ចុះបិទទីតាំងយីហោ១៦១៨ សាលកម្សាន្តបុកប៊ីយ៉ា បង្កប់ល្បែងស៊ីសង់ហ្គេមបាញ់ត្រី និងទូហ្គេមបាញ់ពង់ជាច្រើនប្រភេទទៀត

ភ្នំពេញ ៖ កម្លាំងគណៈបញ្ជាការឯកភាពខណ្ឌទួលគោក បានចេញប្រតិបត្តិការចុះ បិទទីតាំងយីហោ១៦១៨ សាលកម្សាន្តបុកប៊ីយ៉ា មួយកន្លែងដែលបង្កប់ដោយល្បែងស៊ីសង់ហ្គេមបាញ់ត្រី និងទូហ្គេមបាញ់ពង់ជាច្រើនប្រភេទទៀត។

ប្រតិបត្តិការនេះ ធ្វើឡើងកាលពីល្ងាចថ្ងៃទី២៩ ខែវិច្ឆិកា ឆ្នាំ២០១៨វេលាម៉ោង១៧ នៅក្នុងទីតាំងជាន់ទី១ លើហាងកាកាស៊ូគី ស្ថិតនៅតាមបណ្តោយមហាវិថីព្រះមុន្នីរ៉េត ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ។

ក្នុងប្រតិបត្តិការបង្ក្រាបនេះ ធ្វើឡើង ដោយមានការបញ្ជាផ្ទាល់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងមានការសម្របសម្រួលពីលោក តុប ឈុនឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញបញ្ជាឲ្យលោក ឯក ឃុនឌឿន អភិបាល នៃគណៈអភិបាលខណ្ឌទួលគោក ដឹកនាំកម្លាំងចម្រុះរួមមាន លោក ទៀវ សំអឿន អភិបាលរងខណ្ឌទួលគោក លោក វរសេនីយ៍ឯក ឡុង វិចិត្រា មេបញ្ជាការកងរាជអាវុធហត្ថខណ្ឌទួលគោក លោក វរសេនីយ៍ទោ សុខ ហេង អធិការនៃអធិការដ្ឋាននគរបាលខណ្ឌទួលគោក និងមន្ត្រីក្រោមឱវាទជាច្រើនបន្ថែមទៀត ដើម្បីចុះបិទទីតាំង យីហោ១៦១៨ សាលកម្សាន្តបុកប៊ីយ៉ា បង្កប់ល្បែងស៊ីសងប្រភេទហ្គេមបាញ់ត្រីខុសច្បាប់នេះ។

មន្ត្រីរដ្ឋបាលខណ្ឌទួលគោក ដែលបានចុះអនុវត្តលើការងារនេះបាន ដឹងថា ទីតាំងយីហោ១៦១៨ សាលកម្សាន្តបុកប៊ីយ៉ា លួចបើកដោយគ្មានច្បាប់អនុញ្ញាត និងបង្កប់ដោយល្បែងស៊ីសង ប្រភេទហ្គេមបាញ់ត្រី បាញ់ពង់ជាច្រើនប្រភេទទៀត។

ក្រោយប្រតិបត្តិការ ទីតាំងនេះគណៈកម្មាធិការចម្រុះបានសម្រេចបិទទ្វារជាបណ្ដោះអាសន្ន ដើម្បីបន្តតាមនីតិវិធី។

សូមបញ្ជាក់ផងដែរ ក្នុងប្រតិបត្តិការនេះ អាជ្ញាធរមិនបានដកហូតវត្ថុតាង សម្ភារៈទូហ្គេម និងឃាត់ខ្លួនមនុស្សម្នាក់ឡើយ៕