កំពង់ធំ ៖ មានករណីស្លាប់ជាបន្តបន្ទាប់ ពីករណីអ្នកជិះម៉ូតូ ជិះឡានបានរងគ្រោះរបួស និងស្លាប់ជាច្រើន ករណី មូលហេតុបុកគោយន្តកន្ត្រៃ ពីក្រោយនៅពេលយប់ រហូតធ្វើឲ្យមានការព្រួយបារម្ភចំពោះថ្នាក់ដឹកនាំខេត្ត រហូតបានចេញបទបញ្ជាឲ្យអ្នកបើកបរគោយន្តកន្ត្រៃ ហាមចរាចរណ៍ នៅពេលយប់ លើដងផ្លូវជាតិ ដើម្បីបញ្ចៀសអត្រាគ្រោះថ្នាក់ចរាចរណ៍ ក្នុងរយៈកាលកន្លង។
គោយន្តកន្ត្រៃដែលបានបង្កឲ្យមានគ្រោះថ្នាក់ដល់អ្នកបើកបរម៉ូតូ និងរថយន្ត និងមនុស្សជាច្រើននៅលើ កំណាត់ផ្លូវសាធារណៈ គឺបណ្តាលមកពីគោយន្តកន្ត្រៃដែលរចនាឡើង ខ្វះបច្ចេកទេសត្រឹមត្រូវ គ្មានស្លាកសញ្ញា គ្មានភ្លើងបំភ្លឺផ្លូវ ដឹកអុស ដឹកឈើ ធ្វើឲ្យអ្នករួមដំណើរលើដងផ្លូវសាធារណៈ ពិបាកក្នុងការបើកបរ ទើបបង្កឲ្យមានគ្រោះថ្នាក់កើតឡើង ជាច្រើនករណីនៅក្នុងខេត្តកំពង់ធំ បើទោះបីជាធ្លាប់មានចរាចរណ៍ណែនាំ ហាមមិនឲ្យគោយន្តកន្ត្រៃ ដែលជាយានយន្តប្រភេទកែច្នៃ បើកបរនៅពេលយប់ពីសំណាក់ស្នងការនគរបាល ខេត្តកំពង់ធំកន្លងមក តែការអនុវត្តនេះត្រូវបានគេប្រតិបត្តិតែមួយចម្អិនប៉ុណ្ណោះ។
ជាក់ស្ដែងគ្រោះថ្នាក់ចរាចរណ៍រវាងម៉ូតូបុកគោយន្តកន្ត្រៃ បានធ្វើឲ្យបុរសម្នាក់ស្លាប់ កាលពីវេលាម៉ោង១៩និង៣០នាទី ថ្ងៃទី៣០ ខែវិច្ឆិកា ឆ្នាំ២០១៨ លើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ៩៧-៩៨ នៅភូមិសូយោង ឃុំសូយោង ស្រុកបារាយណ៍ ខេត្តកំពង់ធំ ដោយបើកបរ ម៉ូតូម៉ាកZUSUKI VIVA ពណ៌ខ្មៅ ស្លាកលេខ កំពត 1B.6936 ដោយឈ្មោះ សូ រដ្ឋា ភេទប្រុស អាយុ៣៤ឆ្នាំ នៅភូមិសៀមរាយ ឃុំសូយោង ស្រុកបារាយណ៍ ខេត្តកំពង់ធំ(ស្លាប់នៅកន្លែងភ្លាមៗ ដោយសារមិនបានពាក់មួកសុវត្ថិភាព)។
ចំណែក អ្នកបើកបរគោយន្តកន្ត្រៃ ឈ្មោះ ឃឹម ពៅ ភេទប្រុស អាយុ២៣ឆ្នាំ នៅភូមិគោកប្រាសាទ ស្រុកអង្គរជុំ ខេត្តសៀមរាប ក្រោយពីកើតហេតុ សមត្ថកិច្ចបាននាំខ្លួនទៅអធិការដ្ឋាននគរបាលស្រុកបារាយណ៍ តាមការសណ្ឋានជំហានដំបូង មូលហេតុដែលគ្រោះថ្នាក់ចរាចរណ៍ គឺបណ្តាលមកពី អ្នកបើកបរម៉ូតូ មានល្បឿនលឿនខ្វះការប្រុងប្រយ័ត្ន ក្រោយពេលកើតហេតុសមត្ថកិច្ចបានចុះវាស់វែងធ្វើកំណត់ហេតុប្រមូលវត្ថុតាងយកមករក្សាទុកនៅអធិការដ្ឋាននគរបាលស្រុកបារាយណ៍រង់ចាំដំណោះស្រាយជាក្រោយ៕
Source: Kampuchea Thmey Daily
0 Comments