បាត់ដំបង ៖ ក្រុមយុវជន១ក្រុម មានគ្នា៩នាក់ ដែលតែងតែប្រើប្រាស់ថ្នាំញៀនរហូតដល់ញៀនថ្នាំត្រូវបានសមត្ថកិច្ចចុះឃាត់ខ្លួន បញ្ជូនទៅមណ្ឌលកែប្រែ ក្រោយការពិនិត្យទឹកនោម រកឃើញមានផ្ទុកសារធាតុញៀនពេញបន្ទុក។
សមត្ថកិច្ចបានប្រាប់ឲ្យដឹងថា ប្រតិបត្តិការបង្ក្រាបឃាត់ខ្លួនជនសង្ស័យចំនួន៩នាក់ខាងលើ ដែលមានពាក់ព័ន្ធនឹងសំណុំរឿងប្រើប្រាស់គ្រឿងញៀនដោយខុសច្បាប់បែបអានាធិបតេយ្យនេះ ធ្វើឡើងនៅចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង កាលពីថ្ងៃទី០៩ ខែធ្នូ ឆ្នាំ២០១៨ កន្លងថ្មីៗនេះ។
សមត្ថកិច្ចបានឲ្យដឹងបន្តថា ជនសង្ស័យទាំង៩នាក់ខាងលើ ក្រោយការឃាត់ខ្លួនកម្លាំងជំនាញ បាននាំទៅធ្វើតេស្តទឹកនោមរកសារធាតុញៀន ជាលទ្ធផល ជនសង្ស័យទាំងនេះមានផ្ទុកនូវសារធាតុញៀនដោយខុសច្បាប់ពិតប្រាកដ ដែលមានកម្រិតខ្ពស់។
បច្ចុប្បន្ននេះ កម្លាំងការិយាល័យជំនាញ នៃអធិការដ្ឋាននគរបាលស្រុកកំរៀង បានស្នើសុំថ្នាក់លើ និងរៀបចំឯកសារបញ្ជូនជនពាក់ព័ន្ធទាំងអស់ទៅកាន់មណ្ឌលកែប្រែពិភព នៃក្តីសង្ឃឹម ដើម្បីបន្សាបសារធាតុនៅក្នុងខ្លួនរបស់ពួកគេទាំង៩ រួមនឹងមានការអប់រំដល់ពួកគេផងដែរ ដើម្បីឲ្យយល់កាន់តែច្បាស់ចំពោះផលប៉ះពាល់ពីគ្រឿងញៀន វាបង្កឲ្យខូចអនាគតខ្លួន ក៏ដូចជាក្រុមគ្រួសាររបស់ពួកគេម្នាក់ៗ បែបណាខ្លះ៕
Source: Kampuchea Thmey Daily
0 Comments