ភ្នំពេញ ៖ បុរសចិត្តស្លុយម្នាក់ ដើរលេងដាច់យប់ ពេលមកដល់ផ្ទះ ត្រូវប្រពន្ធស្តីបន្ទោសបន្តិចបន្តួចក៏បានចងកសម្លាប់ខ្លួន នឹងខ្សែអង្រឹង ភ្ជាប់ទៅនឹងធ្នឹមពិតាន ក្នុងបន្ទប់ទឹកផ្ទះជួលរបស់ខ្លួនបណ្ដាលឲ្យស្លាប់បាត់បង់ជីវិតដូចបំណង ដោយបន្សល់ទុកកូនតូចៗ២នាក់។
ហេតុការណ៍នេះ បង្កអោយមានការភ្ញាក់ផ្អើលកាលពីវេលាម៉ោង៣និង៣០នាទីរសៀលថ្ងៃទី២៤ ខែធ្នូ ឆ្នាំ ២០១៨ នៅបន្ទប់ជួលក្នុងភូមិ ដើមខ្វិត សង្កាត់ទួលសង្កែទី១ ខណ្ឌឬស្សីកែវ។ បុរស ដែលគិតខ្លីចិត្តខ្លាំង នោះគេស្គាល់ថា ឈ្មោះរ៉ែន សាក់អាយុ២៥ឆ្នាំ ជាកម្មករ សំណង់ ស្នាក់នៅ កន្លែងកើតហេតុខាងលើ មានប្រពន្ធ ឈ្មោះសុខ ស្រីល័ក្ខ អាយុ២៨ឆ្នាំ មានកូន ចំនួន២នាក់។
តាមព័ត៌មានបានអោយដឹងថា បុរសរូបនោះបានចងកសម្លាប់ខ្លួន នឹងខ្សែអង្រឹងភ្ជាប់ទៅនឹងចម្រឹងដែកពិតាននៅក្នុងបន្ទប់ទឹកផ្ទះជួលរបស់ខ្លួន ហើយ ត្រូវបានកូនប្រុស របស់ប្រពន្ធ(ប្តីមុន)ប្រទះឃើញបង្កអោយមានការភ្ញាក់ផ្អើលនាំគ្នា ជួយកាត់បញ្ជូនទៅសង្គ្រោះនៅមន្ទីរពេទ្យ កាល់ម៉ែត តែស្លាប់បាត់ទៅហើយ ។
តាមព័ត៌មានអោយដឹងថា បុរសមានវិបត្តិរូបនោះ និង ស្ត្រីជាប្រពន្ធ បានស្រលាញ់គ្នា ពុំបានរៀបការនោះទេ ហើយរស់នៅជាប្តីប្រពន្ធអស់ រយៈពេល ចំនួន៤ឆ្នាំ បានកូនប្រុស២នាក់ កូនបងអាយុ ១ឆ្នាំ និងកូនប្អូនទើបតែកើតបាន២៥ថ្ងៃប៉ុណ្ណោះ។ ការរស់នៅជាមួយគ្នា រយៈពេលចុងក្រោយនោះ ពុំសូវចុះសម្រុងគ្នានោះទេ តែងតែមានទំនាស់គ្នា ក្នុងគ្រួសារដោយសារតែបុរស រូបនោះ បើកប្រាក់បានមិនអោយប្រពន្ធ ហើយ គិតពីលេងល្បែងនិងផឹកស្រាលជាប្រចាំ។
តាមព័ត៌មានពីស្ត្រីជាប្រពន្ធបានអោយដឹងទៀតថា នៅវេលាម៉ោងប្រមាណ៥ព្រឹកថ្ងៃទី២៤ ខែធ្នូ ឆ្នាំ ២០១៨ ប្តីរបស់ខ្លួន ទើបមកពីលេងល្បែងហើយ ចូលផ្ទះ ខណៈនោះ រូបគាត់បានស្តីបន្ទោស ក៏មានទំនាស់គ្នា ហើយ ប្តីក៏បានទៅបាត់ទៅមិននឹងស្មានថា ចិត្តខ្លាំងទៅសំងំចងកសម្លាប់ខ្លួន ក្នុងបន្ទប់ទឹកបែបនេះសោះ។ សពត្រូវបានក្រុមគ្រួសារនាំយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments