ភ្នំពេញ ៖ លោកជំទាវ ប៊ីតយ៉ា ដេវី បាន់ដាវី (Bidhya Devi Bhandari ) ប្រធានាធិបតី នៃប្រទេសនេប៉ាល់ បានធ្វើការកត់សំគាល់អំពីមគ្គុទ្ទេសក៍ភាពដ៏ល្អ និងអង់អាចរបស់ សម្ដេចតេជោ នាយករដ្ឋមន្ត្រី ដែលនាំមកនូវសុខសន្តិភាព ស្ថិរភាពនយោបាយ និងការអភិវឌ្ឍប្រទេសកម្ពុជា។
លោកជំទាវ ចង់ឃើញប្រទេសកម្ពុជា និងជូនពរឲ្យប្រទេសកម្ពុជា ក្លាយទៅជាប្រទេសអភិវឌ្ឍក្នុងពេលដ៏ឆាប់។ លោកជំទាវ បានបន្តថា ប្រទេសនេប៉ាល់ ក៏មានបំណងចង់ក្លាយទៅជាប្រទេសអភិវឌ្ឍន៍ផងដែរ ហើយពេលនេះ ប្រទេសនេប៉ាល់ កំពុងតែមានសុខសន្តិភាព និងស្ថិរភាពនយោបាយ ហើយប្រទេសនេះ ក៏កំពុងតែខិតខំធ្វើយ៉ាងណាឲ្យមានការរីកចម្រើនលើវិស័យសេដ្ឋកិច្ច នឹងក្លាយទៅជាប្រទេសអភិវឌ្ឍន៍តិចតួចទៅជាប្រទេសដែលមានចំណូលមធ្យម នៅឆ្នាំ២០៣០ ខាងមុខផងដែរ។
លោកជំទាវ ប៊ីតយ៉ា ដេវី បាន់ដាវី (Bidhya Devi Bhandari ) ប្រធានាធិបតី នៃប្រទេសនេប៉ាល់ បាន ចាត់ទុកទស្សនកិច្ចរបស់ សម្ដេចតេជោ ហ៊ុន សែន មកកាន់ប្រទេសនេប៉ាល់ គឺជាការចាប់ផ្ដើមកម្រិតខ្ពស់ នៃទំនាក់ទំនងការទូតរវាងប្រទេសទាំងពីរ។
លោកជំទាវ មានការសប្បាយរីករាយបំផុតដែលបានស្វាគមន៍ សម្ដេច តេជោ នាយករដ្ឋមន្ត្រី ហ៊ុន សែន មកកាន់ ប្រទេសនេប៉ាល់។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឲ្យដឹងថា លោកជំទាវ ប្រធានាធិបតី នេប៉ាល់ បានលើកឡើងបែបនេះ នៅថ្ងៃរសៀលថ្ងៃទី៣០វិច្ឆិកានេះ ក្នុងឱកាសដែល សម្ដេចតេជោ ហ៊ុន សែន បានអញ្ជើញចូលជួបសម្ដែងការគួរសមជាមួយលោកជំទាវ។
សម្ដេចតេជោ នាយករដ្ឋមន្ត្រី បានមានប្រសាសន៍អរគុណចំពោះ លោកជំទាវ ប្រធានាធិបតី ដែលបានអនុញ្ញាតឲ្យសម្ដេច បានចូលជួបសំដែងការគួរសម។
សម្ដេចតេជោ ហ៊ុន សែន ក៏បានពាំនាំនូវការផ្ដាំផ្ញើ សួរសុខទុក្ខ របស់ព្រះមហាក្សត្រ នៃព្រះរាជាណាចក្រកម្ពុជា ជូនចំពោះ លោកជំទាវ ប្រធានាធិបតី នេប៉ាល់ ផងដែរ។
សម្ដេច ក៏បានថ្លែងអំណរគុណចំពោះប្រទេសនេប៉ាល់ ក៏ដូចជាលោកជំទាវ ប្រធានាធិបតីនេប៉ាល់ ដែលបានរៀបចំកិច្ចប្រជុំអាស៊ីប៉ាស៊ីភិច ២០១៨ នៅប្រទេសនេប៉ាល់។
សម្តេចបន្តថា ទស្សនកិច្ចរបស់ សម្ដេច មកកាន់ប្រទេសនេប៉ាល់ គឺជាដំណើរទស្សនកិច្ចលើកដំបូងជាប្រវត្តិសាស្ត្រ ដែលមេដឹកនាំកម្ពុជា មកកាន់ប្រទេសនេប៉ាល់។
សម្តេចតេជោ បានបន្តថា ទស្សនកិច្ចរបស់សម្ដេច នឹងជួយធ្វើឲ្យទំនាក់ទំនងរវាងប្រទេសទាំងពីរ កា ន់តែមានភាពប្រសើរឡើង។
សម្តេច បានជម្រាប លោកជំទាវ ប្រធានាធិបតីថា សម្តេចបានជួបជាមួយនឹងលោកនាយករដ្ឋមន្ត្រីនេប៉ាល់ និងរដ្ឋមន្ត្រីការបរទេសនេប៉ាល់ ហើយក៏បានចុះហត្ថលេខាលើកិច្ចព្រមព្រៀងអនុស្សរណៈចំនួន ៤ ដើម្បីពង្រីកនូវកិច្ចសហប្រតិបត្តិការរវាងប្រទេសទាំងពីរ។
សម្ដេចមានប្រសាសន៍ថា ប្រទេសយើងទាំងពីរ មានលក្ខណៈប្រហាក់ប្រហែលគ្នា ទាំងវប្បធម៌ ដូចនេះ យើងគួរតែជំរុញការលើកតម្កើងកិច្ចសហប្រតិបត្តិការលើវិស័យផ្សេងៗទៀត មាន ទេសចរណ៍ ពាណិជ្ជកម្ម និងការវិនិយោគបន្ថែមទៀត។
សម្តេច បានជម្រាបជូន លោកជំទាវ ប្រធានាធិបតីនេប៉ាល់ថា ការធ្វើដំណើរពីកម្ពុជា មកកាន់ប្រទេសនេប៉ាល់នេះ គឺមានរយៈពេលតែ៣ម៉ោងប៉ុណ្ណោះ ដូចនេះយើងគួរតែមានការហោះហើរត្រង់រវាងទីក្រុង នៃប្រទេសទាំងពីរ ដើម្បីលើកតម្កើងនូវទំនាក់ទំនងរវាងប្រជាជន និងប្រជាជន នៃប្រទេសទាំងពីរ។
សម្តេចបានបន្តថា សម្តេច ចង់មកទស្សនកិច្ចនៅប្រទេសនេប៉ាល់ជាយូរណាស់មកហើយ ព្រោះ ទីនេះ គឺជាកន្លែងដែលព្រះពុទ្ធបានចាប់កំណើត (ប្រសូត)។
សម្តេច បានអរគុណប្រទេសនេប៉ាល់ដែលបានផ្ដល់ដីមួយកន្លែងដល់កម្ពុជាកសាងវត្តនៅក្នុងប្រទេសនេប៉ាល់។
សម្តេច បានគូសបញ្ជាក់ជាថ្មីថា សម្តេច ពិតជាចង់មកកាន់ប្រទេសនេប៉ាល់ជាថ្មីម្តងទៀត ក្នុងនាមជាលក្ខណៈឯកជនក្រៅផ្លូវការទៅកាន់ទីក្រុងលុម្ពីនី ជាមួយនឹងក្រុមគ្រួសាររបស់សម្ដេច។ ក្នុងព្រះបរមនាមព្រះមហាក្សត្រ នៃព្រះរាជាណាចក្រកម្ពុជា និងក្នុងនាមសម្ដេចផ្ទាល់ សម្ដេចបានគោរពអញ្ជើញលោកជំទាវ ប្រធានាធិបតីនេប៉ាល់ មកទស្សនកិច្ចនៅកម្ពុជា នៅពេលវេលាដែលសមស្របណាមួយ។
ជាការឆ្លើយតប លោកជំទាវ ប្រធានាធិបតី បានមានប្រសាសន៍ថា លោកស្រីមានការសប្បាយរីករាយបំផុត ដែលបានស្វាគមន៍សម្ដេចនាយករដ្ឋមន្ត្រី ហ៊ុន សែន នៃព្រះរាជាណាចក្រកម្ពុជា មកកាន់ប្រទេសនេប៉ាល់។
