កណ្ដាល ៖ គួរឲ្យអាណិតណាស់ ដោយសារជីវភាពខ្វះខាត ឪពុក និងកូនបានសម្រេចចិត្តទៅដាក់មងយកត្រីមកធ្វើម្ហូបចិញ្ចឹមជីវិត តែអកុសលអាក្រក់ បានដើរធ្លាក់ចូលរណ្ដៅអាអិច លង់ទឹកស្លាប់ទាំងពីរតែម្ដង។
ហេតុការណ៍នេះ បានកើតឡើងនៅថ្ងៃទី២២ ខែធ្នូ ឆ្នាំ២០១៨ វេលាម៉ោង១៩និង៣០នាទី នៅចំណុចត្រនប់ត្រស់ ក្នុងរណ្ដៅអាអិច ភូមិត្បូងវត្ត ឃុំជ្រៃលាស់ ស្រុកពញាឮ ខេត្តកណ្ដាល។
ជនរងគ្រោះមានពីរនាក់ ទី០១-ឈ្មោះ លន់ លីហេង ភេទប្រុស អាយុ៣៧ឆ្នាំ(ឪពុក) និងទី០២- ឈ្មោះ ហេង លីហ៑ន់ (កូន) ភេទស្រី អាយុ០៨ឆ្នាំ មានទីលំនៅភូមិត្បូងវត្ត ឃុំជ្រៃលាស់ ស្រុក ពញាឮ ខេត្តកណ្តាល។
សាក្សីនិយាយថា នៅថ្ងៃទី២២ ខែធ្នូ ឆ្នាំ២០១៨ វេលាម៉ោង១៧និង០០នាទី ឈ្មោះ លន់ លីហេង ជាឪពុកបាននាំកូនទៅដាក់មង នៅចំណុចទំនប់ត្រស់ ភូមិត្បូងវត្ត។ លុះបាត់ដំណឹងយូរ ប្រពន្ធ និងបងប្អូន បាននាំគ្នាទៅរកជនរងគ្រោះនៅកន្លែងដាក់មង តែរកពុំឃើញដោយមានការសង្ស័យបងប្អូនក៏នាំគ្នាចុះរកក្នុងរណ្ដៅអាអិច ក៏ប្រទះឃើញសពជនរងគ្រោះទាំងពីរស្លាប់ក្នុងទឹក ហើយក៏បានយកសាកសពជនរងគ្រោះទាំងពីរនាក់មកផ្ទះ ធ្វើបុណ្យតាមប្រពៃណី។
សំណូមពរ ៖ គ្រួសាររបស់ជនរងគ្រោះពុំមានការសង្ស័យលើអំពើឃាតកម្មណាមួយឡើយ ចំពោះការស្លាប់របស់ជនរងគ្រោះទាំងពីរនេះ ដោយមិនចាំបាច់ឲ្យសមត្ថកិច្ចធ្វើកោសល្យវិច័យអ្វីទេ៕
Source: Kampuchea Thmey Daily
0 Comments