វិញ្ញាសាបាល់ទាត់បុរសដែលត្រៀមប្រកួតក្នុងព្រឹត្តិការណ៍កីឡាស៊ីហ្គេម លើកទី៣០ នាឆ្នាំ២០១៩ នៅហ្វីលីពីន ត្រូវបានកំណត់រួចហើយដោយម្ចាស់ផ្ទះហ្វីលីពីន ឯកភាពតាមសំណើរបស់កម្ពុជា ពោលគឺយកក្រុមប្រកួតយុវជនក្រោមអាយុក្រោម២២ឆ្នាំ (U-22) មិនយកអាយុក្រោម ២៣ឆ្នាំ(U23) ដូចមុនឡើយ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានបញ្ជាក់ប្រាប់អ្នកសារព័ត៌មាននៅក្នុងស្រុកក្រោយបញ្ចប់កិច្ចប្រជុំកំណត់ប្រភេទកីឡាចុងក្រោយ សម្រាប់ត្រៀមស៊ីហ្គេមឆ្នាំ២០១៩ នៅទីក្រុងម៉ានីលកាលពីពេលថ្មី។ លោក វ៉ាត់ ចំរើន បានបន្តឲ្យដឹងថា ដោយទទួលបានសំណើពីសហព័ន្ធកីឡាបាល់ទាត់កម្ពុជា ចង់ឲ្យម្ចាស់ផ្ទះរៀបចំវិញ្ញាសា U-22 ក្នុងស៊ីហ្គេមឆ្នាំក្រោយ លោកបានយកសំណើនេះ ទៅតស៊ូមតិរយៈពេល២ថ្ងៃ នៅក្នុងកិច្ចប្រជុំខាងលើ រហូតទទួលបានជោគជ័យ បន្ទាប់ពីមានបណ្ដាប្រទេសជាច្រើនគាំទ្រ។
ក្បាលម៉ាស៊ីន កីឡាជាតិរូបនេះបន្តថា «ផ្ដើមចេញពីការស្នើសុំរបស់កម្ពុជា ចង់ឲ្យម្ចាស់ផ្ទះរៀបចំវិញ្ញាសាបាល់ទាត់ U22 ក្នុងស៊ីហ្គេម ឆ្នាំ២០១៩ មានបណ្ដាប្រទេសអាស៊ានស្ទើរ ១០០% បានគាំទ្រសំណើរបស់យើង។ ដូច្នេះហ្វីលីពីន ក៏មិនជំនាស់ដែរ ដោយគេបានឯកភាពតាមសំណើរបស់យើង។ ប៉ុន្តែយ៉ាងណា វិញ្ញាសាគ្រប់ប្រភេទកីឡាទាំងអស់ នៅមិនទាន់សម្រេចផ្លូវការនោះទេ ដោយម្ចាស់ផ្ទះសុំពេលប្រកាសផ្លូវការ នៅថ្ងៃទី០៧ ខែវិច្ឆិកាខាងមុខ តែភាគរយខ្ពស់ហ្វីលីពីន បានបញ្ជាក់ហើយ បាល់ទាត់ គឺសម្រេច U22 ដាក់ឲ្យប្រកួត»។
យោងតាមការបញ្ជាក់ជាផ្លូវការក្នុងកិច្ចប្រជុំសម្រេចប្រភេទកីឡាចុងក្រោយ សម្រាប់ត្រៀមស៊ីហ្គេម ឆ្នាំ២០១៩ ដែលហ្វីលីពីនធ្វើជាម្ចាស់ផ្ទះ គឺបានសម្រេចប្រភេទកីឡាសរុប៥៦ផ្សេងគ្នា។
ក្នុងនោះក្រៅពីវិញ្ញាសាបាល់ទាត់ កម្ពុជាក៏បានសម្រេចបំណងស្នើបញ្ចូលកីឡាមានសក្ដានុពលរបស់ខ្លួនចំនួន ៦ប្រភេទផងដែរ រួមមានកីឡាវ៉ូវីណាម, ប៉េតង់, ជឺជិតស៊ូ, ស្នូកឃ័រ និងប៊ីយ៉ា, សូហ្វតេន្នីស និងកីឡាតេក្វាន់ដូ ជាដើម ដែលធ្វើឲ្យកម្ពុជា មានក្ដីរំពឹងខ្ពស់ក្នុងការបង្កើនខ្ទង់មេដាយមាស។ ស៊ីហ្គេម ឆ្នាំ២០១៩ បានកំណត់ប្រកួតពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩៕
Source: Kampuchea Thmey Daily
0 Comments