លោកជំទាវ ប្រធានាធិបតីបានបន្តថា ទស្សនកិច្ចរបស់សម្ដេចតេជោ ហ៊ុន សែន គឺជាការចាប់ផ្ដើមកម្រិតខ្ពស់ នៃទំនាក់ទំនងការទូតរវាងប្រទេសទាំងពីរ។ លោកជំទាវ ប្រធានាធិបតី ក៏បានថ្វាយព្រះពរចំពោះព្រះមហាក្សត្រកម្ពុជាផងដែរ តាមរយៈសម្ដេចតេជោ នាយករដ្ឋមន្ត្រី ហើយសាជាថ្មីម្ដងទៀត លោកជំទាវ សូមថ្លែងអំណរគុណចំពោះការអញ្ជើញរបស់ព្រះមហាក្សត្រ ក៏ដូចជារបស់សម្ដេចតេជោ ហ៊ុន សែន មកទស្សនកិច្ចនៅកម្ពុជានៅពេលខាងមុខ។ លោកជំទាវ នឹងពិនិត្យមើលនូវពេលវេលាដ៏សមស្របណាមួយ ដើម្បីបំពេញទស្សនកិច្ចនៅកម្ពុជា។
លោកជំទាវ បានសម្ដែងការរីករាយចំពោះជំនួបទ្វេភាគី រវាង សម្តេចតេជោ នាយករដ្ឋមន្ត្រី និងនាយករដ្ឋមន្ត្រីនេប៉ាល់ ក្នុងការផ្លាស់ប្ដូរទំនាក់ទំនងរវាងប្រទេសទាំងពីរ។
លោកជំទាវ បន្តថា នេប៉ាល់ ពិតជាមានវិស័យច្រើន ដែលត្រូវធ្វើសហប្រតិបត្តិការ ហើយអ្វីដែលសំខាន់ គឺយើងចង់ជំរុញធ្វើយ៉ាងណាឲ្យប្រទេសយើងទាំងពីរមានវិបុលភាព និងវិបុលសុខជាមួយនឹងការរីកចម្រើន ដែលធ្វើឲ្យប្រជាពលរដ្ឋ នៃប្រទេសយើងទាំងពីរទទួលបាននូវភាពសប្បាយរីករាយ។
លោកជំទាវ បានបន្តថា ខ្ញុំបានឮ ខ្ញុំពិតជារីករាយបន្ទាប់ពីទទួលបាននូវរបាយការណ៍លទ្ធផលជំនួបរវាងនាយករដ្ឋមន្ត្រី នៃប្រទេសទាំងពីរ ដែលឯកសារ៤ ត្រូវបានចុះហត្ថលេខារួមគ្នា។
លោកជំទាវ បានមានប្រសាសន៍ថា ខ្ញុំតែងតែមានសុបិន ថា ធ្វើយ៉ាងណាឲ្យប្រទេសនេប៉ាល់អាចមានការតភ្ជាប់តាមរយៈជើងហោះហើរជាមួយបណ្ដាប្រទេសផ្សេងទៀត រួមទាំងប្រទេសកម្ពុជាផងដែរ ជាពិសេសការតភ្ជាប់ជាមួយប្រទេសដែលមានប្រជាជនមានជំនឿទៅលើព្រះពុទ្ធសាសនា។
លោកជំទាវ បន្តថា ប្រទេសនេប៉ាល់ ជាទឹកដី នៃព្រះពុទ្ធ និងទស្សនវិជ្ជាព្រះពុទ្ធ ដូច្នេះខ្ញុំពិតជារីករាយដែលបានឃើញការចុះហត្ថលេខាក្នុងការតភ្ជាប់ការហោះហើរ រវាងប្រទេសយើងទាំងពីរ។ លោកជំទាវ នឹងខិតខំជំរុញឲ្យពាណិជ្ជករធ្វើយ៉ាងណាចូលរួមនៅក្នុងវិស័យនេះ។
