រដ្ឋ អា​ឡា​ស្កា ត្រូវ​វាយប្រហារ​ដោយ​ការរញ្ជួយ​ដី​ដ៏​ខ្លាំងក្លា

ការរញ្ជួយ​ដី​ដ៏​ខ្លាំងក្លា​មួយ​បាន​វាយប្រហារ​ទីក្រុង Anchorage កាលពី​ថ្ងៃ​សុក្រ​ដោយ​ធ្វើ​ឲ្យ​រង្គើ ផ្ទះ​និង​ក្រុមហ៊ុន​នានា​ហើយ​ជំរុញ​ឲ្យ​ប្រជាពលរដ្ឋ​ចេញមក​តាម​ដងផ្លូវ​និង​បំផ្លាញ​អគារ​ក្នុង​ទីក្រុង​ធំ​បំផុត​របស់​រដ្ឋ​អា​ឡា​ស្កា​មួយ​នេះ​។​
​
ការរញ្ជួយ​ដី​កម្រិត​៧.០​រ៉ិ​ច​ទ័​របា​ន​វាយប្រហារ​នៅវេលា​ម៉ោង​៨:២៩​នាទី​ព្រឹក (​ម៉ោង​ក្នុងស្រុក​)​។​
​ក្រុម​អង្កេត​ភូមិសាស្ត្រ​អាមេរិក​បាន​និយាយថា ចំណុចកណ្តាល​នៃ​ការរញ្ជួយ​នេះ​មាន​ចម្ងាយ​ប្រហែល​១៣​គីឡូម៉ែត្រ​ភាគ​ខាងជើង​ទីក្រុង Anchorage ជាមួយ​ជម្រៅ​២៥​ម៉ា​យល៍​។​
​
ប៉ូលិស​នៅក្នុង​ទីក្រុង​ដែលមាន​ប្រជាជន​ប្រហែល​៣០០,០០០​នាក់​មួយ​នេះ​បាន​និយាយថា វា​បាន​បណ្តាល​ឲ្យ​មានការ​ខូចខាត​ហេដ្ឋារចនាសម្ព័ន្ធ​សំខាន់ៗ​។​
​នាយកដ្ឋាន​ប៉ូលិស​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ផ្ទះ​និង​អគារ​ជាច្រើន​ត្រូវបាន​ខូចខាត​។ ផ្លូវថ្នល់​និង​ស្ពាន​ជាច្រើន​ត្រូវបាន​បិទ​”​។​
​
ទោះបីជា​យ៉ាងណាក៏ដោយ មិនមាន​សេចក្តីរាយការណ៍​ជាបន្ទាន់​អំពី​ការរង​របួស​ធ្ងន់ធ្ងរ​ទេ​។​
​ការព្រមាន​អំពី​រលក​យក្ស​ស៊ូណាមិ​មួយ​ត្រូវបាន​ដាក់ចេញ​នៅ​កោះ Cook និង​ឧបទ្វីប Kenai បន្ទាប់ពី​មានការ​រញ្ជួយ​ដី​ដ៏​ធំ​ប៉ុន្តែ​ត្រូវបាន​ដកចេញ​វិញ​យ៉ាង​ឆាប់រហ័ស​។​
​
លោកស្រី Lisa Murkowski សមាជិក​ព្រឹទ្ធសភា​រដ្ឋ​អា​ឡា​ស្កា​បាន​និយាយថា អាជ្ញា​ធរមាន​ក្តី​ព្រួយបារម្ភ​អំពី​ការទទួលបាន​អគ្គិសនី​បន្ទាប់ពី​ការរញ្ជួយ​នេះ​។​
​
ក្រុមហ៊ុន​ឧស្ម័ន​ធម្មជាតិ ENSTAR បានស្នើ​សុំ​ឲ្យ​ប្រជាពលរដ្ឋ​មានការ​ប្រុងប្រយ័ត្ន​អំពី​ការ​លេច​ធ្លាយ​ឧស្ម័ន​ខណៈពេលដែល​ក្រុមហ៊ុន​ទឹក​ដ៏​ធំ​បាន​និយាយថា មានការ​ដាច់​ចរន្តទឹក​។​
​
ប្រហែល​ពីរ​ម៉ោង​កន្លះ​ក្រោយ​ការរញ្ជួយ​ដី ក្រុមហ៊ុន Municipal Light & Power បាន​និយាយថា អតិថិជន​ប្រមាណ​ពី​៧,០០០​នាក់​ទៅ​១០,០០០​នាក់​នៅតែ​គ្មាន​អគ្គិសនី​ប្រើប្រាស់​៕ AFP

​

Source: Kampuchea Thmey Daily