កំពង់ស្ពឺ ៖ សំណុំរឿងដ៏ក្ដៅគគុកថា មានករណីក្រុមចោរគាស់ទ្វារកុដិព្រះសង្ឃ ក្នុងវត្តទេពឧណ្ណារាម លួចយកលុយអស់រាប់សិបលានរៀលនោះ កម្លាំងនគរបាលជំនាញផ្នែកព្រហ្មទណ្ឌ នៃស្នងការដ្ឋាន នគរបាលខេត្តកំពង់ស្ពឺ បើកការស៊ើបអង្កេតស្រាវជ្រាវ ឈានដល់បំបែកសំណុំរឿងរកឃើញការពិតហើយ គឺព្រះគ្រូចៅអធិការវត្ត ប្រើល្បិចដើម្បីក្លែងព័ត៌មានថា មានចោរចូលលួចលុយ និងយកវត្ថុមានតម្លៃតែប៉ុណ្ណោះ។
មន្ត្រីនគរបាល នៃស្នងការដ្ឋានខេត្តកំពង់ស្ពឺ បានប្រាប់ឲ្យដឹង នៅថ្ងៃទី០១ ខែធ្នូ ឆ្នាំ២០១៨នេះថា កាលពីថ្ងៃទី២៩ វិច្ឆិកា កន្លងទៅ វេលាម៉ោងប្រមាណជា១៤រសៀល មានព្រះសង្ឃមួយអង្គ ព្រះនាម ម៉ន អឿន ជាព្រះចៅអធិការវត្តទេពឧណ្ណារាម ស្ថិតក្នុងភូមិសំពៅង ឃុំព្នាយ ស្រុកសំរោងទង បានមកប្ដឹងនៅអធិការដ្ឋាននគរបាលស្រុកសំរោងទង ថា មានចោរចូលគាស់ទ្វារកុដិលួចយកសម្ភារៈមានតម្លៃ និងប្រាក់រាប់សិបលានរៀល(ប្រាក់កឋិនទាន)។
ប្រភពបន្តទៀតថា ក្រោយពីទទួលពាក្យបណ្ដឹង មន្ត្រីបានជំនាញធ្វើការស្រាវជ្រាវ រហូតបំបែកសំណុំរឿងនេះ បាន ដោយកំណត់បានមុខសញ្ញាប្រព្រឹត្តបទល្មើស តាមលក្ខណៈបច្ចេកទេសវិទ្យាសាស្ត្រ និងមានតម្រុយភិនភាគស្លាកស្នាមមួយចំនួន ដែលអាចធ្វើការកត់សំគាល់អំពីអត្តសញ្ញាណជនសង្ស័យ។
បន្ទាប់ពីស៊ើបអង្កេតយ៉ាងយកចិត្តទុកដាក់ គឺជំនាញកំណត់បានមុខសញ្ញាក្នុងករណីនេះ គឺជាដើមបណ្ដឹង ឈ្មោះ ម៉ន អឿន ភេទប្រុស អាយុ៤២ឆ្នាំ ជាព្រះចៅអធិការវត្តទេពឧណ្ណារាមតែម្ដង។
នគរបាលបានឲ្យដឹងទៀតថា តាមពិតករណីនេះ ព្រះចៅអធិការវត្តព្រះនាម ម៉ន អឿន បានប្រឌិតព័ត៌មានបំប៉ោងសភាពការណ៍ ដោយរៀបចំភស្តុតាងស្លាកស្នាម ក្លែងបន្លំសមត្ថកិច្ច ដើម្បីយកប្រាក់ជាង១៦លានរៀល និងប្រាក់ដុល្លារ៩០០ដុល្លារ។
នគរបាលបានបញ្ជាក់ថា ចៅអធិការវត្ត បានប្រើល្បិចគប់បំបែកកញ្ចក់ទ្វារឲ្យបែក និងគាស់ទ្វារដែកធ្វើដូចចោរគាស់មែនទែនអញ្ចឹង ការពិតប្រព្រឹត្តខ្លួនឯង ដើម្បីយកបច្ច័យកឋិនសោះ។
នៅថ្ងៃទី៣០ ខែវិច្ឆិកា ឆ្នាំ២០១៨ កម្លាំងនគរបាលក្រោមបញ្ជារបស់ លោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានចុះធ្វើការស្រាវជ្រាវ រហូតធ្វើឲ្យជនសង្ស័យខាងលើឆ្លើយសារភាពថា ខ្លួនពិតជាបានប្រព្រឹត្ត និងបានរៀបចំផែនការនេះដោយខ្លួនឯងពិតប្រាកដមែន(ផ្ទាល់ព្រះអង្គ)។
លោកវរសេនីយ៍ឯក ឃុត សុផល អធិការស្រុកសំរោងទង បញ្ជាក់ថា មូលហេតុដែលនាំឲ្យអតីតសង្ឃអង្គនេះ រៀបចំផែនការលួចយកប្រាក់របស់វត្ត គឺដោយសារតែមានបញ្ហាផ្ទាល់ខ្លួន ជំពាក់លុយគេ ដោះស្រាយមិនចេញ បែកគំនិតរៀបចំផែនការថាចោរលួចបែបនេះ។
បច្ចុប្បន្ន មុខសញ្ញាខាងលើ ជំនាញបានបញ្ជូនមកស្នងការដ្ឋាននគរបាលខេត្តកំពង់ស្ពឺ ចាត់ការតាមនីតិវិធី៕
Source: Kampuchea Thmey Daily
0 Comments