កំពង់ចាម ៖ ជនសង្ស័យចំនួន២នាក់ មានមុខរបរពិសេស ដែលដើរបំពុល និងវាយឆ្កែ ត្រូវបានសមត្ថកិច្ចស្រាវជ្រាវចាប់ខ្លួន និងកសាងសំណុំរឿងបញ្ជូនទៅព្រះរាជអាជ្ញា ដោយយោងតាមបណ្ដឹងរបស់ប្រជាពលរដ្ឋ។
ប៉ូលិសបានឲ្យដឹងថា នៅថ្ងៃទី១០ ខែធ្នូ ឆ្នាំ២០១៨ វេលាម៉ោង១០និង៣០នាទី សមត្ថកិច្ចនគរបាល បានទទួលពាក្យបណ្ដឹងពី ឈ្មោះ ហ៊ួរ ង៉ូវ ភេទប្រុស អាយុ៣៥ឆ្នាំ ជាតិខ្មែរ មានទីលំនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម ប្តឹងថានៅវេលាម៉ោង០៨និង៣០នាទី មានឈ្មោះ ស៊ុន សុខឡេង ភេទប្រុស អាយុ២៣ឆ្នាំ ជាតិខ្មែរ មានទីលំនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម បានធ្វើសកម្មភាពលួចវាយឆ្កែនៅចំណុចក្រោយផ្ទះរបស់គាត់។
ប៉ូលិសបានបន្តថា បន្ទាប់ពីទទួលបានបណ្តឹងខាងលើនេះភ្លាម កម្លាំងសមត្ថកិច្ចជំនាញ សហការជាមួយកម្លាំងនគរបាលប៉ុស្តិ៍ស្រក បានចាត់វិធានការជាបន្ទាន់ចុះដល់ទីកន្លែងកើតហេតុ ធ្វើការស្រាវជ្រាវស៊ើប និងហៅ ឈ្មោះ ស៊ុន សុខឡេង ហៅយួន មកសាកសួរ។
ជនសង្ស័យបានឆ្លើយសារភាពថា នៅថ្ងៃទី១០ធ្នូ វេលាម៉ោង៨និង៣០នាទី ខ្លួនពិតជាបានធ្វើសកម្មភាពលួចវាយឆ្កែរបស់ ឈ្មោះ សុន សាម បំណងយកទៅលក់ពិតប្រាកមែន។
ជនសង្ស័យបានសារភាពបន្តថា នៅថ្ងៃទី០៨ ខែធ្នូ ២០១៨ វេលាម៉ោង០៨ព្រឹក ខ្លួន និង ឈ្មោះស្រស់ ស្រង់ ភេទប្រុស អាយុ២៧ឆ្នាំ នៅភូមិជាមួយគ្នា បានធ្វើសកម្មភាពទាក់ឆ្កែ បានចំនួន០១ក្បាល នៅចំណុចលើភ្នំហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម យកទៅលក់នៅស្រុកស្ទឹងត្រង់ បានតម្លៃ៨០.០០០រៀល។
ជនសង្ស័យបន្តថា កន្លងមកធ្លាប់ធ្វើសកម្មភាពលួចទាក់ឆ្កែ និងបំពុលឆ្កែ ជាមួយ ១.ឈ្មោះ ស្រស់ ស្រង់ ,២.ឈ្មោះ ស្រី ហៅចាម ភេទប្រុស អាយុ២៨ឆ្នាំ ជាតិខ្មែរ ,៣.ឈ្មោះ ឃីម ភេទប្រុស ឆ្នាំ២៩ឆ្នាំ ជាតិខ្មែរ ,៤.ឈ្មោះ ធី ធូ ភេទប្រុស អាយុ២២ឆ្នាំ ជាតិខ្មែរ មានទីលំនៅភូមិ.ឃុំជាមួយគ្នា ក្នុងភូមិសាស្ត្រស្រុកកំពង់សៀម ជាច្រើនលើក ហើយពេលលួចបាន គឺយកទៅលក់នៅភូមិសូភាសន៍ ឃុំសូភាសន៍ ស្រុកស្ទឹងត្រង់ ខេត្តកំពង់ចាម។
ប៉ូលិសបានបន្តថា សមត្ថកិច្ច បានស្រាវជ្រាវរហូតដល់ម៉ោង១៧និង៣០នាទី ទើបឃាត់ខ្លួនជនសង្ស័យ ឈ្មោះ ស្រស់ គឹមស្រង់ មានទីលំនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម ពាក់ព័ន្ធករណីលួចបំពុលឆ្កែ កាលពីថ្ងៃទី៩ធ្នូ វេលាម៉ោង០២និង៣០នាទី នៅចំណុចលើភ្នំហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម ជាមួយ ឈ្មោះ ស៊ុន សុខឡេង ហៅយួន នៅភូមិ-ឃុំជាមួយគ្នា។
បច្ចុប្បន្ន ជនសង្ស័យទាំងពីរនាក់ បានឃាត់ខ្លួនបណ្ដោះអាសន្នតាមបញ្ជា លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម ដើម្បីសួរនាំរៀបចំ ឯកសារ និងសំណុំរឿងតាមនីតិវិធី៕
Source: Kampuchea Thmey Daily
0 Comments