ផ្លូវក្រាលកៅស៊ូ និងក្រាលក្រួសក្រហម២៩ខ្សែ មានប្រវែង៧៨៥គីឡូម៉ែត្រនៅទូទាំងខេត្តព្រះវិហារ ដែល ទទួលរងការខូចខាតដោយសារទឹកភ្លៀង បានធ្វើការថែទាំ និងជួសជុលរួចរាល់១០០%ហើយ

ព្រះវិហារ ៖ លោក សំ លាងទ្រីប្រធានមន្ទីរសាធារណការ និងដឹកជញ្ជូនខេត្តព្រះវិហារ បានអោយដឹងនៅថ្ងៃទី០១ធ្នូ ២០១៨នេះថា ផ្លូវក្រាលកៅស៊ូ និងក្រាលក្រួសក្រហមចំនួន ២៩ខ្សែមានប្រវែងសរុប ៧៨៥គីឡូម៉ែត្រ នៅទូទាំងខេត្តព្រះវិហារ ដែលគ្រប់គ្រងដោយមន្ទីរសាធារណការ និងដឹកជញ្ជូនខេត្តព្រះវិហារ ហើយបានខូចខាតដោយសារទឹកភ្លៀងជោកជាំនារដូវវស្សាកន្លងទៅ ពេលនេះ មន្ទីរសាធារណការ និងដឹកជញ្ជូនខេត្ត បានធ្វើការថែទាំ និងជួសជុលរួចរាល់១០០%ហើយ ដើម្បីអោយប្រជាពលរដ្ឋ ងាយស្រួលក្នុងការធ្វើដំណើរ ដឹកជញ្ជូនទំនិញ កសិផលទៅលក់នៅទីផ្សារ ក្នុងរបរចិញ្ចឹមជីវិត ជាពិសេសងាយស្រួល ក្នុងការធ្វើដំណើរបំពេញបេសកកម្មរបស់កងកម្លាំងនៅតាមព្រំដែន។

លោកសំ លាងទ្រី ក៏បានសូមអធ្យាស្រ័យពីសំណាក់ពុកម៉ែ បងប្អូន ប្រជាពលរដ្ឋដែលបានធ្វើដំណើរឆ្លងកាត់លើកំណាត់ផ្លូវខាងលើនាពេលកន្លងទៅ ហើយជួបការលំបាកក្នុងការធ្វើដំណើរលើកំណាត់ផ្លូវមួយចំនួន ដែលក្រុមការងារ របស់លោកជួសជុលមានការយឺតយ៉ាវ។ បច្ចុប្បន្ននេះ ផ្លូវទាំងអស់នោះ ត្រូវបានធ្វើការថែទាំ និងជួសជុលរួចរាល់ហើយ បន្ទាប់ពីអស់ទឹកភ្លៀង។

លោកសំ លាងទ្រីបានបន្ថែមទៀតថា មន្ទីរសាធារណការ និងដឹកជញ្ជូនខេត្តព្រះវិហារ នៅតែបន្តយកចិត្តទុកដាក់ថែទាំផ្លូវទាំងអស់នេះ ដូចជាលុបស្នាមប្រេះ ស្រុត សម្អាតរុក្ខជាតិតាមដងផ្លូវ កៀរសម្រួលផ្លូវក្រួសក្រហមជាដើម ។ល។

លោកសំ លាងទ្រី ក៏បានសូមជូនពរពុកម៉ែ បងប្អូន ប្រជាពលរដ្ឋ ទាំងឡាយដែលអញ្ជើញមកពីទីជិតឆ្ងាយ សូមមានកម្លាំងមាំមួន និងសុខសុវត្ថិភាពក្នុងការធ្វើដំណើរ៕