លោកជំទាវ បានបន្តស្នើឲ្យ សម្ដេច តេជោ ហ៊ុន សែន អញ្ជើញមកទស្សនកិច្ចនៅទីក្រុងលុម្ពីនី ជាមួយគ្រួសាររបស់សម្ដេចនៅពេលវេលាដ៏ឆាប់ ហើយលោកជំទាវ ក៏បានស្នើកុំឲ្យមានការពន្យារពេលដោយលោកជំទាវ បានលើកអំពីពាក្យស្លោករបស់ប្រទេសនេប៉ាល់ថា ៖ “ការផ្ដួចផ្ដើម គឺត្រូវតែធ្វើឲ្យបានឆាប់”។
លោកជំទាវ ក៏បានជូនពរចំពោះសម្ដេច តេជោ នាយករដ្ឋមន្ត្រី ក៏ដូចជាប្រទេសកម្ពុជា ជាពិសេសលោកជំទាវ បានធ្វើការកត់សំគាល់អំពីមគ្គុទ្ទេសក៍ភាពដ៏ល្អ និងអង់អាចរបស់ សម្ដេចតេជោ នាយករដ្ឋមន្ត្រី ដែលនាំមកនូវសុខសន្តិភាពស្ថិរភាពនយោបាយ និងការអភិវឌ្ឍន៍ប្រទេសកម្ពុជា។
លោកជំទាវ ចង់ឃើញ ប្រទេសកម្ពុជា ហើយបានជូនពរឲ្យប្រទេសកម្ពុជាក្លាយទៅជាប្រទេសអភិវឌ្ឍក្នុងពេលដ៏ឆាប់។
លោកជំទាវ បានបន្តថា ប្រទេសនេប៉ាល់ ក៏មានបំណងចង់ក្លាយទៅជាប្រទេសអភិវឌ្ឍន៍ផងដែរ ហើយពេលនេះប្រទេសនេប៉ាល់ កំពុងតែមានសុខសន្តិភាព និងស្ថិរភាពនយោបាយ ហើយប្រទេសនេះ ក៏កំពុងតែខិតខំធ្វើយ៉ាងណាឲ្យមានការរីកចម្រើនលើវិស័យសេដ្ឋកិច្ច នឹងក្លាយទៅជាប្រទេសអភិវឌ្ឍន៍តិចតួចទៅជាប្រទេសដែលមានចំណូលមធ្យមនៅឆ្នាំ ២០៣០ ខាងមុខផងដែរ។
លោកជំទាវ ក៏បានមានប្រសាសន៍ផងដែរថា លោកជំទាវ ចង់បានឃើញប្រទេសកម្ពុជាបន្តទទួលបាននូវការរីកចម្រើនឥតឈប់ឈរ ហើយឥឡូវនេះ លោកជំទាវ ដឹងថា កម្ពុជា កំពុងតែមានសុខសន្តិភាព ស្ថិរភាពនយោបាយ ហើយលោកជំទាវ បានធ្វើការកត់សម្គាល់ថា ប្រទេសកម្ពុជា មានការអភិវឌ្ឍន៍ជាងប្រទេសនេប៉ាល់ ហើយលោកជំទាវ ពិតជារីករាយនៅក្នុងនាមប្រទេសមិនចូលបក្សសម្ព័ន្ធដូចគ្នា យើងអាចសហការគ្នាឲ្យទៅមុខទាំងអស់គ្នា។
សម្ដេចតេជោ នាយករដ្ឋមន្ត្រី បានអរគុណចំពោះ លោកជំទាវ ប្រធានាធិបតី ហើយសម្ដេច បានមានប្រសាសន៍ថា អ្វីដែលបានកើតមាននៅប្រទេសនេប៉ាល់ វាក៏បានកើនឡើងនៅក្នុងប្រទេសកម្ពុជាផងដែរ។
តែហេតុការណ៍ដែលបានកើតមាននៅកម្ពុជា គឺវាមានភាពធ្ងន់ធ្ងរជាងប្រទេសនេប៉ាល់ ដោយសារតែនៅកម្ពុជាមានរបបប្រល័យពូជសាសន៍ ធ្វើឲ្យស្ថានភាពប្រទេសកម្ពុជាធ្លាក់ចុះធ្ងន់ធ្ងរជាងប្រទេសនេប៉ាល់។
សម្ដេចតេជោ បានបន្តថា ប៉ុន្តែកម្ពុជា អាចចែករំលែកបទពិសោធន៍ក្នុងការដោះស្រាយជម្លោះដល់ប្រទេសនេប៉ាល់បាន៕
Source: Kampuchea Thmey Daily
0 Comments