ភ្នំពេញ ៖ កម្ពុជា គ្រោងនឹងបញ្ជូនពលករខ្មែរពី១០០ ទៅ២០០នាក់ ជាលើកដំបូង ទៅធ្វើការនៅប្រទេសម៉ាឡេស៊ីជាផ្លូវការ នៅដើមឆ្នាំក្រោយនេះ ហើយ បន្ទាប់ពីបានផ្អាករយៈពេល៧ឆ្នាំរួចមក។
លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជាបានឲ្យដឹងកាលពីថ្ងៃទី១១ ខែធ្នូឆ្នាំ២០១៨ ថា ការបញ្ជូនពលករទៅធ្វើការនៅម៉ាឡេស៊ីនេះមិនត្រឹមតែជួយពង្រីកទីផ្សារពលកម្មនៅក្រៅស្រុកប៉ុណ្ណោះទេ គឺថែមទាំងជួយលើកស្ទួយដល់ជីវភាពរស់នៅរបស់ប្រជាពលរដ្ឋឲ្យកាន់តែប្រសើរឡើងផងដែរ។
លោក អន ប៊ុនហាក់ បានបន្តថា ពលករខ្មែរដែលគ្រោងនឹងបញ្ជូនទៅធ្វើការនៅប្រទេសម៉ាឡេស៊ីនៅខាងមុខនេះ គឺផ្តោតទៅលើជំនាញសេវាកម្ម សំណង់ កសិកម្ម និងឧស្សាហកម្ម តាមរយៈ ក្រុមហ៊ុនជ្រើសរើសពលករក្នុងស្រុក។
លោកបានបន្ថែមទៀតថា មុននឹងបញ្ជូននេះសមាគមបានធ្វើការបណ្ដុះបណ្ដាលដល់ពលករជាមុនសិនចាប់ពី២ខែ ដល់៤ខែ សម្រាប់ពលករថ្មី ដោយបណ្ដុះបណ្ដាលលើជំនាញភាសាអង់គ្លេស ច្បាប់ស្ដីពីកិច្ចសន្យាការងារ សិទ្ធិ និងកាតព្វកិច្ចពលករ និងនិយោជក ព្រមទាំងវប្បធម៌សាសនាប្រពៃណីរបស់ប្រទេសម៉ាឡេស៊ីផងដែរ ដើម្បីឲ្យពលករអាចសម្របខ្លួនរស់នៅ និងធ្វើការជាមួយជនជាតិម៉ាឡេស៊ីបាន។
លោកបានបន្ថែមទៀតថា ការបញ្ជូនពលករខ្មែរទៅធ្វើការនៅម៉ាឡេស៊ីឡើងវិញនេះ គឺមានការធានារ៉ាប់រងសុខភាព និងគ្រោះថ្នាក់ការងារ ព្រមទាំងទទួលបានប្រាក់ឈ្នួល និងលក្ខខណ្ឌការងារដូចប្រជាពលរដ្ឋនៅម៉ាឡេស៊ីដែរ ដោយសារតែសមាគមបានចុះអនុស្សរណៈជាមួយទីភ្នាក់ងារជ្រើសរើសពលករនៅប្រទេសម៉ាឡេស៊ីរួចមកហើយ ដើម្បីជួយគាំពារដល់ពលករខ្មែរដែលទៅធ្វើការនៅម៉ាឡេស៊ី។
លោកបានបញ្ជាក់ថា ទីភ្នាក់ងារម៉ាឡេស៊ីដែលសហការជាមួយសមាគមកម្ពុជានេះមានតួនាទីជួយសម្របសម្រួលដល់ពលករខ្មែរពេលបញ្ជូនទៅដល់ម៉ាឡេស៊ី និងការពារ និងជួយដោះស្រាយឲ្យទាន់ពេលវេលានៅពេលដែលពលករទូរស័ព្ទតាមប្រព័ន្ធហត់ឡាញ ស្នើសុំឲ្យជួយអន្តរាគមន៍ទៅលើបញ្ហាអ្វីមួយ។
លោក ហេង សួរ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈធ្លាប់បានលើកឡើងថារាជរដ្ឋាភិបាលតែងតែយកចិត្តទុកដាក់ការពារ និងគាំពារសិទ្ធិ និងផលប្រយោជន៍ដល់ពលករ ពលការិនីខ្មែរ កំពុងធ្វើការនៅបរទេស ដើម្បីឲ្យពួកគេទទួលបានសុវត្ថិភាព និងមានលក្ខខណ្ឌការងារល្អ ដូចពលករប្រទេសគេដែរ។
លោកបានបន្តថា ជាក់ស្ដែងមុនបញ្ជូនពលករខ្មែរទៅធ្វើការនៅម៉ាឡេស៊ីនេះ កម្ពុជា បានចុះអនុស្សរណៈជាមួយប្រទេសម៉ាឡេស៊ីដើម្បីការពារ និងផ្តល់សុខុមាលភាពជូនពលករខ្មែរ ក្នុងនោះរួមមានការរៀបចំការគ្រប់គ្រងប្រព័ន្ធទិន្នន័យពលករទេសន្តរប្រវេសក៍កម្ពុជា និងទិន្នន័យរបស់និយោជកចាប់តាំងពីចុះឈ្មោះ ពេលចុះកិច្ចសន្យាការងារ រហូតដល់ធ្វើមាតុភូមិនិវត្តន៍។
ផ្ដល់ការបណ្ដុះបណ្ដាល និងផ្ដល់ទូរស័ព្ទដៃសម្រាប់ទំនាក់ទំនងជាមួយម្ចាស់ផ្ទះ និងក្រុមគ្រួសារ ក៏ដូចជាមន្ត្រីមានសមត្ថកិច្ចកម្ពុជា និងមានធានារ៉ាប់រង គ្រោះថ្នាក់ការងារ និងធានារ៉ាប់រងសុខភាព ដល់ពលករ-ពលការិនី មុនពេលចាប់ផ្ដើមការងារជាដើម។
សូមរំលឹកថា កាលពី ឆ្នាំ២០១១ កន្លងទៅ រាជរដ្ឋាភិបាលកម្ពុជា បានដាក់បម្រាមបញ្ជូនពលករពិសេសស្ត្រីធ្វើការតាមផ្ទះទៅធ្វើការប្រទេសម៉ាឡេស៊ី បន្ទាប់ពីមានសេចក្ដីរាយការណ៍ជាបន្តបន្ទាប់រឿងពលករខ្មែរត្រូវបានរងនូវការធ្វើបាប ឬជួញដូរកម្លាំងពលកម្ម។
លោក អន ប៊ុនហាក់ បានឲ្យដឹងទៀតថា បច្ចុប្បន្ននេះ មានក្រុមហ៊ុនជ្រើសរើសពលករទៅធ្វើការនៅក្រៅប្រទេសចំនួន១០៣ក្រុមហ៊ុន ដែលទទួលបានអាជ្ញាប័ណ្ណស្របច្បាប់ពីក្រសួងការងារ និងបណ្ដុះបណ្ដាលវិជ្ជាជីវៈ៕
Source: Kampuchea Thmey Daily
0 Comments