ខេម ចាន់ឈ្នះដោយស្វ័យប្រវត្តិក្នុងជម្រុះជុំចុងក្រោយ ខណៈ ផាន ផាត់យុទ្ធ ចាញ់ឡាវក្នុងទឹកទី៤

ការប្រកួតជម្រុះដណ្តើមខ្សែក្រវាត់ជើងឯកលេខ១គូបូតាទម្ងន់៥៤គីឡូក្រាម នៅសង្វៀនបាយ័នស្ទឹងមានជ័យ នាយប់ថ្ងៃសុក្រទី៣០ វិច្ឆិកា ២០១៨ ដែលជាការប្រកួតជុំចុងក្រោយនោះ ខេមចាន់ អ្នកប្រដាល់ក្លិបនិរោធមានជ័យ បានឈ្នះលើដៃគូដោយស្វ័យប្រវត្តិ ខណៈដែលផានផាត់យុទ្ធ អ្នកប្រដាល់ក្លិបសាលវ័ន្តកីឡា បានប្រកួតចាញ់ដៃគូឡាវក្នុងទឹកទី៤។

ខេម ចាន់ បានឈ្នះដោយស្វ័យប្រវត្តិ ដោយសារតែអ្នកប្រដាល់ថៃ Plangthip Por.Yuthphumi ដែលជាដៃគូប្រកួតនោះ អវត្ថមានដោយសារមានគ្រោះថ្នាក់ចរាចរ ធ្វើអោយ ខេមចាន់ ក្លាយជាអ្នក ឈរនៅលំដាប់លេខ១ក្នុងតារាងពូលខ្មែរ(ពូលA) ដោយក្នុងការប្រកួតជម្រុះ៥លើក ទទួលបាន១៣ពិន្ទុ គឺឈ្នះ៤ ចាញ់១ប្រកួត ក្នុងចំណោម៥ប្រកួតនោះ ។

ចំពោះផាន ផាត់យុទ្ធ គេបានវាយចាញ់អ្នកប្រដាល់ឡាវ Seang Suriyak Site Torkahkart ក្នុងទឹកទី៤ ធ្វើអោយបាត់បង់៣ពិន្ទុ ដោយបានតែ១ពិន្ទុ ដែលសរុបការប្រកួតជម្រុះ៥លើក ផាត់យុទ្ធ មានពិន្ទុ១១ពិន្ទុ ហើយដែលពិន្ទុនេះនៅមិនទាន់ច្បាស់ថាបានឡើងឬអត់នោះទេ? ។

ព្រោះពិន្ទុនេះ ត្រូវស្មើជាមួយប៊ុន សុធា សមាគមកីឡាប្រដាល់ក្រសួងការពារជាតិ ដែលបាន១១ពិន្ទុដែរនោះ ពោលគឺក្នុងការប្រកួតជម្រុះ៥លើដូចគ្នា ប៊ុនសុធា ឈ្នះ៣ ចាញ់២ប្រកួតដូចគ្នា ប៉ុន្តែប៊ុនសុធា គេមានឪកាសជាង ដោយក្នុងការឈ្នះ៣ប្រកួតនោះ គេឈ្នះដៃគូដោយKOក្នុងទឹកទី៣ម្តង និងទឹកទី៤ម្តង ឯផាន ផាត់យុទ្ធ គេឈ្នះដៃគូដោយពិន្ទុ២លើក និងឈ្នះដោយKOក្នុងទឹកទី៤មួយលើក ។ យ៉ាងណា រវាងផាន ផាត់យុទ្ធនិងប៊ុនសុធានេះ មិនទាន់ដឹងច្បាស់ថា អ្នកណាមួយត្រូវជាប់លេខ២ក្នុងពូល ដើម្បីបានឡើងទៅវគ្គពាក់កណ្តាលផ្តាច់ព្រ័ត្រនោះឡើយ ? ។

ខេម ចាន់ ត្រូវគេតម្រូវអោយជួបប្រកួតជាមួយអ្នកប្រដាល់ថៃក្នុងលក្ខណៈមិត្តភាព បន្ទាប់ពីគេឈ្នះដោយស្វ័យប្រវត្តិលើPlangthipនោះ ដោយធ្វើការប្រកួតជាមួយPrakayfa Site Lungdeng ហើយបានវាយអ្នកប្រដាល់ថៃនេះ អោយអាជ្ញាកណ្តាលរាប់៨ក្នុងទឹកទី៤ ហើយបានឈ្នះដោយពិន្ទុលើ Prakayfa Site Lungdeng ក្រោយបញ្ចប់ការប្រកួត៥ទឹកនោះ ។

ចំណែកការប្រកួតរវាងផាន ផាត់យុទ្ធ និង Seang Suriyak វិញ ផាន ផាត់យុទ្ធ គេបានបោះបង់ការប្រកួតក្នុងទឹកទី៤ ដោយសារមិនអាចស៊ូជាមួយអ្នកប្រដាល់ឡាវនោះបាន ។ ក្នុងទឹកទី១ ផាត់យុទ្ធ ត្រូវឡាវវាយកែងត្រូវ បណ្តាលឲ្យបែកឈាមខ្លាំងថ្ពាល់ខាងឆ្វេង ដែលធ្វើឲ្យផាត់យុទ្ធស្រុតធ្លាក់ ហើយត្រូវ Seang Suriyakវាយត្រូវកាន់តែច្រើន រហូតដល់ទឹកទី៤ផាន ផាត់យុទ្ធ បានបោះបង់ចោលការប្រកួត ។

ជាមួយនឹងជ័យជម្នះនេះ Seang Suriyak អ្នកប្រដាល់ឡាវរូបនេះ ត្រូវជាប់លេខ១ក្នុងពូលBដែលមាន១៥ពិន្ទុ ដោយក្នុងការប្រកួតជម្រុះ៥លើក គេឈ្នះទាំង៥លើក មិនស្គាល់ចាញ់នោះឡើយ ។

សូមបញ្ជាក់ថា កីឡាករខ្លាំងទាំង១០រូប ដែលចូលរួមប្រកួតដណ្តើមខ្សែក្រវាត់គូបូតារដូវកាលថ្មីទម្ងន់៥៤គីឡូក្រាមនេះ មានអ្នកប្រដាល់ជើងខ្លាំងកម្ពុជា៥រូប និង អ្នកប្រដាល់ជើងខ្លាំងថៃ-ឡាវ ៥ រូប ចូលរួមវាយដណ្តើមយកខ្សែក្រវាត់នេះ ។

អ្នកប្រដាល់មួយរូបៗ ទាំងខ្មែរ ទាំងថៃ និងឡាវ គឺត្រូវឆ្លងកាត់ការប្រកួតក្នុងម្នាក់ៗ ចំនួន ៥ ប្រកួតម្នាក់ ហើយអ្នកដែលមានពិន្ទុច្រើន២រូបក្នុងមួយពូល ទាំងពូលខ្មែរ និង ពូលថៃ-ឡាវ នឹងត្រូវបានឡើងទៅប្រកួតវគ្គពាក់កណ្តាលផ្តាច់ព្រ័ត្រ និង ផ្តាច់ព្រ័ត្រ ៕