ប្រដាល់ ៖ វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង ហេង វាសនា អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នាយប់ថ្ងៃសុក្រ ទី១៤ ខែធ្នូ ឆ្នាំ២០១៨នេះ។
សម្រាប់ការផ្គូផ្គងនេះ គូប្រកួតរបស់វង្ស ណយ គឺជាអ្នកប្រដាល់ថៃចំណូលថ្មីឈ្មោះ ឈោគ ណាំឆ័យ(Chhorknamchai Phran 26) ដែលមិនធ្លាប់មកប្រកួតនៅស្រុកខ្មែរនោះទេកន្លងមក។ វង្សណយ ត្រូវជួបប្រកួតជាមួយ ឈោគ ណាំឆ័យ ក្នុងទម្ងន់៧១គីឡូក្រាម។
បើតាមអ្នកដឹកនាំកីឡាករថៃមកប្រកួតឲ្យដឹងថា អ្នកប្រដាល់ថៃដែលជាគូរបស់ វង្ស ណយ នោះ ជាអ្នកប្រដាល់ល្បីឈ្មោះមួយរូបប្រចាំនៅទូរទស្សន៍ក្នុងប្រទេស។
វង្ស ណយ គេទើបតែប្រកួតកាលពីចុងសប្ដាហ៍មុន (០៨ធ្នូ២០១៨) ដោយវាយចាញ់អ្នកប្រដាល់ថៃPhat Many ក្នុងទឹកទី៤។ សម្រាប់ការជួបប្រកួតជាមួយ ឈោគ ណាំឆ័យ ពេលនេះ មិនដឹងថា វង្ស ណយ ស្ទុះបានប៉ុន្មានទឹកនោះឡើយ ព្រោះថាការចាញ់របស់ វង្ស ណយ កន្លងមកនេះ គឺពុំមែនចាញ់ដោយសារបច្ចេកទេសអន់ខ្សោយនោះទេ ផ្ទុយទៅវិញដោយសារតែអន់កម្លាំងកាយសម្បទា(ស៊ុហ្វ)មិនរឹងមាំតែប៉ុណ្ណោះ។ ហើយនេះ ក៏អាស្រ័យដោយសារការហ្វឹកហាត់មិនដិតដល់ផងដែរ។
ដូច្នេះ ចាំមើលការជួបគ្នារវាង វង្ស ណយ និង ឈោគ ណាំឆ័យ នេះ តើនរណាជាអ្នកទទួលបានជ័យជម្នះនោះ?។ វង្ស ណយ មានចំនួន១៨៩លើក ឈ្នះ១២៥លើក ចាញ់៥៩លើក និងស្មើ៥លើក និង ធ្លាប់ផ្តួលដៃគូឲ្យសន្លប់ចំនួន២៨លើក។
ចំណែក ហេង វាសនា អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្គូឲ្យជួបប្រកួតជាមួយអ្នកប្រដាល់ថៃឈ្មោះ ហ្វា និមិត្ត (Farnimit Phran 26 ) ដោយប្រកួតគ្នាក្នុងទម្ងន់៦៣,៥០០ គ.ក្រ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
ហេង វាសនា ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេពុំធ្លាប់ដែលបានឆ្លងកាត់ការប្រកួតជាមួយអ្នកប្រដាល់ថៃនោះទេកន្លងមក ដោយធ្លាប់តែជួបជាមួយអ្នកប្រដាល់អឺរ៉ុបបាន២លើកប៉ុណ្ណោះ។ ដូច្នេះ លើកនេះជាលើកទី១ ដែលគេជួបប្រកួតជាមួយថៃនោះ។ កាលពីជួបប្រកួតជាមួយអ៊ីរ៉ង់លើកចុងក្រោយនោះ (២៥វិច្ឆិកា២០១៨) គេបានវាយស្មើពិន្ទុជាមួយ Mikaell Ebrahim។
ហេង វាសនា មានប្រវត្តិប្រកួតប្រមាណជា៥៧លើក ក្នុងនោះវាយឈ្នះ៤០ លើក ចាញ់១២លើកនិងស្មើ០៥លើក។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា វាសនា អាចយកឈ្នះ ហ្វានិមិត្ត បានឬក៏អត់នោះទេ?។
ហ្វានិមិត្ត គេធ្លាប់មកប្រកួតនៅស្រុកខ្មែរ៣-៤លើកហើយ។ គេជាជើងខ្លាំង ដែលមានស្នៀតទាត់ និងកណ្ដាប់ដៃល្អ។ ដូច្នេះ ហេង វាសនា ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះ មានស្នៀតប្រដាល់ល្អ និងខ្លាំង។ តែបើអាចឈ្នះបាន គឺមានតែការវាយប្ដូរកែងមួយមុខគត់ ដែលប្រថុយដូរជាមួយនឹងជ័យជំនះ។ អ្នកប្រដាល់ថៃរូបនេះ មានប្រវត្តិប្រកួតចំនួន៧០លើក ឈ្នះ៥៥លើក ចាញ់១៤លើក និង ស្មើ០១លើក។ ចាំមើល រវាងហេង វាសនា និង ហ្វានិមិត្ត តើនរណាជាអ្នកឈ្នះនៅក្នុងការជួបគ្នានេះ?។
ដោយឡែក សម្រាប់ការប្រកួតរវាងអ្នកប្រដាល់រួមជាតិវិញ អេរ៉ាវ៉ាន់ ចាន់រាជ អ្នកប្រដាល់ក្លិបកុសលកីឡា នឹងត្រូវជួបប្រកួតជាមួយ អ៊ួង អូន ក្លិបយុវវាលស្បូវខណ្ឌច្បារអំពៅ ដោយប្រកួតក្នុងទម្ងន់៥៤គីឡូក្រាម។ ចំណែក ណាត ប៊ុនលក្ខ អ្នកប្រដាល់ក្លិបកំរៀងសែនជ័យ ត្រូវជួបជាមួយអ្នកប្រដាល់អ៊ឹម បាបេ សមាគមកីឡាក្រសួងការពារជាតិ ក្នុងទម្ងន់៥៤គីឡូក្រាមដែរ។
ដូច្នេះនៅខ្វះម្នាក់ទៀត ដែលត្រូវបង្គ្រប់ចំនួន៥រូបនោះ គឺតម្រូវឲ្យមានការប្រកួតយកម្នាក់បន្ថែម រវាងអ្នកដែលមានចំណាត់ថ្នាក់លេខ៣ក្នុងពូលនីមួយៗ ហើយអ្នកណាឈ្នះ គឺអ្នកនោះបានឡើងទៅប្រកួតដណ្ដើមខ្សែក្រវាត់ជាមួយថៃ៕
Source: Kampuchea Thmey Daily
0 Comments