រតនគិរី ៖ រថយន្តបាកុង៤គ្រឿងបើកចេញពីភូមិសាស្ត្រនៃខេត្តស្ទឹងត្រែងបានឆ្លងកាត់ស្រុកកូនមុំនិងស្រុកលំផាត់ ខេត្តរតនគិរី ឆ្ពោះមកស្រុកកោះញែកខេត្តមណ្ឌលគិរី ដែលរថយន្តបាកុងទាំង៤គ្រឿងនោះ បានដឹកជញ្ជូនសម្ភារៈកែច្នៃមួយចំនួន ដូចជា រណាយន្តកែច្នៃ ម៉ាស៊ីនត្រង់ស៊ីន័រជាច្រើនគ្រឿងសម្រាប់កាប់ផ្ដួលឈើផងដែរ។
ការឃាត់រថយន្តបាកុងខាងលើនេះ ធ្វើឡើងនៅវេលា ម៉ោង៧និង៣០នាទីយប់ថ្ងៃទី៨ ខែធ្នូ ឆ្នាំ២០១៨ នៅតាមបណ្ដោយផ្លូវជាតិលេខ៧៨ នៅត្រង់ចំណុចភូមិតាអងកាតែ ឃុំតាអង ស្រុកកូនមុំ ខេត្តរតនគិរី។
សមត្ថកិច្ច ដែលចុះឃាត់បាកុងខាងលើ បានបង្ហើបឲ្យដឹងថា ដោយដឹកនាំកម្លាំងលោក សាយ ចម្រើន អភិបាលរងស្រុកកូនមុំ ឲ្យចុះឃាត់បាកុងចំនួន៤គ្រឿងដែលបានដឹកសម្ភារៈកែច្នៃឈើមួយចំនួនធំ។
ប្រភពបន្តថា លោកអភិបាលស្រុកកូនមុំបានរាយការណ៍ទៅអភិបាលខេត្ត ដោយមានរថយន្តបាកុង៤គ្រឿងបើកឆ្លងកាត់នៅក្នុងភូមិសាស្ត្រនៃស្រុកកូនមុំ ហើយលោកអភិបាលខេត្តបានបញ្ជាឲ្យលោកអភិបាលស្រុកឃាត់រថយន្តបាកុងខាងលើនេះតែម្ដង។
លោកថា ក្រោយពីឃាត់រថយន្តបាកុងនេះមក ភ្លាមៗនោះ មានអន្តរាគមន៍ពីសមត្ថកិច្ចនៅក្នុងខេត្តឲ្យដោះលែង ប៉ុន្តែលោកអភិបាលស្រុកមិនយល់ព្រមនោះឡើយ នេះជាបទបញ្ជាពីលោកអភិបាលខេត្ត។
លោកសេក ហៃ អភិបាលស្រុកកូនមុំបានឲ្យ កម្ពុជាថ្មី ដឹងនៅព្រឹកថ្ងៃទី៩ ខែធ្នូនេះថា រថយន្តបាកុង៤គ្រឿងនេះ លោកហ្នឹងប្រគល់ទៅឲ្យជំនាញរដ្ឋបាលព្រៃឈើខេត្តដើម្បីចាត់ការបន្តតាមនីតិវិធី។
យ៉ាងណានោះនៅពុំទាន់ដឹងពីម្ចាស់រថយន្តបាកុងទាំង៤គ្រឿងនេះនៅឡើយទេ៕
Source: Kampuchea Thmey Daily
0 Comments