាមានចំនួន១៥កូនថង់ មានទម្ងន់៤,៨៣ក្រាមទាំងសំបក។ បច្ចុប្បន្ន ជនសង្ស័យទាំងពីរនាក់ រួមនឹងវត្ថុតាងកំពុងស្ថិតក្នុងការសាកសួររបស់តុលាការ៕
Source: Kampuchea Thmey Daily
0 Comments